Fréttir - Eyjafréttir - 16.03.2016, Blaðsíða 8

8 Eyjafréttir / Miðvikudagur 16. mars 2016
Loðnuvertíðin fer nú senn að
taka enda og má segja að veiðar
hafi gengið misvel. Vertíðin
byrjaði nokkuð kröftulega en
síðustu daga hefur veðrið sett
strik í reikninginn. Veðrið á
miðunum síðan fyrir helgi hefur
verið slæmt og hafa skipin því
að mestu legið í vari við Snæ-
fellsnesið. Hver lægðin af
annarri hefur gengið yfir og ekki
er nóg með að veðrið sé slæmt
heldur hefur sjólagið verið með
versta móti þann tíma sem
vindur hefur gengið niður.
Nú vonast menn þó, að vestur-
gangan sé komin og eru því
bjartsýnir fyrir næstu daga að hægt
verði að ná leyfilegum kvóta og
bjarga vertíðinni. Þegar skipin
héldu út í gær eftir brælu helgar-
innar fannst stór loðnuflekkur um
18 mílur norðvestur af Öndverðar-
nesi og virðist vesturgangan því
vera að koma upp á svipuðum
slóðum og í fyrra. Að sögn
skipstjóra á svæðinu er loðnan sem
er að finnast núna á svæðinu miklu
skemmra komin að hrygningu en
loðnan sem veiddist áður, einnig sé
talsvert meira magn að sjá núna.
Hvalir til ama á vertíðinni
Erfitt hefur verið að kasta á loðnuna
á vertíðinni vegna gríðarlegs ágangs
hvala. Er fyrst og fremst um
hnúfubak að ræða og segja
sjómennirnir að stundum þegar litið
sé yfir hafflötinn á miðunum megi
sjá blástur frá tugum eða hundr-
uðum hvala. Tala sjómennirnir um
að fjöldi hvala á loðnumiðum hafi
vaxið mikið á seinni árum og ekki
er óalgengt að þeir valdi umtals-
verðum vandræðum við veiðarnar.
Flest skipin hafa komið sér upp
svokölluðum hvalafælum sem
hengdar eru neðan á nótina en
búnaðurinn virðist ekki virka eins
og hann á að gera. Mikil aukning
hefur orðið á hnúfubaknum síðasta
áratuginn en þegar mælingar hófust
árið 1987 taldi tegundin aðeins um
2000 dýr en árið 2007 um 15.000.
Talning var svo gerð á síðasta ári
en niðurstöður úr henni liggja ekki
enn fyrir.
Skiptsjórar hafa talað um það að
þeir séu hræddir um að hnúfubakur-
inn éti alla loðnuna og segja að ef
hvalirnir sjái torfu sé þeir mættir
undir eins.
Vertíðin í ár fjórðungur af
kvóta síðustu vertíðar
Eyþór Harðarson, útgerðarstjóri hjá
Ísfélaginu sagði í samtali við
Eyjafréttir á mánudaginn að veiðar
hefðu ekki gengið nægilega vel
síðustu daga. ,,Veiðar hafa gengið
frekar illa síðustu daga en fréttir
gærdagsins að hugsanlega sé vestur-
gangan komin í Breiðafjörðinn
lífgaði smá upp á stemminguna. Nú
vonumst við til að geta klárað
kvótann okkar næstu daga en við
eigum um 5000 tonn óveidd.“
Þess má geta að Ísfélag Vest-
mannaeyja á rúmlega 20.000 tonna
kvóta.
Aðspurður um muninn á vertíðinni
núna og síðasta ár segir Eyþór að
þessi vertíð sé bara fjórðungur af
kvóta síðustu vertíðar, þannig að
hún gefi mun minna.
Vertíðin hefur gengið bara
nokkuð vel
Rúmlega hundrað manns hafa verið
á vöktum hjá Vinnslustöðinni
síðustu vikur, auk annarra starfs-
manna í bolfiskfrystingu, saltfisk-
vinnslu, bræðslu auk sjómanna á
skipum félagsins. Þþví hefur ríkt
sannkölluð vertíðarstemmning þar á
bæ.
Að sögn Sindra Viðarssonar, sviðs-
stjóra uppsjávarsviðs hjá Vinnslu-
stöðinni hefur vertíðin gengið
nokkuð vel og nú fyrst sé stopp í
stöðinni vegna hráefnisleysis en
Vinnslustöðin er með rúmlega
11.000 tonna kvóta.
,,Við tókum smá slettu í upphafi
til frystingar og fórum svo að græja
okkur í hrogn. Fyrsta hrognatúrnum
var svo landað 4. mars og það var
ekki fyrr en í morgun, mánudag að
við vorum stopp vegna hráefnis-
leysis. Við eigum eftir að veiða um
1000 tonn og bæði Kap og Ísleifur
eru á miðunum að ná í það. Vonandi
verður bara einhver veiði eftir þessa
brælu. Það er því lítið eftir sem
klárast vonandi á næstu dögum.“
Á þessari vertíð framleiðir
Vinnslustöðin nánast eingöngu
loðnuhrogn en sáralítið var fryst af
hrygnu fyrir Japansmarkað og hæng
fyrir rússneskumælandi þjóðir.
Þegar Sindri er spurður að lokum
um muninn á vertíðinni í ár og
fyrra, segir hann mikinn mun á
milli ára. ,,Vertíðin í ár er nátt-
úrulega mun minni en vertíðin í
fyrra en þá var heildarkvótinn
einhver 560.000 tonn en í ár er hann
173.000 tonn. En það er nú bara
þannig að engin loðnuvertíð virðist
vera eins.“
Sigurfinnur Viðar
Sigurfinnsson á Sigurði VE
Fjölskylduhagir: Kvæntur Ásu
Sigurðardóttir og eigum við fjögur
börn. Elínborg Eir, Sigurbjörg,
Ásdís Sara og Sigurfinnur Óskar.
Starf: Er háseti á uppsjávarskipinu
Sigurði VE.

