Skessuhorn - 13.06.2018, Blaðsíða 19
MIÐVIKUDAGUR 13. JÚNÍ 2018 19
Hið árlega Norðurálsmót í knattspyrnu fór fram á Akranesi
um helgina, 8.-10. júní sl. Mótið er fyrir drengi í 7. flokki, sem
eru á aldrinum sex til átta ára. Óformlegt upphaf mótsins var
venju samkvæmt skrúðganga sem farin var frá Stillholti áleiðis
í Akraneshöllina á föstudagsmorgun. Þar var mótið formlega
sett og fyrstu leikirnir voru spilaðir skömmu síðar.
„Mótið var mjög vel heppnað þrátt fyrir smá rigningu.
Aldrei hefur verið jafn fjölmennt á kvöldvöku og ég hef ekki
heyrt annað en allir hafi farið mjög sáttir og glaðir heim að
móti loknu,“ segir Hulda Birna Baldursdóttir, framkvæmd-
arstjóri Knattspyrnudeildar ÍA. Bryddað var upp á þeirri ný-
breytni á mótinu í ár að spila í fimm manna liðum í stað sjö.
Var það gert til að koma til móts við minni félög sem ekki hafa
alltaf náð tilsettum fjölda til að vera með lið. Því voru fleiri fé-
lög með að þessu sinni auk þess sem fyrirkomulagið gerir það
að verkum að hver drengur fékk að spila meira en áður. „Þetta
fyrirkomulag kom mjög vel út og ég hugsa að það sé komið til
að vera,“ segir Hulda Birna.
Forseti Íslands var á mótinu sem foreldri og vakti það lukku
margra viðstaddra. „Ég hitti forsetann á sunnudeginum en
hann var þarna með son sinn og tók þátt í öllu eins og hvert
annað foreldri. Hann var hæstánægður með mótið,“ segir
Hulda Birna. „Ég vil líka koma á framfæri þakklæti til allra
bæjarbúa og þeirra sem að mótinu komum. Þjónustuaðilar á
Akranesi eiga líka sérstakar þakkir skilið. Í mörgum verslun-
um voru tilboð á vörum og verslanir voru vel undir það búnar
að taka við þessum fjölda fólks í bæinn, sem var mjög mikil-
vægt fyrir alla,“ segir Hulda að lokum.
arg/ Ljósm. gbh/ kgk/ ki.
Norðurálsmótið vel heppnað þrátt fyrir smá vætu
Forsetinn vakti lukku annarra mótsgesta