Fréttir - Eyjafréttir

Tölublað

Fréttir - Eyjafréttir - 13.07.2016, Blaðsíða 11

Fréttir - Eyjafréttir - 13.07.2016, Blaðsíða 11
11Eyjafréttir / Miðvikudagur 13. júlí 2016 „Ég vil fyrir hönd Kvenfélagsins Líknar bjóða ykkur velkomnar til Vestmannaeyja og vonast til að þið munuð eiga hér góðan tíma á fallegu eyjunni okkar sem hefur uppá svo ótal margt að bjóða. Það er gaman að vera kvenfélagskona og fá svona skemmtilegt verkefni, að taka á móti kvenfélagskonum af öllum Norðurlöndunum. Líknar- konur hafa lagt hug sinn og hjarta í að taka vel á móti ykkur svo að dvölin verði ykkur sem ánægju- legust. Það er ekki langur tími sem þið stoppið en það er von mín að kynni ykkar af Vestmannaeyjum muni leiða ykkur hingað aftur og þá kannski með fjölskyldu eða vinum. Hér er svo sannarlega margs að njóta og þið eruð ávallt velkomnar aftur,“ sagði Edda Ólafsdóttir formaður Líknar þegar hún tók á móti 110 norrænum konum sem tóku þátt í Norrænu sumarþingi kvenfélaga innan Nordens Kvinne- förbund, NKF, sem haldið var í Vestmannaeyjum dagana 17. til 19. júní sl. Eyjarnar allar og hafið umhverfis var vettvangur fundarins en hefðbundin fundastörf og fyrir- lestrar fóru fram í AKÓGES salnum. Fundargestir komu til Eyja á föstudeginum í sól og blíðu. Líknarkonur höfðu veg og vanda að skipulagningu og framkvæmd þingsins og buðu þær þingfulltrúum m.a. í kvöldmat í Líknarhúsinu. Konurnar fóru í bátsferð umhverfis Vestmannaeyjar. Skoðuðu hella, fuglalíf og fuglabjörg og komu við í Klettshelli. Farin var skoðunar- og fræðsluferð í rútu sem hófst með hádegisverði hjá Grími kokki í Skátaskálanum. Síðan er farið um magnaða náttúru Vestmannaeyja og áhrifarík saga eyjanna sögð. Litið var við í Eldheimum og ferðinni lauk með móttöku bæjarstjórnar Vestmannaeyja í Sagnheimum, byggðasafni. Fjölmargir áhugaverðir fyrirlestrar, tengdir þema þingsins, sem var Lifað í sátt við náttúruna, voru á dagskrá þingsins og ályktað var um aðstæður fæðandi kvenna á landsbyggðinni. Guðbjörg Ósk Jónsdóttir fyrr- verandi formaður Líknar flutti erindi um það þegar hún flutti með fjölskyldu sína, fyrirvaralaust, frá Eyjum þegar eldgos hófst í Heimaey 23. janúar 1973 og sagði frá tímunum meðan fjölskyldan flutti milli staða og bjó m.a. í hjólhýsi hluta þess tíma sem hún dvaldi uppi á landi. Sigrún Inga Sigurgeirsdóttir Líknarkona og félagsmálafrömuður flutti erindi Helgu Hallbergsdóttur menningamiðlara og safnstjóra og Hrefnu Valdísar Guðmundsdóttur þjóðfræðings um líf sex Eyjakvenna og baráttu þeirra og nána samvinnu við náttúruna. Kristín Linda Jónsdóttir, sálfræð- ingur og ritstjóri fjallaði um jákvæðan lífsstíl sem færir styrk, sátt, heilsu og hamingju og gaf hagnýt ráð tengd efninu. Þá var sýnd áhugaverð mynd sem Eva Káradóttir og Margrét Lilja Magnúsdóttir tóku saman um aðstæður í Vestmannaeyjum þegar Kvenfélagið Líkn var stofnað og um framlag félagsins og áhrif þess á samfélagið. Ásta Ragnheiður Jóhannesdóttir framkvæmdastjóri afmælisnefndar 100 ára kosningaréttarafmælis kvenna og fyrrv. þingforseti, ráðherra og þingmaður sagði í máli og myndum frá hvernig kosninga- réttarafmælis kvenna á Íslandi var minnst árið 2015. Í hátíðarkvöldverði í Akóges um kvöldið fóru fram formanna- skipti þar sem Kvenfélagasamband Íslands tók formlega við formennsku í NKF. Fráfarandi formaður, Elisabeth Rusdahl, lauk miklu lofsorði á alla framkvæmd þingsins og sagði það rós í hnappagat Líknarkvenna. Nýr formaður er