Fréttir - Eyjafréttir - 16.09.2015, Blaðsíða 12
12 Eyjafréttir / Miðvikudagur 16. september 2015
Tinna Tómasdóttir er talmeina-
fræðingur með aðstöðu á HSU
Vestmannaeyjum. Það er nóg
að gera og til hennar leitar fólk á
öllum aldri. Tinna lærði í
Danmörku.
„Ég útskrifaðist frá Syddansk
Universitet í Odense í byrjun árs
2012. Þetta er þriggja ára BA nám
og tveggja ára mastersnám en fyrir
var ég með kennarapróf,“ sagði
Tinna þegar hún var spurð um
námið. En af hverju talmeinafræði?
„Mér hefur alltaf þótt talmeina-
fræði mjög spennandi. Að fá
tækifæri til að vinna með börnum
með málþroskavanda og fullorðnum
með tjáskipta- og málerfiðleika eftir
áföll og sjúkdóma, heillaði mig..“
Tinna, sem er í sambúð með
Bjarna Ólafi Marinóssyni, verkefna-
stjóra hjá Vestmannaeyjabæ, sagði
það alltaf hafa verið stefnuna að
flytja aftur heim að loknu námi. „Ég
vissi að það vantaði talmeinafræð-
ing í Vestmannaeyjum og við erum
bæði fædd og uppalin hér. Ég
byrjaði að vinna hjá bænum en er
núna sjálfstætt starfandi með
skrifstofu á HSU hér í Eyjum þar
sem ég er með talþjálfun. Nú kem
ég inn í Grunnskólann og leik-
skólana sem verktaki fyrir bæinn og
sinni þar greiningum og ráðgjöf.“
Tinna sagði nóg að gera. „Það er
alveg brjálað að gera og langir
biðlistar, upp undir eitt ár eftir að
fólk er búið að fá greiningu,“ sagði
Tinna sem er ánægð í starfi.
„Talmeinafræðin er skemmtilegt
starf og gefandi en líka krefjandi.
Ég er í góðu sambandi við læknana
hér. Eftir greiningu þarf tilvísun frá
þeim til að komast að í þjálfun og
þessi tengsl flýta fyrir öllu ferlinu.
Svo hafa læknar leitað til mín t.d.
þegar börn hafa ekki komið vel út
úr málþroskaprófum eða óskað eftir
ráðgjöf ef sjúklingar þurfa mál-
örvun eftir til dæmis áföll og þá er
gott að vera á staðnum,” sagði
Tinna að endingu.
Tinna Tómasdóttir, talmeina-
fræðingur er með þjónustu á HSU:
Alveg brjálað
að gera og
langir biðlistar
:: Upp undir eitt ár eftir að fólk
er búið að fá greiningu
Thelma Gunnarsdóttir sálfræð-
ingur er nýtekin við starfi á HSU
í Vestmannaeyjum, sem er ný
þjónusta, í samstarfi við HSU á
Selfossi. Hún starfaði hjá
Vestmannaeyjabæ sem sál-
fræðingur við skóla og félags-
þjónustu frá árinu 2007 en fékk
löggildingu sem sálfræðingur í
byrjun árs 2008. Til viðbótar
stundaði Thelma sérnám í
hugrænni atferlismeðferð árin
2012 og 2013. Hún er nú í
ársleyfi frá störfum þar. Í
núverandi starfi hjá HSU er
henni ætlað að sinna meðferð
og ráðgjöf fyrir börn og unglinga
að 18 ára aldri. Að auki rekur
Thelma sálfræðistofu fyrir
fullorðna sem einnig er staðsett
á sjúkrahúsinu. Þar sinnir hún
m.a. þjónustuþegum Virk
starfsendurhæfingar auk þeirra
sem leita til hennar upp á eigin
spýtur.
„Það var nóg að gera hjá Vest-
mannaeyjabæ og mér líkaði vel að
starfa þar. Starfið var að stórum
hluta fólgið í greiningum og ráðgjöf
vegna barna í leik- og grunnskóla
auk virks samstarfs við félags-
þjónustu. Þar vann ég með góðu
fólki bæði í Ráðhúsi og í skólunum
sem ég veit að ég á eftir að sakna.
