Skessuhorn - 30.05.2018, Blaðsíða 42
MIÐVIKUDAGUR 30. MAÍ 201842
Horft yfir liðið ár og litið til þess nýjaSjómannadagurinn
Magnús Rafn Sigurbjörnsson er
ungur maður, fæddur árið 1993 og
alinn upp í Ólafsvík hjá foreldr-
um sínum, þeim Sigurbirni Sæv-
ari Magnússyni og Guðnýju Gísla-
dóttur. Þrátt fyrir ungan aldur hef-
ur Magnús undanfarin tvö og hálft
ár verið annar stýrimaður á flutn-
ingaskipinu Arnarfelli, sem siglir
milli Íslands og Evrópu. Hann er
einn af þeim sem ungur var færður
í appelsínugulan sjóstakk og hef-
ur verið í kringum sjómennsku alla
tíð. „Ég ólst upp við þetta. Pabbi
hefur lengi gert út á hinum ýmsu
bátum og ég hef róið með honum
á trillu síðan ég var strákur, aðal-
lega á grásleppu og skötusel. Síð-
an hef ég verið sjálfur á handfæra-
veiðum undanfarin ár, þá tekið
að mér að veiða á hinum og þess-
um bátum bæði í Stykkishólmi og
Ólafsvík. Ég hef alltaf verið í þessu
og var ekki gamall þegar ég ákvað
að leggja þetta fyrir mig. Það
var einhvern veginn aldrei nein
spurning,“ segir Magnús í sam-
tali við Skessuhorn. „En ég hugs-
aði samt með mér að ég yrði að
mennta mig ef ég ætlaði að fást við
þetta og ákvað þess vegna að skrá
mig í Stýrimannaskólann. Með-
fram náminu vann ég á dekkinu
á Arnarfellinu, fór með þeim upp
á Grundartanga sem aukamað-
ur og ýmislegt fleira. Síðan gerist
það eftir útskriftina að það vantar
stýrimann á bátinn. Ég sótti um og
var ráðinn. Þetta var eiginlega bara
heppni, það er alls ekkert sjálfgefið
að komast að sem stýrimaður beint
úr skólanum,“ segir Magnús.
Tveggja vikna sigling
Arnarfell þykir stórt flutninga-
skip á íslenskan mælikvarða. Það
er 138 metrar að lengd frá stefni
aftur í skut og áhöfnin telur ell-
efu manns. „Ég kann mjög vel við
skipið. Það er góður mannskap-
ur um borð, mórallinn góður og
mjög fínt að vinna þarna,“ segir
Magnús. Siglt er frá Reykjavík til
Evrópu með alls konar frakt á um
það bil tveggja vikna fresti. „Hefð-
bundinn túr byrjar á því að farið er
frá Reykjavík til Vestamannaeyja
og þaðan til Immingham í Bret-
landi og næst Rotterdam í Hol-
landi. Síðan er komið við í Cuxha-
fen í Þýskalandi og siglt þaðan í
gegnum Kílarskurðinn og áleiðis
til Árósa í Danmörku og svo yfir
til Varberg í Svíþjóð. Þaðan sigl-
um við heim til Íslands aftur með
viðkomu í Færeyjum. Þessi hring-
ur tekur að jafnaði 12 til 14 daga,“
segir hann.
Og þau eru ýmiss konar verkin
sem þarf að inna af hendi á sigl-
ingunni. „Verkefnin eru fjölbreytt
og skemmtileg, sérstaklega á dekk-
inu. Ef veðrið er gott þá er unnið
í viðhaldi á skipinu og við ýmsar
minniháttar lagfæringar. Við reyn-
um að sinna því jafnóðum eins og
hægt er. Svo er þetta mest reglu-
bundið eftirlit með öllum sjóbún-
aði og festingum gámanna. Ef allt
er eins og það á að vera og gengur
vel þá er vinnan bara frekar þægi-
leg,“ segir Magnús. „Við erum
tveir stýrimennirnir og skiptumst
á að stýra á sex tíma vöktum. Það
gildir það sama og á dekkinu, ef
veðrið er gott og allt gengur vel er
þægilegt að vera á siglingunni. Síð-
an er bara gaman að fá að ferðast
í vinnunni og geta aðeins skoðað
sig um í hinum og þessum borg-
um,“ segir hann og bætir því við
að sérstaklega þyki honum gam-
an að fara í gegnum Kílarskurð-
inn. „Þá er siglt inn í slúss, sem
er skipalyftan inn í skurðinn. Þá
koma tveir rórmenn um borð, en
það eru sem sagt menn sem gera
ekkert annað en að sigla skipum í
gegnum skurðinn. Hann er þröng-
ur, skip að mætast og þess vegna
sjá þeir um þetta. Þeir taka bara
við stjórninni og á meðan sinn-
ir maður verkefnum sem ekki er
hægt að sinna meðan maður er við
stýrið.“
Líður vel í Hólminum
Unnusta Magnúsar er Eydís Ösp
Þorsteinsdóttir. Saman eiga þau
tvö börn, tæplega þriggja ára dótt-
ur og fjögurra mánaða dreng. Fjöl-
skyldan er búsett í Stykkishólmi.