Guðrún Þórðardóttir forseti KÍ sem tók við formennsku í Nordens Kvinneförbund, NKF, til næstu fjögurra ára. Edda formaður Líknar sagði að konurnar hafi verið ánægðar með hvernig til tókst. „Þingið tókst frábærlega vel og fengu Líknar- konur og allir Eyjamenn mikið hrós frá konunum fyrir frábærar móttökur og gott viðmót,“ sagði Edda. Áhyggjur af lækkandi fæðingartíðni Í ályktun þingsins segir að fæðinga- tíðni fari lækkandi á Norðurlönd- unum, þar af leiðir að öldruðum fjölgar svo að ójafnvægi í aldurs- dreifingu eykst. Margir þættir spila inní þessa þróun, s.s. tekjuóöryggi foreldra og fáar fæðingadeildir, sérlega í hinum dreifðari byggðum. Til að sporna við óheillaþróuninni telur sumarfundur NKF að aðstæður fæðandi kvenna þurfi að bæta og jafnframt að viðhalda gæðum þjónustunnar víða í hinum dreifðari byggðum og þar sem náttúruöflin geta verið óvægin á Norðurlönd- unum. Að lifa í sátt við náttúruna snýst m.a. um að viðhalda byggð um land allt. „Það er óásættanlegt að konur þurfi að dvelja langdvölum fjarri heimilum sínum meðan þær bíða fæðingar eða séu sendar milli sjúkrastofnana, þannig að börn þeirra fæðist jafnvel í misjöfnum veðrum úti á þjóðvegum. Slíkt er bæði áhættusamt og óöruggt fyrir konur og ófædd börn þeirra,“ segir í ályktuninni. Þing haldin á hverju sumri Norræn þing kvenfélaga eru haldin á hverju sumri, til skiptis á Norðurlöndunum og skiptast kvenfélagasambönd landanna um að halda þingin. Markmiðið með þingunum er að efla kynni og miðla reynslu meðal kvenfélagskvenna á Norðurlöndunum auk þess að taka ákvarðanir fyrir félagsheildina. Allar kvenfélagskonur eru velkomnar að sækja þingin sem auglýst eru innan kvenfélaganna og hjá Kvenfélagasambandí Íslands sem heldur utanum skráningar til þáttöku á þingin. Samhliða þingunum eru haldnir stjórnarfundir í NKF. Næsta þing NKF verður í Sandefjord í Noregi í júní 2017. Vel heppnað norrænt kvenfélagsþing í Vestmanneyjum: Að lifa í sátt við náttúruna og viðhalda byggð um land allt :: Er meðal þess sem kom fram í ályktun NFK :: Með 67.800 konur innan sinna vébanda ómar GarðarSSon omar@eyjafrettir.is Nordens Kvinne- forbund Nordens Kvinneforbund (NKF) var stofnað árið 1919. Þá undir nafninu Nordens Husmorforbund. Nordens Kvinneforbund samanstendur af Norges Kvinne- og familieforbund, Riksförbundet Hem och Samhälle, Kvenfélagasam- bandi Íslands, finnsk sænska Marthaförbundet, og finnska Marttaliitto. Samtals eru um 67.800 meðlimir innan vébanda samtakanna. Edda Ólafsdóttir formaður Líknar, Elísabeth Rusdalh formaður Norræna kvenfélagasambandsins NKF og Guðrún Þórðardóttir forseti KÍ og nýr formaður NKF. Alls mættu til Eyja 110 konur til þátttöku í Norrænu sumarþingi kvenfélaga innan NKF. Það er óásættanlegt að konur þurfi að dvelja langdvölum fjarri heimilum sínum meðan þær bíða fæðingar eða séu sendar milli sjúkrastofnana, þannig að börn þeirra fæðist jafnvel í misjöfnum veðrum úti á þjóðvegum. Slíkt er bæði áhættusamt og óöruggt fyrir konur og ófædd börn þeirra. ”

x

Fréttir - Eyjafréttir

Beinir tenglar

Ef þú vilt tengja á þennan titil, vinsamlegast notaðu þessa tengla:

Tengja á þennan titil: Fréttir - Eyjafréttir
https://timarit.is/publication/977

Tengja á þetta tölublað:

Tengja á þessa síðu:

Tengja á þessa grein:

Vinsamlegast ekki tengja beint á myndir eða PDF skjöl á Tímarit.is þar sem slíkar slóðir geta breyst án fyrirvara. Notið slóðirnar hér fyrir ofan til að tengja á vefinn.