Fréttir - Eyjafréttir - 13.01.2016, Blaðsíða 6
6 Eyjafréttir / Miðvikudagur 13. janúar 2016
Allir landsmenn þekkja skop-
myndir Sigmunds Jóhannssonar
sem birtust í Morgunblaðinu
nánast á hverjum degi í yfir
fjörutíu ár eða frá 25. febrúar
1964 til 9. október 2008. Í
desember 2004 keypti forsætis-
ráðuneytið safn Sigmunds og
afhenti það Vestmannaeyjabæ
til varðveislu, alls um 10.000
myndir. Frá þeim tíma hefur það
verið vistað í Safnahúsinu. Árið
2009 var lokið við að birta
myndirnar á vefsvæðinu
sigmund.is en nú eru myndirnar
orðnar um 11.000.
Síðastliðna helgi kom forsætis-
ráðherra, Sigmundur Davíð
Gunnlaugsson, til Eyja með þá
færandi hendi að afhenda Vest-
mannaeyjabæ safnið að gjöf. Að
sögn Elliða Vignissonar, bæjar-
stjóra, er það afskaplega mikilvægt
þar sem með því er allur vafi tekinn
af hvað varðar réttindamál og því
auðveldara að huga enn betur að því
að gera Sigmundssafnið aðgengi-
legra en meðan eignarréttur og
umráðaréttur var allur á hendi
ríkisvaldsins.
Á sunnudeginum, 10. janúar, var
haldin látlaus en virðuleg athöfn í
Sagnheimum, byggðasafni, þar sem
forsætisráðherra og bæjarstjóri
skrifuðu undir formlega gjafaaf-
hendingu til Vestmannaeyjabæjar.
Elliði hóf athöfnina með því að
benda á að safn Sigmunds væri eitt
af mestu menningarverðmætum
Vestmannaeyja og því vildi hann
þakka ráðherra fyrir að koma
persónulega og sýna með því
velvilja sinn í verki.
Forsætisráðherra svaraði því til að
hann ætti ýmislegt að þakka sjálfur
þar sem hans pólitíski áhugi hefði
fyrst kviknað af myndum Sigmunds
og hann sagðist vera hreykinn af
því að fá nú tækifæri til að afhenda
Vestmannaeyingum safnið til
eignar.
Hlynur Sigmundsson talaði fyrir
hönd foreldra sinna og annarra
afkomenda. Hann byrjaði á því að
þakka Guðna Ágússyni og Kára
Bjarnasyni kærlega fyrir þeirra
atbeina við að ljúka þessu máli á
þennan farsæla veg og bætti því við
að nákvæmlega svona hefði pabbi
sinn viljað að mál hefðu þróast.
Hann lét þess jafnframt getið að
móðir sín, Helga Ólafsdóttir, hefði
viljað vera viðstödd en vegna
mikilla veikinda hennar hefði það
ekki verið unnt. Hlynur þakkaði
einnig Elliða fyrir atorku hans í
málinu og sagðist styðja heils hugar
áætlanir hans um að auka aðgengi
að safninu með margvíslegu móti
og hlakka til að sjá þær verða að
veruleika á næstunni. Þá kallaði
hann Kára fram og Jón Óla
Ólafsson, afabarn Sigmunds sem
afhenti Safnahúsinu glæsilegt
listaverk eftir Sigmund sem hann
málaði 1969 og sýnir vel höfnina
fyrir gos.
Að lokum var boðið upp á kaffi og
veitingar inni í þjóðhátíðartjaldinu.
Hún var hlýleg umgjörðin um þessa
athöfn og einhver notalegur andi
yfir samkomunni allri. Fram kom í
spjalli við Hlyn og Kára eftir
athöfnina að fyrirhugað er að halda
málþing um Sigmund líklega á
sumardaginn fyrsta, 21. apríl en
daginn eftir hefði Sigmund orðið 85
ára. Fram kom í spjalli þeirra félaga
að Guðni Ágústsson, sem var
erlendis og gat því ekki verið með
að þessu sinni, myndi þar minnast
vinar síns ásamt fleiri félögum.
Nokkrar af myndum Sigmunds
höfðu verið teknar fram í tilefni
dagsins og gamalt bros endurfædd-
ist á vörum blaðamanns þegar flett
var og hann gat ekki annað en
hugsað með sér hvílíkan fjársjóð
Vestmannaeyjar hafa átt og eiga enn
í Sigmund Jóhannssyni.