Það starf leggst ekki af þó ég flytji
mig um set. Það er fullur vilji til að
halda þar uppi góðri þjónustu, búið
er að auglýsa stöðuna og hugsan-
lega býðst mér að taka verkefni þar
áfram. Mér fannst spennandi að fá
að breyta til og vinna í teymi með
öðrum sálfræðingum þegar ákveðið
var að bjóða upp á sálfræðiþjónustu
við HSU hér í Eyjum,“ segir
Thelma sem er í 50% starfi við
stofnunina.
„Ég kem til með að vinna með
teymi á Selfossi sem í eru tveir
reyndir sálfræðingar, Ari Berg-
steinsson og Íris Böðvarsdóttir auk
Eyglóar Aradóttur, barnalæknis.
Okkur er ætlað að sinna tilvísunum
frá læknum, skóla og félagsþjón-
ustu vegna barna og unglinga að 18
ára aldri. Teymið sinnir öllu
Suðurlandi, frá Þorlákshöfn að
Höfn. Eftir að heilbrigðisstofnunin í
Vestmannaeyjum var færð undir
HSU var ákveðið að bæta við hálfri
stöðu sálfræðings sem yrði
staðsettur í Eyjum og að hluta til á
Selfossi segir Thelma”.
En er hálft starf nóg? „Þetta er
a.m.k. hálfu starfi meira en áður var.
Almennt er stefnt að aukinni
sálfræðiþjónustu á heilsugæslu-
stöðvum svo mögulega verður
starfshlutfallið aukið í framtíðinni.
Ég geri ráð fyrir að það taki tíma að
þróa starfið hér og finna út hver
þörfin er. Sjálf er ég aðeins búin að
vera hér í tvær vikur og er enn að
setja mig inn í hlutina. Þetta er
aðeins öðruvísi umhverfi og
áherslur en ég er vön en í grunninn
eru störfin lík. Á Selfossi er áralöng
reynsla á þessari þjónustu sem
verður áhugavert að kynnast nánar
og fá að nýta okkur hér.“
Thelma hefur meðfram vinnu
verið með sálfræðistofu fyrir
fullorðna á sjúkrahúsinu frá byrjun
síðasta árs og því heldur hún áfram.
„Það var hluti af sérnámi í HAM að
hafa fullorðna í meðferð og þar
upphófst sú vinna. Nú í lægra
starfshlutfalli sé ég fram á að geta
sinnt því betur,“ segir Thelma að
lokum.
Thelma Gunnarsdóttir sálfræðingur :: Ný þjónusta
:: 50% starf :: Ráðgjöf fyrir börn og unglinga:
Stefnt að aukinni
sálfræðiþjónustu á
heilsugæslustöðvum
:: Mögulega verður starfshlutfallið aukið í framtíðinni
:: Rekur líka sálfræðistofu fyrir fullorðna
Thelma Gunnarsdóttir,
sálfræðingur.
Tinna Tómasdóttir,
talmeinafræðingur.
Á HSU Vestmannaeyjum er
starfandi mjög öflugur hópur
sjúkraþjálfara, þau eru fimm í
tæplega fjórum stöðugildum.
Deildin hefur verið að eflast frá
því Elías Jörundur Friðriksson og
Anna Ólafsdóttir hófu störf 1994
og 1995. Anna Hulda Ingadóttir
byrjaði 2004, Kolbrún Sól
Ingólfsdóttir 2006 og Hildur
Sólveig Sigurðardóttir 2007.
Starfsemi sjúkraþjálfara í Vest-
mannaeyjum er mjög fjölbreytt en
hlutverk þeirra er fyrst og fremst að
greina og meðhöndla hreyfitruflanir
og orsakir þeirra, hjá fólki sem er
allt frá því að vera rúmliggjandi á
sjúkrahúsum til þess að vera
keppnisfólk í íþróttum. Þar að auki
fást sjúkraþjálfarar við að koma í
veg fyrir eða draga úr afleiðingum
áverka, álagseinkenna, sjúkdóma og
lífsstíls sem með truflun á hreyfingu
geta raskað lífi einstaklingsins.
