Tímarit hjúkrunarfræðinga - 2016, Blaðsíða 25

Fólkið04/05
Hérlendar og erlendar rannsóknir á körlum, sem sækja í nám í
hjúkrun, benda eindregið til að það sé ekki annað sem laðar karla að
því námi en það sem laðar konur að: reynsla af umhyggjustörfum,
að þekkja einhvern sem starfar innan heilbrigðisgeirans og hvatning
frá einhverjum nákomnum. Væntingar karlanna til starfsins virðast
ekki heldur skilja sig frá væntingum nemenda í heild. Umhyggjan og
löngunin til að hjálpa öðrum er efst á listanum.
Kynjaskiptur vinnumarkaður er vandamál af mörgum ástæðum.
Kynjaskiptingin dregur úr sveigjanleika markaðarins, viðheldur
hugmyndum um eðlislæg einkenni karla og kvenna og er að öllum
líkindum ein af megin ástæðum viðvarandi launamunar karla og
kvenna. Þróun síðustu
áratuga í flestum vestræn-
um ríkjum og sérstaklega
hinum norrænu hefur
verið sú að störfum, þar
sem karlar eru í miklum
meirihluta, fækkar en
engin breyting verður á
störfum þar sem konur eru
í miklum meirihluta eða
þá að hlutfall kvenna eykst
enn frekar.
Á þessu eru undantekningar því t.d. hefur Norðmönnum tekist
að margfalda fjölda karla á leikskólum með margþættum og sam-
tvinnuðum aðgerðum og þá á þeim forsendum að um gæðamál sé að
ræða. Leikskóli með starfsmenn af báðum kynjum sé einfaldlega betri
leikskóli en sá sem aðeins hefur annað kynið starfandi. Það er reyndar
nokkuð samdóma niðurstaða rannsókna á mismunandi vinnustöðum
að betri sé fjölbreytileiki en fábreytni í hópi starfsmanna og það á
ekki hvað síst við um kynjablöndun. Virkni og samskiptahættir batna
á heildina litið og vellíðan starfsmanna eykst. Hví skyldi það ekki líka
eiga við innan hjúkrunar?
Erfitt er að sjá nokkra skynsamlega ástæðu fyrir því að karlar læri
ekki hjúkrunarfræði. Að öllum líkindum er meginskýringin falin í því
að það hvarflar einfaldlega ekki að þeim. Sé svo ætti ekki að þurfa
að vera verulegum erfiðleikum háð að þoka fjölda þeirra upp á við.
„Erfitt er að sjá nokkra skyn-
samlega ástæðu fyrir því að
karlar læri ekki hjúkrunarfræði.
Að öllum líkindum er megin-
skýringin falin í því að það
hvarflar einfaldlega ekki að
þeim.“