Fréttir - Eyjafréttir - 15.06.2016, Qupperneq 2
2 Eyjafréttir / Miðvikudagur 15. júní 2016
útgefandi: Eyjasýn ehf. 480278-0549.
ritstjóri: Ómar Garðarsson - omar@eyjafrettir.is.
Blaðamenn: Sædís Eva Birgisdóttir - seva@eyjafrettir.is
Sara Sjöfn Grettisdóttir - sarasjofn@eyjafrettir.is
Íþróttir: Guðmundur Tómas Sigfússon
- gudmundur@eyjafrettir.is
Ábyrgðarmaður: Ómar Garðarsson.
prentvinna: Landsprent ehf.
ljósmyndir: Óskar Pétur Friðriksson og blaðamenn.
aðsetur ritstjórnar: Strandvegur 47,
Vestmannaeyjum.
Símar: 481 1300 og 481 3310.
netfang: frettir@eyjafrettir.is.
veffang: www.eyjafrettir.is
Eyjafréttir koma út alla miðvikudaga. Blaðið er
selt í áskrift og einnig í lausasölu á Kletti, Tvistinum,
Toppnum,Vöruval,Herjólfi,Flughafnarversluninni,
Krónunni, Kjarval og Skýlinu.
Eyjafréttir eru prentaðar í 2000 eintökum.
Eyjafréttir eru aðilar að Samtökum bæjar-
og héraðsfréttablaða.
eftirprentun, hljóðritun, notkun ljósmynda og
annað er óheimilt nema heimilda sé getið.
Eyjafréttir
Hafrannsóknastofnun birti í
síðustu viku árlega skýrslu sína
um nytjastofna sjávar og
aflahorfur næsta árs. Þar kemur
fram að almennt megi segja að
flestir okkar nytjastofnar séu í
ágætu jafnvægi og nýting þeirra
hófleg, þannig að breytingar í
stofnstærð og ráðgjöf markast af
óvissu í vexti og stærð upp-
vaxandi árganga.
Samkvæmt aflareglu verður
aflamark þorsks 244 þúsund tonn á
fiskveiðiárinu 2016 til 2017 sem er
5 þúsund tonnum hærra en aflamark
yfirstandandi fiskveiðiárs. Er það
nokkru minna en vonast var til því
þorskur hefur verið áberandi mikill
á miðum allt í kringum landið.
Ástæðan að mati Hafró er lélegur
árgangur 2013 og spá um þyngd í
viðmiðunarstofni árið 2016, er
nokkuð lægri en verið hefur síðustu
árin. Munar þar 9 prósentum.
Aflamark ýsu verður 34,6 þúsund
tonn sem er 1800 tonnum lægra en
aflamark yfirstandandi fiskveiðiárs.
Þar gæti þó farið að rofa til því
sterkir árgangar eru í sjónmáli.
Ufsastofninn hefur stækkað
undanfarin ár og mælir Hafró með
að aflamark í ufsa verði 55 þúsund
tonn á næsta fiskveiðiári. Hrygn-
ingarstofn gullkarfa hefur vaxið ört
síðan 2004 og samkvæmt aflareglu
verður aflamark 52,8 þúsund tonn
eða 1800 tonnum hærra en ráðlagt
aflamark yfirstandandi fiskveiðiárs.
Síldarstofninn hefur orðið fyrir
áföllum síðustu árin. Gerir Hafró
ráð fyrir að hrygningarstofn síldar
verði í lágmarki 2017 vegna lítilla
árganga frá 2011 og 2012. Mælir
stofnunin með að aflamark verði 63
þúsumd tonn, eða 8 þúsund tonnum
lægri en fyrir yfirstandandi
fiskveiðiár.
Brýnt að auka
loðnurannsóknir
„Almennt má segja að þessar fréttir
hafi ekki komið á óvart. Aukning í
þorski er þó minni en við áttum von
á en stofninn er sterkur og vonandi
skilar það sér síðar í auknum
aflaheimildum,“ sagði Stefán
Friðriksson, framkvæmdastjóri
Ísfélagsins.
