Litli Bergþór - 01.07.2014, Blaðsíða 24

24 Litli-Bergþór
Í desember sl. kom saman hópur fólks til að taka þátt
í leikverki komandi vetrar. Ánægjulegt var hve mikið
af nýjum andlitum mættu því að endurnýjun í félagið
er jú nauðsynleg svo leikdeildin megi vaxa og dafna.
Ákveðið var að taka til sýningar gaman og söngleikinn
„Barið í brestina“ eftir Guðmund Ólafsson leikara
og rithöfund. Bráðskemmtilegt leikrit sem gerist á
sjúkrastofnun út á landi og gengur á ýmsu í allskonar
plotti og ráðabruggi. Ákveðið var að fá Gunnar Björn
Guðmundsson til að leikstýra, en þetta var sjöunda
leikverkið sem hann leikstýrir hér í Biskupstungum.
Góðir menn eru aldrei ofnotaðir. Karl Hallgrímsson
æfði okkur í söng og einnig samdi hann nokkra
söngtexta sem sungnir voru í sýningunni. Æfingar
hófust þann 3. janúar og gengu vel. Góður andi var
í hópnum og þrátt fyrir að nánast allir leikarar hefðu
nælt sér í flensu einhvern tíma á æfingatímabilinu
þá hlupu bara aðrir leikarar í skarðið og björguðu
málunum. Frumsýnt var 14. febrúar og alls voru 13
sýningar. Aðsókn var með eindæmum góð og það
voru ríflega 1400 manns sem sáu sýninguna. Að setja
upp leiksýningu er mikil vinna en allt hefst þetta með
samvinnu og fórnfýsi fólks sem leggur allt í sölurnar til
að vel megi takast til. Við eigum hóp af hæfileikaríku
fólki hér í uppsveitunum og þetta væri ekki hægt nema
með samstilltu átaki.
Breytingar urðu á stjórn leikdeildar á aðalfundi nú
í mars, þar sem Guðný Rósa Magnúsdóttir gjaldkeri
og Egill Jónasson ritari gáfu ekki kost á sér í stjórn. Í
þeirra stað komu Íris Blandon sem nú er formaður og
Hildur María Hilmarsdóttir gjaldkeri. Leikdeildin vill
þakka Guðnýju og Agli gott starf í þágu félagsins.
Camilla Ólafsdóttir ritari.
Verslun og bensínafgreiðsla
Opið 9:00 til 21:00 alla daga í sumar
Allar almennar matvörur og olíur
Fréttir frá leikdeild Umf. Bisk.
Camilla Ólafsdóttir
Leikhópurinn ásamt leikstjóra.
Ljósmyndari Magnús Hlynur Hreiðarsson.