Skagablaðið - 04.09.1985, Blaðsíða 5
Fjölmenni við fyrstu skóflu
stungu nýja íþrótlahússins
- Albert Guðmundsson, fjármáiaráðherra, m.a. viðstaddur
Ríkharður Jónsson, fyrrum frægasti knattspyrnumaður Skaga-
manna og landsins alls og þjálfari Skagamanna um árabil, tók fyrstu
skóflustunguna að nýju íþróttahúsi IA sl. miðvikudag, eins og við
höfðum reyndar skýrt samdægurs frá í Skagablaðinu, að hann myndi
gera. Þetta nýja hús mun standa norðan við nýju sundlaugina, sem
nú er í byggingu á Jaðarsbökkum.
Strax eftir leik ÍA og Vals í 1.
deild íslandsmótsins í knatt-
spyrnu, þar sem markalaust jafn-
tefli varð í hrútleiðinlegum leik,
safnaðist saman fjöldi manns við
fvrirhugaðan skóflustungustað.
Formaður ÍA, Magnús Oddsson,
flutti ávarp og minntist m.a. á
hina brýnu þörf, sem nú væri fyrir
annað íþróttahús. Nú væri svo
komið að í upphafi starfsárs íþrótta-
hússins yrðu forráðamenn þess að
byrja á að setjast niður og skera
niður fjölda tíma hjá öllum ráðum
og félögum innan ÍA. Ekki væri
hægt að kenna því um að húsið
væri ekki nýtt því það væri notað
frá því snemma á morgnana fram
undir miðnætti á degi hverjum.
Að ræðu Magnúsar lokinni bað
hann Ríkharð Jónsson að ganga
fram og taka fyrstu skóflustung-
una, sem kappinn og gerði. Að
því loknu lét Ríkharður svo um
mælt, að vonandi tæki bygging
þessa nýja húss ekki lengri tíma í
árum en bygging gamla íþrótta-
hússins við Laugarbraut tók í
mánuðum en það tók aðeins 6
mánuði. Þá gat Ríkharður þess,
að það væri skemmtileg tilviljun
að í ár væru liðin 50 ára frá því
hafist var handa við undirbún-
ingsvinnu gamla malarvallarins á
Jaðarsbökkum, þess hins sama og
á miðvikudag var nýbúið að leika
á (nú er bara gras þar sem möl var
áður). Þá hefði allt verið unnið í
sjálfboðavinnu, rétt eins og við
byggingu íþróttahússins 1944.
Magnús Oddsson tók til máls
að nýju eftir tölu Ríkharðs og lét
þess getið að treyst væri á að
stuðningsmenn og velunnarar
íþróttahreyfingarinnar leggðu
fram einhverjar stundir í sjálf-
boðaliðsvinnu og hét á viðstadda
að hafa samband við Jón Runólfs-
son eða aðra í bygginganefnd og
láta vita hvenær þeir gætu unnið.
Að þessu mæltu var athöfninni
slitið og kuldahrjáðir gestir héldu
heim á leið. Á meðal viðstaddra
var Albert Guðmundsson, fjár-
málaráðherra, sem hafði verið að
fylgjast með leiknum fyrr um
kvöldið.
Albert Guðmundsson, ráðherra.
Ekki ókeypis,
borga 25%
af taxtanum
Sá misskilningur varð á milli
Skagablaðsins og EIíss Þórs Sig-
urðssonar, forstöðumanns Vinnu-
skólans í Arnardal, í síðasta
blaði, að sagt var að ellilífeyris-
þegar hefðu fengið ókeypis hirð-
ingu garða sinna í sumar. Þetta er
ekki rétt. Þeir fá hins vegar 75%
afslátt og greiða því aðeins fjórð-
ung uppsetts gjalds. Þetta leið-
réttist hér með.
Ríkharður Jónsson tekur fyrstu skóflustunguna að nýja íþróttahúsinu.
„Aðalgœinn" í leikritinu.
Leikarar og aðstandendur sýningarinnar klappaðir upp
Söngleikurinn Ekkó frumsýndur í Bíóhöllinni sl. miðvikud.
Feikileg stemning!
Rokkóperan Ekkó var frum-
sýnd í Bíóhöllinni hér á Akranesi
sl. miðvikudag, eins og Skaga-
blaðið hafði reyndar skýrt ítar-
lega frá að stæði fyrir dyrum.
Áhorfendur á sýningunni voru
um 110 talsins og skemmtu sér
konunglega. Var fögnuðurinn
svo mikill að leikarar og höfuð-
paurar sýningarinnar voru marg-
kallaðir fram á sviðið í lokin.
Telja má víst að aðsókn hefði þó
orðið mun betri ef ekki hefði
komið til hinn mikilvægi leikur
ÍA og Vals í 1. deildinni rétt
áður.
Skagablaðið brá sér á sýning-
una og hafði gaman af en fannst
helst eins og endann á hana
vantaði, a.m.k. var hann afar
snubbóttur. Vonir standa til að
stúdentaleikhúsið verði hér á
ferð aftur og sýni þetta ágæta
verk og er þá vart að efa að fleiri
munu mæta en fyrir viku.
Þeir áhorfendur, sem við
ræddum við, voru sammála um
að mjög gaman hefði verið á
Ekkó. Óhætt er að hvetja ungl-
inga bæjarins, verkið hentar
reyndar flestum aldurshópum en
unglingunum einna best, að hafa
vakandi auga fyrir þessu verki ef
það slæðist hingað á ný.
5