Hvað er það skemmtilegasta við
loðnuvertíðina? Það er einhver
sjarmi við loðnuvertíðina sem er
svo erfitt að útskýra. Hann byrjar á
spennu um hversu mikill kvóti
verður gefinn út fram á þann dag
þegar verið er að berja upp síðustu
tonnin. Það er ólýsanleg tilfinning
að heyra kallið, „klárir“ þar sem
allir hlaupa á sinn stað á dekkinu.
Næstu augnablik einkennast svo af
þeirri spennu hvort kastið heppnist.
Draga þá nótina með sjópus í
andlitinu þar sem nótin er að fara á
staut og ekkert má klikka. Fá svo að
lokum að horfa á loðnuna renna
ljúlega í lestarnar á meðan menn
sleikja saltbragðið af vörunum.
Hvernig hefur gengið hjá ykkur á
loðnuvertíðinni í ár? Við höfum
fengið smjörþefinn af öllu. Gengið
vel einn túrinn og menn fyllst
bjartsýni en lent í því þann næsta að
margt klikki eins og veðrið eða
nótin rifni.
En það er allt partur af þessu og
það sem einkennir loðnuvertíðina.
Samt er þetta alltaf jafn gaman og
menn slá sér á brjóst til að láta
hlutina ganga upp í næsta túr.
Þegar þetta er skrifað erum við á
leiðinni heim með góðan skammt af
hrognaloðnu. Börðum upp í tveimur
köstum 800 til 900 tonn af
hrognaloðnu í kaldadrullu í gær
þegar veðrið gaf mönnum kannski
ekki vonir um góðan árangur. Þá
gekk allt upp og allir sáttir.

Makríl-, loðnu- eða síldarvertíð?
Erfitt að gera upp á milli þar sem
hvert hefur sinn sjarma. Makríllinn
á sumrin þegar veðrið er gott,
trollandi rétt við bæjardyrnar heima
og horfa á kvöldsólina setjast við
Eyjar.
Síldin náttúrulega silfur hafsins og
flögrandi silfurhreistur þegar verið
er að dæla. Það er hvorutveggja
veitt í flottroll. Ég held samt að
ekkert toppi það að veiða loðnuna í
grunnnót og elta hana á hraðri leið
meðfram ströndinni og horfa á
hrognin fljóta um þegar verið er að
dæla henni í lestarnar.
Júlíus Hallgrímsson
á Huginn VE

Fjölskylduhagir : Ég er kvæntur
Kristjönu og við eigum saman
Hallgrím og Ástu Björt.
Starf : Sjómaður á Huginn VE 55.
Hvað er það skemmtilegasta við
loðnuvertíðina ? Það er alltaf viss
spenna og sjarmi yfir loðnuvertíð-
inni.
Hvernig hefur gengið hjá ykkur
þessa vertíðina ? Það gekk mjög
vel hjá okkur að ná í þann litla
kvóta sem við áttum.
Makríl-, loðnu- eða síldarvertíð ?
Ég verð nú að segja loðnuvertíð,
hún er alltaf skemmtileg.
Skúli Már Gunnarsson
á Huginn VE

Fjölskylduhagir: Ég er kvæntur
Egle Mikalonyta.
Starf: Sjómaður á Huginn.
Hvað er skemmtilegast við
loðnuvertíðina: Það verður nú að
segjast alveg eins og er að það
skemmtilegasta við vertíðina er að
fá útborgað.
Hvernig gekk hjá ykkur þessa
vertíðina: Það hefur gengið mjög
vel hjá okkur, enda búnir með okkar
kvóta núna. Það er stutt úthald hjá
peyjunum og nú er maður bara
heima að glápa á enska boltann.
Loðnuvertíðin 2016 :: Slæmt veður sett strik í reikninginn :: Lítill kvóti:
Vesturganga gæti bjargað
vertíðinni þetta árið
:: Bjartsýnir á að næstu daga verði hægt að ná að klára leyfilegan kvóta
:: Reynt að fá sem mest verðmæti úr litlum kvóta
SædÍS EVa BirGiSdÓTTir
seva@eyjafrettir.is
Hvað segja sjómennirnir?
Myndir frá Loðnuvertíð:
Ólafur Óskar Stefánsson.