Sjúkraþjálfun á sjúkradeild
og heilsugæslu
Starfsemi sjúkraþjálfara við
Heilbrigðisstofnunina er í raun
margþætt. Á sjúkradeild sinna
sjúkraþjálfarar endurhæfingu
inniliggjandi sjúklinga. Á sjúkra-
deild HSU Vestmannaeyjum eru
þau með daglega setleikfimi, sinna
pöntun hjálpartækja og fara í
heimilisathuganir þegar þess gerist
þörf.
Einn sjúkraþjálfari starfar í
hlutastarfi sem hreyfistjóri á
heilsugæslunni og sinnir hreyfi-
seðlaverkefninu en það felst í því að
læknir ávísar einstaklingum í
hreyfingu með eftirliti sjúkraþjálf-
ara þar sem hreyfing hefur sam-
kvæmt vísindalegri reynslu getað
dregið úr fjölmörgum einkennum
m.a. ýmissa hjarta- og æðasjúk-
dóma og andlegra sjúkdóma.
Sjálfstætt starfandi
Sjúkraþjálfararnir eru þess utan
sjálfstætt starfandi og taka við
skjólstæðingum sem vísað er af
læknum í sjúkraþjálfun vegna ýmissa
vandamála. Sjúkraþjálfarar eru einnig
með hina ýmsu leikfimishópa á borð
við hjarta- og lungnahóp, gigtarhóp og
sundleikfimishóp.
Einnig hafa Elías og Hildur Sólveig
verið að taka út vinnustaði, kenna
hléæfingar og fræða um réttar
vinnustellingar, Elías hefur t.a.m. verið
að kenna á námskeiði fyrir fiskverka-
fólk þar sem slík störf geta verið
einhæf og líkamlega lýjandi og bendir
hann á leiðir til að vinna gegn því.
Sjúkraþjálfararnir eru sammála um
að sjúklingar leiti til þeirra í meira
mæli áður en farið er t.d. inn á
Reykjalund til undirbúnings fyrir
dvölina þar og jafnframt er
starfsfólk Landspítala farið að
útskrifa sjúklinga fyrr heim en
tíðkaðist hér áður í kjölfar stórra
aðgerða og því nauðsynlegt að fólk
fái viðeigandi endurhæfingu í sinni
heimabyggð. Þau eru einnig í
samstarfi við Virk sem miðar að því
að hjálpa fólki að komast út á
vinnumarkaðinn.
Vestmannaeyingar eru vel settir
með sjúkraþjálfun og fjölgun í
faginu hefur verið í réttu hlutfalli
við þá vitundarvakningu sem orðin
er í samfélaginu, að fólk leiti sér
fyrr aðstoðar í stað gömlu leiðar-
innar, að harka af sér sem leiðir oft
af sér enn verri vandamál. Að sama
skapi hefur orðið mikil viðhorfs-
breyting hvað varðar almenna
hreyfingu og koma sjúkraþjálfarar
gjarnan að ráðleggingum varðandi
þjálfun, taka þol- og styrktarpróf og
aðstoða við gerð þjálfunaráætlana,
sjá um endurhæfingu í kjölfar
álagsmeiðsla og svo mætti lengi
telja. Sjúkraþjálfararnir eru öll
sammála um að starfið sé fjölbreytt
og afskaplega þakklátt.
HSU :: Öflugur hópur sjúkraþjálfara:
Fjölgun í réttu hlutfalli við þá vitundar-
vakningu sem orðin er í samfélaginu
:: Fólk leitar sér fyrr aðstoðar í stað gömlu leiðarinnar, að harka af sér
Sjúkraþjálfarar á HSU í Vestmannaeyjum. Frá vinstri, Elías Jörundur Friðriksson, Kolbrún Sól
Ingólfsdóttir, Anna Hulda Ingadóttir, Anna Ólafsdóttir og Hildur Sólveig Sigurðardóttir.