Magnús segir fyrsta kost fjölskyld-
unnar hafa verið að setjast að á
Snæfellsnesinu. „Við bjuggum í
Reykjavík meðan ég var í skól-
anum. Um leið og ég útskrifað-
ist vorum við farin,“ segir Magn-
ús og hlær við. „Fyrsti kostur var
alltaf að setjast að á Nesinu, annað
hvort í Stykkishólmi eða Ólafsvík.
Við keyptum okkur hús í Hólmin-
um 2016 og líður vel þar, það er
rólegur og góður bær. Eydís er úr
Stykkishólmi og þar býr fjölskyld-
an hennar. Síðan er stutt að skjót-
ast til Ólafsvíkur í kaffi til mömmu
og pabba,“ segir hann.
Magnús segir ekkert mál að aka
suður til Reykjavíkur frá Stykkis-
hólmi áður en Arnarfelli er siglt
frá bryggju. „Hver túr er um það
bil tvær vikur. Við vinnum tvo túra
í röð og fáum síðan frí í mánuð.
Það getur verið erfitt stundum að
vera svona lengi í burtu, sérstak-
lega með svona ung börn. En á
móti kemur gott frí og þá fær mað-
ur heilan mánuð heima með fjöl-
skyldunni,“ segir hann.
Fer á sjóinn í fríinu
Með tíð og tíma kveðst Magnús
ætla að verða sér úti um full skip-
stjórnarréttindi. Til þess þarf að
skila inn ákveðið mörgum siglinga-
tímum. „Draumurinn er að starfa
í þjónustusiglingum við olíubor-
pallana í Noregi, þar sem siglt er
með búnað, varahluti, mannskap
og vistir frá landi og milli borpall-
anna,“ segir Magnús. Aðspurður
hvers vegna markið sé sett á þær
siglingar stendur ekki á svörum:
„Það eru nú aðallega launin sem
heilla,“ segir hann og hlær við. „En
það getur reyndar verið skemmti-
legt að sigla á Norðursjónum, ég
neita því ekki. Á nóttunni lýsist
hann upp eins og jólasería, það
er svo mikið af borpöllum þar og
töluvert af bátum á ferðinni alltaf.
Þetta yrði að minnsta kosti alltaf
þess virði að prófa,“ segir Magnús.
Þangað til heldur Magnús áfram
að stýra Arnarfellinu. Hann var
einmitt á leið suður til Reykjavíkur
um borð í skipið þegar blaðamað-
ur hitti hann á Akranesi á miðviku-
dag. Siglt var upp á Grundartanga
um kvöldið og síðan frá Reykjavík-
urhöfn áleiðis til Evrópu að kvöldi
fimmtudags. Einn túr til viðbótar
fer Magnús áður en hann fær mán-
aðar frí frá júnílokum. Hvað ætl-
ar hann að gera í fríinu? Jú, fara
á sjóinn. „Ég verð á strandveið-
um á trillu í sumar og hlakka mik-
ið til. Ég hef mjög gaman af tril-
lusjómennskunni. Að vera einn að
dunda á litlum báti á Breiðafirðin-
um í góðu veðri er alveg frábært.
Mér finnst reyndar alltaf gott að
vera úti á sjó, hvort sem það er á
lítilli trillu eða flutningaskipi,“
segir Magnús Rafn Sigurbjörnsson
að endingu.
kgk
„Alltaf gott að vera úti á sjó“
- segir Magnús Rafn Sigurbjörnsson stýrimaður
Magnús Rafn Sigurbjörnsson.
Arnarfell, eitt flutningaskipa Samskipa. Magnús Rafn hefur verið annar stýrimaður á skipinu undanfarin tvö og hálft ár.
Ljósm. samskip.is.
Á siglingu um Kílarskurðinn í Þýska-
landi. Ljósm. úr einkasafni.