Skessuhorn - 11.04.2018, Blaðsíða 20
MIÐVIKUDAGUR 11. ApRÍl 201820
Ingibjörg Inga Guðmundsdóttir læt-
ur af störfum sem skólastjóri Grunn-
skóla Borgarfjarðar í vor eftir rúman
áratug í starfi. Hún var ráðin skóla-
stjóri Varmalandsskóla árið 2007 og
hóf störf þá um haustið. Hún varð
síðan skólastjóri Grunnskóla Borg-
arfjarðar árið 2010 eftir samein-
ingu skólanna í uppsveitum Borgar-
fjarðar. Deildir skólans eru þrjár; á
Hvanneyri, Kleppjárnsreykjum og
Varmalandi. „Tilfinningar mínar eru
að sjálfsögðu blendnar. Ég á eftir að
sjá á eftir starfsstöðvum Grunnskóla
Borgarfjarðar, vinnufélögum, nem-
endum mínum og skólasamfélag-
inu í heild og öllu því góða fólki sem
ég hef fengið tækifæri til að vinna
með, auk allra annarra sem komið
hafa að skólamálum í Borgarbyggð
með einum eða öðrum hætti. Skól-
inn hefur átt hug minn allan. Tíma
mínum þessi ár hefur að langmestu
leyti verið varið í skólastarfið, þann-
ig að breytingin mun vonandi þýða
aðeins meiri frítíma og tækifæri til
að sinna áhugamálum,“ segir Ingi-
björg Inga í samtali við Skessuhorn.
Hún kveðst ekki hafa ákveðið hvað
hún tekur sér fyrir hendur en ætlar
að byrja á að taka sér frí. „En ég er
til í ýmislegt ef eitthvað spennandi
býðst. Ég hef fulla starfsorku, hald-
góða reynslu og menntun sem von-
andi nýtist mér og einhverjum öðr-
um ef verða vill,“ segir hún.
Þakklæti efst í huga
Ingibjörg hefur náð 95 ára regl-
unni svokallaðri, sem er saman-
lagður starfsaldur og lífaldur opin-
berra starfsmanna. Aðspurð kveðst
hún vissulega hafa velt því fyrir sér
að starfa áfram en komist að þeirri
niðurstöðu að stíga til hliðar. „Ég er
ánægð að hafa náð þessum tímamót-
um, það er ekki sjálfgefið. En mín
skoðun er sú að maður eigi ekki að
sitja of lengi í stjórnunarstöðu og
eiga það á hættu að tapa fluginu,“
segir hún. Þegar blaðamaður bið-
ur hana að líta yfir farinn veg segir
hún að þakklæti sé henni efst í huga.
„Þakklæti fyrir að hafa fengið tæki-
færi til að leiða skólastarfið með ein-
staklega góðu fólki, sjá nemendur
mína þroskast, ná settum markmið-
um og verða að góðum manneskj-
um,“ segir hún.
Fyrstu árin við kennslu starfaði
Ingibjörg innan veggja framhalds-
skóla. Þar kveðst hún hafa öðlast
mikilvæga reynslu, ekki síst vegna
reynslumikils samstarfsfólks sem var
ætíð reiðubúið að veita góð ráð og
stuðning. Hún segir það hafa ver-
ið töluvert stökk að færa sig yfir á
grunnskólastigið, því þar eru nem-
endur í skyldunámi en framhalds-
skóla sækja nemendur á eigin for-
sendum. „Ég þurfti einnig tíma til
að breyta kennsluháttum mínum
og huga að því að vinna meira með
yngstu nemendum skólans í gegnum
leik og þannig hugsa kennsluna upp
á nýtt. En allt saman tókst þetta nú
ágætlega,“ segir hún. „Þegar ég tók
við Varmalandsskóla á sínum tíma
vissi ég svo sem ekki hvað beið mín.
Þar tók á móti mér einvalalið starfs-
manna og góður foreldrahópur sem
létti fyrstu sporin,“ bætir hún við.
Röð breytinga
Þá var fjöldi nemenda í Varma-
landsskóla töluvert meiri en nú
er. Þeim fækkaði umtalsvert eftir
hrunið vegna breytinga í námi Há-
skólans á Bifröst, en börn frá Bif-
röst hafa oftast verið milli 60-70%
af heildarnemendafjölda skólans.