„Í okkar rekstri er það auðvitað
loðnan sem skiptir mestu, en eins
og áður hefur komið fram, hefur
ekki enn fundist nægjanlegt magn
til að gefa út upphafskvóta fyrir
næstu vertíð. Í því ljósi er brýnt að
auka loðnurannsóknir og að því er
stefnt hjá Hafró í samstarfi við
útgerðir og stjórnvöld.“
Ástand humarstofnsins
áhyggjuefni
Sverrir Haraldsson, sviðsstjóri í
bolfiski hjá Vinnslustöðinni, tók í
sama streng og Stefán, að fátt hefði
komið á óvart í skýrslu Hafró.
„Nema kannski helst það að margir
áttu von á að aukning í þorski yrði
eitthvað meiri, enda hefur víða
verið mjög mikið af þorski á
ferðinni,“ sagði Sverrir. „Það sáum
við í veiðununum og á vertíðinni að
óhemju mikið af þorski er hér við
Suðurströndina. Það verður samt að
hafa í huga að samanlögð aukning
síðustu fjögurra til fimm ára er
mikil, úr 160 þúsund tonnum í 244
þúsund fyrir næsta fiskveiðiár.“
Sverrir sagði ýsu enn virðast vera í
niðursveiflu vegna lélegrar
nýliðunar. „En það eru alltaf
talsverðar sveiflur í ýsunni. Karfi
eykst aðeins og stöðugleiki virðist
vera í ufsa. Menn hafa átt í
erfileikum með að veiða ufsa en það
getur tengst mörgu, t.d. mikilli
þorskgengd víða á miðunum.
Aðaláhyggjuefni okkar er ástand
humarstofnins en nýliðun í humri er
í sögulegri niðursveiflu. Það birtist
greinilega í veiðunum, lítið hefur
veiðist af smáum og millistórum
humri. Meðalstærð humars er
nálægt 110 grömm sem er langt yfir
langtímameðaltali. Kvótinn hefur
verið skorinn mikið niður undan-
farin ár, hann er núna rúm 60% af
því sem var 2010 til 2011. Það hafa
áður verið sveiflur í veiði og
stofnstærð en nýliðun er meira
áhyggjuefni nú en áður,“ sagði
Sverrir.
Ríkiskaup, fyrir hönd Vegagerð-
arinnar hefur óskað eftir
tilboðum í smíði nýrrar Vest-
mannaeyjaferju. Annars vegar
er óskað eftir tilboðum í smíði á
ferju til fólks-, bíla- og vöru-
flutninga milli Vestmannaeyja
og Landeyjahafnar. Hinsvegar
er óskað eftir tilboðum í
einkaframkvæmd, þ.e. að
þjónustuaðili eigi, og byggi ferju
í samræmi við lýsingu á ferjunni
hér að ofan og annist reksturinn
í tólf ár. Gert er ráð fyrir að ný
ferjan hefji siglingar síðla
sumars 2018.
„Það er náttúrulega mjög gott að
við séum núna loksins að ná þeim
stað í samgöngum sem við vorum á
2008 þegar seinast fór fram útboð á
ferju sem sigla átti í Landeyjahöfn,“
sagði Elliði Vignisson, bæjarstjóri
um útboðið. „Það er hreinlega búið
að taka átta ár og fleygja út um
gluggann í þessu með þeim hroða
sem það hefur leitt yfir samfélagið
hér í Eyjum, íbúa og atvinnulífið.
Við í bæjarstjórn höfum þó verið
að minna á að þótt nýja ferjan ein
og sér bæti vafalaust ástandið og sé
nauðsynleg forsenda þess að gera
samgöngur boðlegar þá er hún ekki
nægjanleg. Kálið er ekki sopið fyrr
en í ausuna er komið og mikilvægt
að tryggja að farið verði í að vinna
höfnina út úr þeim vanda sem að
henni snýr. Þar er mikilvægast að
tryggja nægt dýpi og halda áfram
að reyna að finna lausnir á erfiðri
aðkomu skipa.“
Elliði sagði líka ljóst að Eyjamenn
verði að fara að líta út úr þessum
hefðbundna Herjólfskassa hvað
samgöngur varðar. „Oft hefur
manni hreinlega dottið í hug hvort
reynandi væri að fá hingað öflugan
farþegabát og reka hann nánast eins
og um strætó væri að ræða. Bát
sem við ættum sjálf og réðum yfir.
