Fréttir - Eyjafréttir - 21.09.2016, Blaðsíða 18
18 Eyjafréttir / Miðvikudagur 21. september 2016
Golf | Yngri golfarar fagna ::
Uppskeruhátíð Golfklúbbs
Vestmannaeyja
Síðastliðinn sunnudag var öllum
börnum og unglingum Golfklúbbs
Vestmannaeyja boðið til uppskeru-
hátíðar í blíðskaparveðri. Dagurinn
hófst á síðasta hring Þriðjudags-
mótaraðar Íslandsbanka en slík mót
hafa reglulega verið fyrir börn og
unglinga í sumar. Eftir hringinn var
öllum boðið í pylsur og vöfflur sem
foreldraráð GV sá um. Foreldrar og
systkini þátttakenda var einnig
boðið og skemmtu sér allir vel á
þessum fallega degi. Veitt voru
verðlaun fyrir mótaröðina sem og
fyrir meistaramót barna sem fram
fór í júlí. Íslandsbanki gaf vegleg
verðlaun en úrslit voru eftirfarandi:
Meistaramót barna
1. sæti Karl Jóhann Örlygsson
2. sæti Hannes Haraldsson
3. sæti Ólafur Már Gunnlaugsson.
Þriðjudagsmótaröð Íslandsbanka
Stúlknaflokkur
1. sæti Erika Rún Long.
Drengjaflokkur Rauðir teigar
1. sæti Hannes Haraldsson
2. sæti Karl Jóhann Örlygsson
3. sæti Arnar Gauti Egilsson.
Drengjaflokkur Grænir teigar
1. sæti Elís Þór Aðalsteinsson
2. sæti Andri Snær Gunnarsson
3. sæti Gabríel Ari Davíðsson.
Byrjendaflokkur á Litla vellinum
1. sæti Andri Magnússon
2. sæti Rebekka Rut Rúnarsdóttir
3. sæti Óli Már Haraldsson.
Formlega er sumarstarfi Golfklúbbs
Vestmannaeyja lokið en vetrar-
starfið hefst af krafti í nóvember
þegar vetraræfingataflan tekur gildi.
Handbolti | :: Sigurbergur Sveinsson sáttur í Eyjum :: Hér er allt til alls ::
Viljum berjast um allt sem er í boði
:: Vilji til að vera með besta lið landsins :: Sterkir leikmenn og umgjörð eins og hún gerist best ::
Við gátum ekki annað en spurt
Sigurberg Sveinsson út í fyrstu
kynni sín af Vestmannaeyjum
en hann kom til ÍBV fyrir
tímabilið. Margir ráku upp stór
augu þegar hann samdi við ÍBV
en hann virðist kunna vel við sig
á eyjunni fögru.
„Mér líst vel á þetta, menn eru
búnir að vera að leggja hart að
sér en á sama tíma búið að vera
skynsemi í þessu líka. Hópurinn
lítur vel út, breiddin meiri en ég
bjóst við og það er tilhlökkun að
fara að byrja mótið,“ sagði Sigur-
bergur um fyrstu mánuðina hér
í Eyjum.
Er þetta eitthvað öðruvísi en
Sigurbergur bjóst við? „Nei, alls
ekki, vissi að hverju ég gekk áður
en ég kom hingað og það hefur allt
staðist. Umgjörðin er góð og hér er
allt til alls og það er hugsað mjög
vel um okkur.“
Hvað var það helsta sem fékk
Sigurberg til að koma til Vest-
mannaeyja?
„Ég þekkti Adda (Arnar Pétursson,
þjálfara ÍBV) vel og líkaði hvernig
hann lagði þetta upp. Hér er
metnaður og vilji til að vera með
besta lið landsins, sterkir leikmenn
og umgjörð eins og hún gerist best.
Mér fannst spennandi að koma og
upplifa nýtt umhverfi hér heima,
kynnast og vinna með nýju fólki,“
segir Sigurbergur en hann hefur þá
komið á rétta staðinn. Mikið af
fólki vinnur fyrir félagið og vill allt
fyrir liðið gera.
Við erum allir að róa í
sömu átt
ÍBV hélt mörgum af sínum leik-
mönnum frá síðasta tímabili og
bættu við Sigurbergi og Róberti
fyrir tímabilið, hvernig er stemn-
ingin í liðinu? „Stemningin er
massa fín. Það eru allir að róa í
sömu átt en það er talsverð vinna
fyrir höndum til að komast þangað
sem okkur langar. Það er mikilvægt
að við séum þolinmóðir og séum
með það í huga að framundan er
langur vetur. Ég hlakka mikið til að
fá að spila við hlið Robba, hann er
frábær leikmaður og góður
drengur.“
Hefur liðið sett sér markmið?
„Það eru skýr markmið innan
liðsins, það er nokkuð ljóst að við
viljum berjast um allt það sem er í
boði.“
Ekki aðalatriðið að
fara aftur út
Ég spurði Sigurberg hvort hann
væri kominn heim til að vera, eða
hvort hann væri að hugsa út fyrir
landsteinana. „Ég er lítið að pæla í
því sem stendur. Mikilvægast er að
ná góðu tímabili og sjá svo hvað
gerist. Það er ekkert aðalatriði fyrir
mig að fara aftur út, heldur meira að
sýna mínar bestu hliðar hér í
Eyjum.“
Nú var Sigurbergur í Haukum
áður en hann fór út, vildu þeir ekki
fá hann fyrst hann var á leiðinni
heim? „Jú, og þetta var ekkert
sérstaklega auðveld ákvörðun.
Þegar upp var staðið fannst mér
meira spennandi að takast á við
nýja áskorun. Það verður gaman að
mæta þeim á laugardaginn og það
kemur lítið annað til greina en tvö
stig á heimavelli,“ sagði Sigur-
bergur og ekki laug hann, Eyja-
menn lögðu Hauka að velli með sex
marka mun 34:28.
Hvernig líst Sigurbergi á þjálfara-
teymi liðsins, þar eru Arnar
Pétursson og Sigurður Bragason
þjálfarar og Georg Ögmundsson
sjúkraþjálfari. „Mér líst virkilega
vel á þjálfarana og alla þá sem eru í
kringum þetta. Það er metnaður
fyrir því að gera vel og þeir virðast
vera að leita leiða til að verða alltaf
betri og betri, líkt og leikmenn sem
er mjög jákvætt. Sjúkraþjálfarinn
okkar er frábær, það gleymist
stundum í umræðunni,“ sagði
Sigurbergur um Georg Ögmunds-
son, sem verður líklega mjög glaður
að sjá þessi hlýju ummæli í sinn
garð.
Guðmundur T. SiGFúSSon
gudmundur@eyjafrettir.is
Sigurbergur Sveinsson gekk til liðs við ÍBV í sumar.
Myndarlegur hópur framtíðargolfara í Vestmannaeyjum.