Ingibjörg segir að raunar hafi röð
ytri breytinga einkennt skólastarf-
ið á þeim tíma sem hún hefur verið
við stjórnvölinn. „Hrunið hafði þau
áhrif að krafa var gerð um sparnað í
rekstri skólanna, þeir þóttu of dýr-
ir fyrir sveitarfélagið. Árið 2010 var
ákveðið að sameina uppsveitaskól-
anna undir eina stjórn og ná þannig
fram hagkvæmni í stjórnunarkostn-
aði, en jafnframt að áherslur í skóla-
starfinu væru þær sömu fyrir deild-
irnar þrjár. Mér var falið að leiða
það verkefni og tók við stjórnun
nýs sameinaðs skóla undir nafni
Grunnskóla Borgarfjarðar skólaárið
2010-2011,“ segir hún. „Verkefnið
sem slíkt var mjög vel undirbúið og
starfið fór vel af stað. Skólabyrjun að
hausti var frestað um viku og tím-
inn nýttur til að móta stefnu, gildi
og framtíðarsýn, ásamt því að vinna
að skólanámskrá og fleiru sem þurfti
fyrir skólabyrjun. Að þessu verkefni
komu allir starfsmenn skólans, full-
trúar foreldra, fulltrúar nemenda
og fulltrúar fræðslumála í Borgar-
byggð. Hrönn pétursdóttir, sem þá
starfaði fyrir menntamálaráðuneyt-
ið, stýrði þessari vinnu með okkur.
Hún kunni vel til verka og var mik-
ilvægur hlekkur í þeirri vinnu. Það
er mín skoðun að þessi upphafs-
vinna hafi skipt sköpum um hvern-
ig til tókst með sameininguna. Það
er mikilvægt að fólk finni og viti að
rödd þess hafi áhrif og vægi í því að
móta hvernig skóla við viljum hafa,“
segir Ingibjörg. „En það hefur
ekki alltaf verið lygn sjór gagnvart
Grunnskóla Borgarfjarðar í stjórn-
sýslunni, því miður og hafa ver-
ið átök um starfsstöðvar skólans. Á
tímabili var mikið rætt um að leggja
niður Kleppjárnsreykjadeildina, síð-
an var á dagskrá að loka Hvanneyr-
ardeildinni. Af þessu hvoru tveggja
varð ekki, sem betur fer,“ segir hún.
„Mér finnst afar mikilvægt að menn
skoði af fullri alvöru og með ábyrg-
um hætti hvaða áhrif svona umræða
og gjörningar hefur á skólastarf-
ið. Þegar ró er yfir skólamálum þá
ganga hlutirnir miklu betur og orka
fólks fer í starfið en ekki í baráttu-
mál sem leiða menn oft á svig frá því
sem skiptir mestu máli; skólastarfið
sjálft, gildi þess og kosti litlu eining-
anna fyrir nemendur.“
Áhersla á samvinnu
Aðspurð kveðst hún alltaf hafa lagt
áherslu á að ná fram góðri samvinnu
starfsmanna í og á milli deilda á sín-
um tíma sem skólastjóri. „Með þeim
hætti að hver deild hefur fengið að
halda sinni sérstöðu, en með þeim
formerkjum að skólinn sé samstíga í
þeim þróunarverkefnum sem ákveð-
in hafa verið hverju sinni,“ segir
hún. „Ég hef lagt mig fram um að
fylgja stefnu skólans um að lögð sé
áhersla á nám við hæfi hvers og eins.
Fjölbreytni sé í námsmati og að það
sé uppbyggilegt fyrir hvern og einn.
Samstarf milli skólastiga sé gott og
að nemendum og starfsmönnum líði
vel á vinnustaðnum sínum en það er
ein af forsendum þess að árangur
náist í skólastarfi. Árangur á að snú-
ast um þá þekkingu, leikni og hæfni
sem nemendur öðlast á skólagöng-
unni,“ segir Ingibjörg og bætir því
við að einnig hafi hún lagt áherslu á
valgreinar nemenda. „Skólinn hefur
boðið upp á áhugasviðsval auk þess
að bjóða upp á val í unglingadeild
með nokkuð óhefðbundnum hætti.
Valið er í formi smiðjuhelga, þar sem
nemendur vinna tvær helgar yfir vet-
urinn en eru þess í stað einum tíma
skemur en gert er ráð fyrir í við-
miðum vikustunda. Þetta form val-
greina hefur vakið mikla athygli og
hafa aðrir skólar tekið þátt í þessari
vinnu með GBF um nokkurt skeið.
Einnig hafa nemendur GBF fengið
að taka þátt í erlendu samstarfi sem
ég tel afar mikilvægan vinkil í skóla-
starfinu. Þannig öðlast nemendur
sýn og aukna þekkingu á menningu
og hefðir erlendra samstarfsskóla. Ég
vil og hef reynt að hafa að leiðarljósi
með starfsmönnum að efla nemend-
ur í að setja sér árangurstengd mark-
mið og að þeir styrki sjálfsmynd sína.
Efla jákvætt viðhorf, því það er ein af
forsendum þess að bæta árangur. Ár-
angur hefst með hugarfari.“
Örar tækniframfarir
Hvað varðar skólastarfið sjálft seg-
ir Ingibjörg að stærstu breytingarn-
ar liggi í tækniframförum. „Breyt-
ingin hefur verið ótrúleg hvað varð-
ar möguleika við upplýsingaleit,
vinnslu og skil á verkefnum og alla
vinnu sem tengist skólastarfinu. Ég
held að hvorki ég né nokkur annar
geti sagt til um hvert tæknin á eftir að
leiða okkur í framtíðinni, en tímarnir
eru spennandi,“ segir hún. „Skólarn-
ir verða að vera vel tækjum búnir til
að fylgja þróun í tækni og allri vinnu
sem lýtur að henni. Starfsmenn skól-
anna verða að vera vel menntaðir til
að fylgja þeirri þróun eftir, því þarf
endur- og símenntun að vera lykil-
atriði í skólaþróun,“ bætir hún við.
