Fréttir - Eyjafréttir - 13.07.2016, Blaðsíða 14
14 Eyjafréttir / Miðvikudagur 13. júlí 2016
Meistaramót Golfklúbbs Vest-
mannaeyja fór fram um helgina
þar sem keppt var í sex flokkum
hjá körlum: Meistaraflokki karla,
1. flokki karla, 2. flokki karla, 3.
flokki karla, öldungaflokki karla
55 til 69 ára og síðan öldunga-
flokki karla 70 ára og eldri. Hér
verður hlaupið hratt yfir sögu þar
sem við skoðum efstu menn
flokkanna. Í næsta blaði verður
betur fjallað um golfið í Eyjum.
Í meistaraflokki karla bar Gunnar
Geir Gústafsson sigur úr býtum en
hann átti alveg hreint magnaðan
þriðja dag. Par vallarins er 70 en
fyrsta daginn spilaði Gunnar á 74
höggum, var þá í 3. sæti, þann
næsta spilaði hann á 76 höggum og
var hann enn í 3. sæti. Hann tók
afgerandi forystu á þriðja deginum
þar sem hann spilaði á fjórum
höggum undir pari vallarins. Enginn
keppinautur hans komst nálægt því
þann daginn og þrátt fyrir slakan
fjórða dag endaði Gunnar Geir sem
sigurvegari með sex högga mun,
samtals á 15 höggum yfir pari.
Örlygur Helgi Grímsson var ekki
með í mótinu að þessu sinni en það
fylgir ekki sögunni af hverju. Hann
hefur oftar en ekki sigrað þetta mót
þar sem hann þekkir völlinn eins og
handarbakið á sér. Tveir ungir og
efnilegir kylfingar urðu næstir í
röðinni í meistaraflokki karla.
Daníel Ingi Sigurjónsson spilaði á
21 höggi yfir pari og það gerði
Lárus Garðar Long einnig. Daníel
spilaði jafnasta golfið þar sem tvö
högg voru munurinn á besta og
slakasta hringnum hans.
1. flokkur
Í 1. flokki karla sigraði Bjarki
Ómarsson á 24 höggum yfir pari.
Hann átti næst besta hring mótsins
þar sem hann spilaði á 67 höggum,
sem eru þrjú högg undir pari 2. dag
mótsins. Hina dagana spilaði hann á
11 yfir pari og átta yfir pari í
tvígang. Bjarki spilaði því betur en
þeir tveir sem voru með slakasta
skorið í meistaraflokki karla.
Næstir á eftir Bjarka í 1. flokki
voru þeir Arnsteinn Ingi Jóhannes-
son og Nökkvi Snær Óðinsson.
Nökkvi er einnig ungur og efnilegur
kylfingur sem er fæddur árið 1999.
Eftir slakan fyrsta dag átti Nökkvi
næst besta skorið á 2. og 3. degi og
síðan besta skorið á 4. deginum í 1.
flokki.
2. flokkur
Í 2. flokki karla sigraði Tryggvi
Kristinn Ólafsson á 351 höggi, eða
71 höggi yfir pari vallarins. Hann
spilaði mjög jafnt golf alla dagana
og var munurinn á besta og slakasta
hring hans einungis fjögur högg.
Magnús Gíslason og Friðrik Örn
Sæbjörnsson komu næstir í 2. flokki
á 80 og 82 höggum yfir pari.
3. flokkur
Í 3. flokki karla bar Unnar Hólm
Ólafsson sigur úr býtum en hann
spilaði á 80 höggum yfir pari, einu
höggi betur en Hannes Kristinn
Sigurðsson sem varð í 2. sæti, Andri
Steinn Sigurjónsson var síðan í 3.
sætinu á 84 höggum yfir pari.
Öldungaflokkur
Í öldungaflokki karla frá 55 ára
aldri til 69 ára aldurs spilaði Þórður
Hallgrímsson besta golfið. Hann lék
á 31 höggi yfir pari vallarins. Hann
átti tvo bestu hringina og þrjá af
bestu fjórum. Grétar Jónatansson og
Hallgrímur Júlíusson komu síðan
næstir 11 og 16 höggum á eftir
Þórði.
