Tímarit hjúkrunarfræðinga - 2016, Blaðsíða 6

sveitafélaga og er vonast til að þeirri vinnu ljúki nú í apríl. Jafnframt
er hafin vinna við verkefni sem byggist á bókun 3 í dómssátt með
gerðardómi milli fjármála- og efnahagsráðherra f.h. ríkissjóðs og
FÍH frá ágúst 2015. Um er að ræða verkefni sem byggist á því að
teknar verða upp frammistöðugreiðslur til hjúkrunarfræðinga. Í þessu
verkefni felast tækifæri fyrir hjúkrunarfræðinga. Nú árið 2016 verður
ráðstafað fjármagni til þriggja stofnana: Heilsugæslu höfuðborgar-
svæðisins, Heilbrigðisstofnunar Suðurlands og Landspítala en aðrar
heilbrigðisstofnanir munu síðan fylgja í kjölfarið á árunum 2017 og
2018. Um er að ræða nýja nálgun í launagreiðslum til hjúkrunar-
fræðinga. Útfærsla á verkefninu á hverri og einni stofnun er í höndum
samstarfsnefnda sem í eiga sæti hjúkrunarfræðingar og starfsmenn
kjarasviðs FÍH ásamt fulltrúum stofnunar. Ég vil hvetja hjúkrunar-
fræðinga til að taka þátt í þessu verkefni með opnum huga þar sem
í því felst, að mínu mati og félagsins, ný og spennandi tækifæri til
handa hjúkrunarfræðingum.
Fram undan er aðalfundur FÍH og verður hann haldinn á Grand
hótel föstudaginn 20. maí næstkomandi. Miklar lagabreytingar eru
fyrirhugaðar og vonast ég til að sjá sem flesta hjúkrunarfræðinga
mæta og taka þátt enda fer aðalfundur með æðsta valdið í málefnum
félagsins. Allir félagsmenn með fulla aðild eða fagaðild geta haft
atkvæðisrétt með því að skrá sig til þátttöku á fundinum á heimasíðu
félagsins www.hjukrun.is eigi síðar en 13. maí. Með þátttökunni
leggið þið ykkar af mörkum til að gera félagið að enn öflugra fag- og
stéttarfélagi sem vinnur að málefnum okkar. Þátttakan er jafnframt
grundvöllurinn fyrir því að okkur takist vel til í starfsemi félagsins
sem á að þjóna okkar hagsmunum og starfa í okkar þágu.
Eins og sjá má er af nógu að taka í starfsemi félagsins og hlakka
ég til starfsins. Ég vil hvetja ykkur til að vera vakandi yfir heimasíðu
félagsins og fylgjast jafnframt með félaginu á Facebook. Einnig getið
þið haft samband við mig ef eitthvað er með því að senda tölvupóst á
netfangið gudbjorg@hjukrun.is.
Að lokum vil ég þakka fráfarandi formanni, Ólafi G. Skúlasyni,
fyrir mjög vel unnin störf í þágu hjúkrunar og hjúkrunarfræðinga
undanfarin ár og óska honum alls hins besta í nýju starfi og þeim
verkefnum sem hann mun taka sér fyrir hendur.
Formannspistill03/03