Feykir - 13.06.2018, Blaðsíða 10

Undanfarin ár, allt frá
árinu 2000, hefur Iðja
- dagþjónusta staðið
fyrir reiðþjálfun fatlaðrs
fólks sem farið hefur
fram í Reiðhöllinni
á Sauðárkróki. Frá
upphafi hefur Ingimar
Pálsson lagt til hross
til þjálfunarinnar og
undanfarin ár hefur
dóttir hans, Inga
Dóra, einnig komið
að þjálfuninni sem
reiðkennari.
Í vetur barst reið-
þjálfuninni sannkallað
þarfaþing í hendur þegar
keypt var lyfta, til þess
ætluð að hjálpa einstakl-
ingum sem ekki hafa
líkamlega færni til að
komast hjálparlaust á
bak. Lyftan, sem var
tekin í notkun í byrjun
febrúar, var keypt fyrir
gjafafé frá Sambandi
skagfirskra kvenna,
Rebekkustúkunni Eir á
Sauðárkróki og peninga-
gjöf frá einstaklingum
sem ekki vilja láta nafns
sín getið. Er þetta að
vonum mikil bragarbót
sem léttir starfsfólki
störfin, minnkar líkam-
legt álag þar sem nú þarf
ekki lengur að lyfta
fólkinu á bak og einnig
eykur lyftan öryggi þess
til muna.
Jónína Gunnarsdótt-
ir, forstöðumaður Iðju,
segir að reiðþjálfuninni
sé skipt í tvo hópa og fari
hvor þeirra á bak einu
sinni í viku. Auk þess
nýta nemendur frá
grunnskólanum þjálfun-
ina sem Iðjan heldur
utan um en nemendum
fylgir starfsfólk frá skól-
anum.
Jónína segir gildi
þjálfunarinnar vera
margþætt og aðferðin
hafi verið notuð víða um
heim með athyglisverð-
um árangri. Þjálfunin
gengur í stórum dráttum
út á að nýta sér hreyf-
ingar hestsins til að
þjálfa upp vöðva og auka
jafnvægi og samhæfingu
líkamans, bæta líkams-
vitund og stuðla að
bættri sjálfsmynd og
Ný lyfta tekin í notkun í Reiðhöllinni á Sauðárkróki
Stórbætt aðstaða til
reiðþjálfunar fatlaðs fólks
Guðjón og Tinna Rut á baki. Oddný, Inga Dóra og Ingimar ganga með.
auknu sjálfstrausti.
Einnig hefur nálægð
hests og manns mikið
gildi og þykir íslenski
hesturinn sérlega vel
fallinn til reiðþjálfunar
fatlaðs fólks og ræður
þar bæði bygging hans
og eðliseiginleikar.
Það voru Viggó Jóns-
son, stjórnarformaður
Flugu, ásamt starfs-
mönnum Vélaverkstæðis
KS sem unnu að upp-
setningu lyftunnar og
kann Iðjan þeim bestu
þakkir fyrir. /FE
Sævar Örn Guðmundsson á baki.
Guðjón Ólafur Einarsson.
Hjalti Gunnlaugsson kominn á bak.
Oddný Ragna, starfsmaður Iðju, og Inga Dóra reiðkennari nota lyftuna til
að hjálpa Tinnu Rut Sigurbjörnsdóttur á bak.
10 23/2018
Rögnvaldur S. Valbergsson / orgelleikari
Væri til í að gera aðra
tilraun til að komast á
tónleika með McCartney
( TÓN-LYSTIN ) oli@feykir.is
Það er Rögnvaldur S. Valbergsson organisti í
Sauðárkrókskirkju sem svarar Tón-lystinni að
þessu sinni. Röggi er fæddur 1956 og hefur víða
komið við í tónlistinni í gegnum tíðina. Hann ólst
upp í Fljótunum, sonur Valbergs Hannessonar
kennara og skólastjóra og Áshildar M. Öfjörð.