Flokkur 70+
Í flokki 70 ára og eldri sigraði
Sigurður Guðmundsson með sjö
högga mun en hann var á 50
höggum yfir pari, næstur kom
Ársæll Lárusson og síðan Sverrir
Halldórsson.
Kvennaflokkur
Þá var einnig keppt í tveimur
kvennaflokkum: GV kvennaflokki
og almennum kvennaflokki. Í GV
kvennaflokki sigraði Jóhanna Lea
Lúðvíksdóttir úr GR með yfir-
burðum. Hún lék á 67 höggum yfir
pari en hún var ellefu höggum á
undan Söru Jóhannsdóttur sem varð
í 2. sæti. Katrín Harðardóttir kom
næst í 3. sætinu.
Jóhanna Lea náði sér í þrjá fugla á
mótinu en tveir af þeim komu
síðasta daginn. Sara nældi sér í einn
fugl og Katrín náði í tvo.
Í almennum kvennaflokki voru sex
konur sem spiluðu bara tvo hringi
en þar var Freyja Kristín Rúnars-
dóttir á besta skorinu en hún lék
tvívegis á 133 höggum. Síðan voru
sjö konur sem léku alla fjóra
hringina í þeim flokki en þar var
Þóra Ólafsdóttir sterkust og lék hún
á 483 höggum, sjö höggum betur en
Sigurrós Úlla Steinþórsdóttir og tíu
höggum betur en Unnur Björg
Sigmarsdóttir.
Meistaramót GV fór fram um helgina
Gunnar Geir og Jóhanna Lea
Vestmannaeyjameistarar
Nýlega var ég í Eyjum og litaðist
aðeins um. Þá var ég spurður um
álit mitt á breytingum sem orðið
hafa á síðustu árum. Ég rifjaði upp
þær sem orðið höfðu á Heimaey á
síðustu áratugum og fyrir mér er
þetta augljósast:
1. Byggingaframkvæmdir við
Lautina þar sem lítið tillit er tekið
til eldri byggðar, sem þar var fyrir.
2. Ræktun sandbrekkunnar undir
Löngu, þar sem krakkar tóku áður
fimm metra tröllaskref á hlaupum
niður í fjöru. Það er örugglega
vandfundinn hlaupabraut skyld
sandbrekkunni sem var undir
Löngu.
3. Plöntun lúpínu í nýja hraunið,
þar sem gamburmosi hefði þakið
land líkt og austar á hrauninu. Að
þekja hraunið lúpínu er líkt og að
klæða sjómann í blúnduföt.
4. Byggingar í Herjólfsdal, sem
hlífa á við öllu raski.
5. Draslið fyrir framan Skiphellana
er til vansa. Sprangið er þjóðaríþrótt
í Eyjum. Eins er stór ritubyggðin í
bjarginu algert einsdæmi svo nálægt
mannaferð.
Allt land er viðkvæmt fyrir ágangi.
Þeim mun minna sem það er um
sig, þeim mun vandmeðfarnara
verður það.
Aftur fannst mér athyglisvert:
1. Hve snyrtileg Ísfélagshúsin eru
og flotinn slotlegur sem fyrirtækið
rekur.
2. Eldheimar komu mér þægilega á
óvart. Þetta er áhugverðasta safn á
Íslandi.
3. Sama er að segja um Byggða-
safnið. Ég þekki söfn á Íslandi, sem
drabbast hafa og koðnað. Vest-
mannaeyjasafnið er sívirkt og alltaf
jafn áhugavert.
4. Ánægjulegt er líka hve leik-
félagið dafnar enn. Þetta litla
samfélag verður að vera sjálfu sér
nóg um tónlist og afþreyingu og
heimamenn halda þeim takti.
5. Íþróttir eru snar þáttur í uppbygg-
ingu þrekfólks. Vestmannaeyingar
rækja þann þátt vel og sanna getu
sína þar sem þeir mæta til leiks.
Alla þessa þætti ætti að hafa í huga
þegar ákvarðanir eru teknar um
framkvæmdir og uppbyggingu
samfélagsins.
Yndislega Eyjan mín
Páll steingrímsson
Verðlaunahafar meistaramóts Golfklúbbs Vestmannaeyja 2016.
Verðlaunahafar í öldungaflokki ásamt stjórnarmönnum GV.Vestmannaeyjameistararnir Gunnar Geir og Jóhanna Lea.