Heimsmynd - 01.11.1987, Page 121
STEFNUR OG STRAUMAR
„Tengsl manneskjunnar við
guðdóminn eru í eðli sínu erótísk.“
„Um það leyti sem ég orti þessi ljóð
sótti mjög á mig kveneðli guðdómsins,
en dýrkunin á gyðjunni miklu var
ríkjandi fyrir daga gyðingdómsins fyrir
botni Miðjarðarhafsins." Bókaforlagið
Bókrún gefur nú út ljóðabók eftir
Ragnhildi Pálu Ófeigsdóttur, Andlit í
bláum vötnum, en áður hefur komið út
eftir hana ljóðabókin Hvísl hjá
Almenna bókafélaginu. Ragnhildur er
þriggja barna móðir, hefur lokið BA
námi í félagsfræði í Bandaríkjunum, en
auk þess lagði hún stund á hebresku
þar og í ísrael. „Flest ljóðin eru fimm
til sjö ára gömul, ort í Bandaríkjunum
og Israel.“
Ragnhildur snerist ung til kaþólskrar
trúar og segir að vangaveltur um
kveneðli guðdómsins hafi haft það í för
með sér að hún sé algjörlega á móti
líkama- og sál- dúalismanum sem er
rótgróinn í kristinni trú. „Ég er einnig
algjörlega á móti karl-konu
skiptingunni, og tel að karleðlið og
kveneðlið búi í hverjum einstaklingi og
guðdómnum sjálfum. Ég er jafnframt á
þeirri skoðun að tengsl manneskjunnar
við guðdóminn séu í eðli sínu erótísk og
þessi guðlegi neisti sem trúarbrögðin
tala oft um að sé í manneskjunni sé í
raun erótíkin.“
Að hennar áliti á femínisminn að
vera andleg og trúarleg hreyfing
jafnframt því að vera pólitísk og
félagsleg. „Við konur eyðum miklum
tíma og orku í að gera reynsluheim
karla að okkar, en það getur aldrei
tekist. Flest tákn hins kristna
menningarheims eru sprottin úr
reynsluheimi karla, og því er mikilvægt
að við endurtúlkum þessi hefðbundnu
tákn með tilliti til okkar eigin
reynsluheims sem sprottinn er úr
kvenlegri reynslu. Og því má segja að
trúin á gyðjuna sé tákn hinna nýju
tíma.“
Hver eru uppáhaldsskáld Ragnhildar
Pálu? „Fyrst og síðast Sappho og svo
bandarísku skáldkonurnar Sylvia Plath
og Adrienne Rich.“
HEIMSMYND 121