Bát sem við gætum nýtt þegar
samfélagið hér telur þörf á án þess
að þurfa að fara langa boð- og
betlileið milli innanríkisráðuneytis,
Vegagerðar, Eimskipa og hvað þetta
allt heitir.
Bát sem rekinn væri á samfélags-
legum forsendum með það eina
markmið að þjónusta Eyjamenn og
gesti þeirra. Jafnvel þótt slíkur
bátur tæki bara farþega þá yrði
mikil bót í máli. Höfum hugfast að
þegar mest var fóru hátt í 30.000
farþegar um Bakkaflugvöll og það
var árið 2005, sem sagt löngu áður
en ferðaþjónustan tók það stökk
sem við síðan höfum séð. Nú-
verandi ástand er að minnsta kosti
ekki boðlegt og mikilvægt að skoða
alla fleti á þessu og útiloka ekkert,“
sagði Elliði.
Stefán Jónasson, oddviti Eyjalistans
í bæjarstjórn sagðist alfarið á móti
því að farið verði í einkafram-
kvæmd á smíði og rekstri Herjólfs.
„Um það erum við sammála í
bæjarstjórn og höfum ályktað
tvisvar gegn einkaframkvæmd,“
sagði Stefán. „Mín skoðun er að
Vegagerðin eigi að láta smíða skipið
og reka það. Allt þarf að vera uppi á
borðinu varðandi reksturinn þannig
að við getum séð hvort borð sé fyrir
báru til að lækka fargjöldin.“
Stefán sagðist hafa rætt við Sigurð
Inga Jóhannsson, forsætisráðherra
sem hafi sagt að gamli Herjólfur
verði til reiðu í tvö ár eftir að ný
ferja kemur. „Þeir eru til sem segja
nýja ferju henta illa til siglinga í
Þorlákshöfn og þarna er verið að
bregðast við því.“
Stefán sagði þetta hafa verið
langan og erfiðan feril og hann er
feginn að búið er að taka ákvörðun.
„Björnin er þó ekki unninn og
verðum við að treysta á að Vega-
gerðin haldi áfram endurbótum á
Landeyjahöfn og noti þessi þrjú ár
til þess. Heyrst hefur að útboðs-
ferlið klárist ekki fyrr en í desember
sem leiði til þess að ný ferja verði
ekki tilbúin fyrr en á vormánuðum
2019. Ég hef nokkrar áhyggjur af
þessu og vonandi verður þetta ekki
reyndin því ég vil sjá nýja ferju
sumarið 2018,“ sagði Stefán.
Ferjan á að vera um 70 metra löng,
14 metra breið, geta flutt allt að 73
fólksbíla og allt að 540 farþega og
vera með djúpristu um 2,8 m. Nýja
ferjan skal vera með tveimur
Azipull skrúfum sem gefur henni
mikla stjórnhæfni við erfiðar
aðstæður.
Til samanburðar þá getur Herjólfur
flutt innan við 56 bifreiða, allt að
525 farþega og er með djúpristu 4,2
m.
Hafrannsóknastofnun :: Ástand og aflahorfur á næsta fiskveiðiári:
Aflamark þorsks 244 þúsund
tonn og hækkar um 5000 tonn
:: Minna en vonast var til :: Almennt eru flestir nytjastofnar í ágætu jafnvægi
Ómar GarðarSSon
omar@eyjafrettir.is
Ómar GarðarSSon
omar@eyjafrettir.is
Útboð á Vestmannaeyjaferju :: Óskað eftir tilboðum í smíði og rekstur:
Nauðsynleg forsenda þess
að gera samgöngur boðlegar
:: En meira þarf til segir bæjarstjóri :: Vil sjá nýja ferju sumarið 2018, segir fulltrúi E-lista
Kap VE við loðnuveiðar.
Ferjan á að vera um 70 metra löng, 14 metra breið, geta flutt allt að 73
fólksbíla og allt að 540 farþega og vera með djúpristu um 2,8 m.