Merkur listamaður og mikill
Eyjamaður
„Við höfum lengi unnið að því að
tryggja að verk Sigmunds heitins,
þess merka listamanns og mikla
Eyjamanns sem lést í maí 2012,
yrðu hluti af listasafni og menn-
ingarverðmætum Vestmannaeyja-
bæjar,“ sagði Elliði við Eyjafréttir
eftir athöfnina. „Með samkomulag-
inu sem við Sigmundur Davíð
undirrituðum í gær afhendir
ráðuneyti hans Vestmannaeyjabæ til
eignar öll þau verk sem Sigmund
hafði áður framselt til ráðuneytisins.
Á móti skuldbindum við Eyjamenn
okkur til að stuðla að varðveislu
myndasafnsins og gera það
aðgengilegt almenningi.
Við höfum farið vandlega yfir
hvernig það verði best gert. Við
horfðum sérstaklega til þeirrar
staðreyndar að verk Sigmunds voru
hugsuð fyrir landsmenn til að skoða
og njóta beint og milliliðalaust
hvarvetna í samfélaginu. Birtingar-
formið var náttúrlega fyrst og
fremst síður Morgunblaðsins. Með
það í huga teljum við eðlilegast að
setja upp og reka rafrænt safn með
myndverkum Sigmunds þar sem
landsmenn allir geta áfram nálgast
þessi merku verk og samtímaheim-
ildir beint og millliðalaust. Í
viðbót við þetta þá hyggjumst við
standa fyrir uppsetningu á sýning-
um á verkum Sigmunds fyrir bæði
heimamenn og gesti.“
Elliði sagði að fyrir Vestmanna-
eyjabæ sé þetta mikill heiður og
gjöf forsætisráðuneytisins afar
raunsnarleg. „Í viðbót við að
framselja okkur eignarréttinn á
safninu gerðum við einnig sam-
komulag um fjárstuðning ráðu-
neytisins við það að hanna og koma
upp gagnasafni tengdu mynda-
grunninum. Sigmund Jóhannsson
var, eins og við Eyjamenn þekkjum
svo vel, ekki eingöngu merkur
listamaður, snjall uppfinningamaður
og húmorískur karakterteiknari.
Hann var sannur Eyjamaður sem
ætíð var tilbúinn til að leggja lykkju
á leið sína fyrir hagsmuni Eyjanna
og Eyjamanna.
Ég vil sérstaklega þakka Kára
Bjarnasyni, Helgu Halbergsdóttur
og Kristínu Jóhannsdóttur fyrir
þeirra þátt í þessu sem og Guðna
Ágústssyni, vini Sigmunds. Þá er
þáttur fjölskyldu listamannsins stór
og rausnarskapur þeirra mikill, án
þeirra hefði aldrei getað orðið af
þessu,“ sagði Elliði.
Hlynur Sigmundsson sagði í
viðtali við Eyjafréttir að þetta væri
mikill heiður fyrir fjölskylduna og
henni væri efst í huga þakklæti til
allra sem komu að því að þetta varð
að veruleika. „Guðni Ágústsson,
fyrrum ráðherra og þingmaður
okkar Sunnlendinga, var mikill
vinur pabba og hafði í mörg ár
barist fyrir því að ríkið og síðar
Vestmannaeyjabær eignaðist safn
pabba sem taldi í allt um 11.000
myndir þegar upp var staðið. Guðni
og Kári Bjarnason hafa lagt á sig
mikla vinnu síðustu mánuði til að
koma þessu í höfn. Erum við þeim
og öðrum sem komið hafa að þessu
afar þakklát og heiður fyrir okkur
að sjálfur forsætisráðherra skyldi
mæta og afhenda okkur Eyja-
mönnum safnið persónulega,“ sagði
Hlynur.
„Þetta eru frábær lok á þessu ferli
og þó mamma gæti ekki mætt þá
gladdi það hana mjög að vita af því
að þessi draumur pabba um að
Vestmannaeyjar eignist safnið er
orðinn að veruleika. Það eru frábær
lok á þessu,“ sagði Hlynur.
Forsætisáðherra kom færandi hendi :: Sigmundsmyndir í eigu Vestmannaeyja:
Pólitískur áhugi kviknaði
fyrst af myndum Sigmunds
:: Sagði Sigmundur Davíð :: Hreykinn yfir því að fá nú tækifæri til að afhenda
Vestmannaeyingum safnið til eignar
Frá vinstri: Jón Óli Ólafsson með syni sínum, Róbert Loga Jónssyni, Kári Bjarnason, Elliði Vignisson, Sigmundur Davíð Gunnlaugsson, Hlynur
Bjarklund Sigmundsson, Kateryna Sigmundsson með börnum þeirra, Roman Alexander og Anitu Lind.
ómar GarðarSSon
omar@eyjafrettir.is
Sigmundur Davíð og Elliði skrifa undir samkomulagið.