Um hvert hljóðfærið hans sé segir Röggi: „Það
er nú það, ætli ég þykist ekki helst vera orgel-
leikari, uppáhaldshljóðfæri er náttúrulega
Hammond orgelið.“
Spurður um hver helstu afrek hans á tón-
listarsviðinu séu segir hann af alþekktu lítillæti:
„A, ja nú veit ég ekki, búinn að músisera víða og
með mörgum. Kannski best að vera ekkert að gera
upp á milli.“ Það kemur því í hlut umsjónarmanns
Tón-lystarinnar að nefna að Rögnvaldur hefur í
árafjölda kennt við Tónlistarskóla Skagafjarðar
og verið organisti við Sauðárkrókskirkju frá því
á síðustu öld. Þá hefur hann vitaskuld spilað
með Hljómsveit Geirmundar Valtýssonar og fleiri
hljómsveitum, stjórnað Karlakórnum Heimi yfir tvær
vertíðir en Röggi hefur stjórnað nokkrum kórum
í gegnum tíðina auk þess sem hann hefur komið
að tónlistarflutningi hjá Leikfélagi Sauðárkróks og
svona mætti lengi áfram telja.
Hvaða lag varstu að hlusta á? Trúlega eitthvað
sem ég er að vinna með, ekki viss, það er svo margt
í gangi.
Uppáhalds tónlistartímabil? Um 1960 og upp
úr því. Þá komu Bítlarnir og allt hitt í kjölfarið.
Upp úr 1970 er tímabilið þegar ég fer að hlusta á
poppmúsík fyrir alvöru, en svo hlusta ég auðvitað á
miklu fleira, t.d. barokk músík og klassík.
Hvaða tónlist fær þig til að sperra eyrun þessa
dagana? Ekkert sérstakt, hlusta nú ekki mikið á
músík nema ég þurfi að vinna með eitthvað lag.
Hvers konar tónlist var hlustað á á þínu heimili?
Allt mögulegt, helst það sem hljómaði á gömlu
gufunni.
Hver var fyrsta platan/diskurinn/kasettan/
niðurhalið sem þú keyptir þér? Ekki viss, kannski
plata með Credeence Clearwater Revival.
Hvaða græjur varstu þá með? Það hlýtur að hafa
verið Garrard plötuspilari og Telefunken útvarps-
tæki sem var til á heimilinu, eignaðist reyndar
kasettutæki um fermingu og þá tók maður upp úr
útvarpi o.fl.
Hvaða músík var helst blastað í bílnum þegar þú
varst nýkomin með bílpróf? Mig minnir að það hafi
bara verið útvarpstæki í bílnum á heimilinu svo það
hefur bara verið Rás 1, ég eignaðist sjálfur bíl seint.
Hvaða lag getur eyðilagt fyrir þér daginn? Ekki
viss, ef mér leiðist eitthvað slekk ég bara á því.
Reyni nú samt að vera frekar fordómalaus.
Hvert er fyrsta lagið sem þú manst eftir að
hafa fílað í botn? Sennilega Molina með CCR.
(Credeence)
Þú heldur dúndurpartí í kvöld, hvað læturðu
hljóma í græjunum til að koma öllum í stuð?
Bara Bítlana.
Þú átt þess kost að fara hvert sem er í heiminum
og skella þér á tónleika. Hvert færirðu, á hvaða
tónleika og hvern tækirðu með þér? Ætli ég
myndi ekki taka konuna með mér og skella mér
á Paul McCartney. Við vorum búin að kaupa miða
á tónleika með honum í Danmörku árið 2011, en
þeir voru slegnir af vegna tónleika annarsstaðar hjá
honum, svo ekki varð af því þá.
Hvaða tónlistarmaður hefur þig dreymt um að
vera? Það er nú það, ég myndi alveg vilja hafa
spilagetuna og færnina frá Rick Wakeman og Keith
Emerson en ekki viss um að ég vildi vera þeir í raun,
annar farinn yfir móðuna miklu og hinn orðinn ansi
útlifaður að sjá.
Hver er að þínu mati besta plata sem gefin hefur
verið út? Ég held ég treysti mér ekki til að svara
þessu, kannski einhver Bítlaplatan eða Night At
The Opera með Queen. Svo fnnst mér hljómsveitin
Chicago alltaf afar góð.
Sex vinsælustu lögin á Playlistanum þínum? Er
reyndar ekki með neitt svoleiðis, en ef svo væri þá
myndi ég skoða, t.d. In My Life með Bítlunum, If
You Leave Me Now með Chicago, Living Sin með
Emerson Lake and Palmer, Grand Hotel með Procol
Harum, Love Of My Life með Queen og kannski Too
Old To Rock’n Roll með Jehtro Tull.
Rögnvaldur í góðum fíling. MYND ÚR EINKASAFNI