Kennslan hefur enda tekið talsverð-
um breytingum í hennar tíð. „Sem
betur fer. Utanbókarlærdómur eins
og hann var í sinni mynd hefur
breyst og nú er upplýsinga- og þekk-
ingarleit ríkjandi með tilkomu tækn-
innar. Nú gúggla menn og fá svör við
öllu milli himins og jarðar á örstutt-
um tíma. En í því sambandi þarf að
kenna nemendum að vera gagnrýn-
ir og gleypa ekki við öllu sem kemur
upp og líta á það sem heilagan sann-
leika,“ segir Ingibjörg. „Einnig finnst
mér mjög jákvæð breyting að kenn-
arar vinni meira saman í teymum og
í samþættingu námsgreina og nýta
þannig þekkingu og styrkleika hvers
annars. Það er jákvætt bæði fyrir
kennara og nemendur. Þannig eiga
nemendur til dæmis meiri möguleika
á að leita aðstoðar hjá fleiri kennur-
um í hverri kennslustund. Kennslu-
stofur eru ekki lengur lokað svæði
fyrir einn kennara og eina bekkjar-
deild eins og áður var. Samvinna til
árangurs á að einkenna vinnu kenn-
ara og nemenda,“ segir hún.
Framtíðin björt í
menntamálum
„Margir halda því á lofti að allt fari
á verri veg í menntun barna og ung-
menna því ekkert sé eins og það var
áður fyrr. Ég er ósammála því, mér
finnst að nemendur fái fleiri og
skemmtilegri tækifæri í dag en oft
áður. Er ég viss um að framtíðin er
björt þeim í hag ef skólanum og for-
eldrum tekst að ganga í takt hvað
varðar ábyrgð, ástundun og vænt-
ingar um árangur,“ segir hún en bæt-
ir því við að auðvitað kalli framtíð-
in á breytingar. „Samfélagið allt hef-
ur tekið örum breytingum á síðustu
áratugum og atvinnulífið gerir sífellt
meiri kröfur til hvers einstaklings um
fjölbreytta hæfni á öllum sviðum.
Rannsóknir sýna að það sem atvinnu-
rekendur sækjast eftir er að starfs-
menn séu skapandi, búi yfir gagn-
rýnni hugsun og hæfni til að ráða
fram úr málum, hafi góða hæfni í
samskiptum og geti unnið með öðr-
um, búi yfir sveigjanleika og aðlög-
unarhæfni, sýni frumkvæði og sjálf-
stæði í vinnubrögðum. Við þessu
verða skólarnir að bregðast og reyna
eftir bestu getu að mennta nemend-
ur í takt við breytta tíma. Það seg-
ir sig sjálft að við þurfum að leggja
áherslu á skapandi greinar, hvetja
nemendur til samvinnu, efla gagn-
rýna hugsun og að kenna nemend-
um að setja sér markmið og vinna að
þeim,“ segir Ingibjörg. „Aldrei má
gleyma því, að til þess að nemend-
ur geti tekist á við krefjandi verk-
efni þarf að huga vel að heilsuefl-
ingu innan skólanna. Því betur sem
nemendur og starfsmenn eru líkam-
lega á sig komnir, því betur gengur
allt starf. Allir skólar ættu að vera
heilsueflandi skólar þar sem áhersla
er lögð á daglega hreyfingu, hollt og
gott mataræði, nægan svefn og geð-
rækt,“ segir hún og bætir því við að
hún telji að þar standi GBF sterkum
fótum. „Við erum heilsueflandi skóli
með áherslu á þessa hluti. Skólinn er
þátttakandi í leiðtogaverkefni sem
snýr að því að kenna nemendum að
taka af skarið, forgangsraða verkefn-
um og setja sér markmið. Þetta eru
hlutir sem snúa að því að styrkja þá
sem persónur,“ segir Ingibjörg Inga
að endingu.
kgk
Þakklát að hafa fengið að leiða skólastarf með góðu fólki
Ingibjörg Inga lætur af störfum hjá GBF eftir áratug sem skólastjóri
Ingibjörg Inga Guðmundsdóttir. Ljósm. úr safni.
Nemendur Hvanneyrardeildar GBF við æfingar á Kardemommubænum, sem
settur var upp á árshátíð skólans nú í vor. Ljósm. GBF.
Hópur nemenda úr Varmalandsdeild GBF í ferð í Víðgelmi síðastliðið vor, ásamt
gestum sínum frá Finnlandi. Ljósm. úr safni.
Krakkarnir í skólablaðsvali fengu Gísla Einarsson fréttamann í heimsókn á Klepp-
járnsreyki í vetur. Fór hann yfir undirstöðuatriði blaða- og fréttamennsku með
krökkunum. Ljósm. GBF.