Feykir - 25.07.2018, Blaðsíða 12
Ert þú búinn að heilsa upp á Feyki.is?
Nú er netmiðillinn okkar ferskari en
nokkru sinni og lúkkar fínt í tölvunni,
spjaldtölvunni og símanum! Kíktu á... Feykir.is
Ertu með fréttaskot, mynd eða
annað skemmtilegt efni í Feyki?
Hafðu samband. Síminn er 455 7176
og netfangið feykir@feykir.is
29
TBL
25. júlí 2018 38. árgangur
Frétta- og dægurmálablað á Norðurlandi vestra : Stofnað 1981
Langar í ærslabelg á Krókinn
María Ósk skrifaði sveitarfélaginu bréf
Kæra sveitarfélag.
Það vantar hoppubelg hingað á Krókinn, bæði fyrir
okkur og gestina sem koma hingað á tjaldsvæðið.
Það er ekkert í boði fyrir tjaldgestina okkar. Það eru
ekki allir með bílpróf sem geta farið til dæmis til
Hofsóss eða Varmahlíðar. Það er mikill áhugi barna
og unglinga hér á Króknum. Það væri gaman að fá
hoppubelg hingað á Krókinn.
Þannig hljóðar bréf Maríu Óskar Ólafsdóttur á
Sauðárkróki til Svf. Skagafjarðar sem hún afhenti í
Stjórnsýsluhúsinu sl. fimmtudag. Bréfið var keimlíkt
öðru sem hún sendi félags- og tómstundanefnd í
nóvember sl. Nefndin samþykkti að kanna málið með
jákvæðum huga og óskar eftir að það verði skoðað í
tengslum við fjárhagsáætlun þessa árs. Ekki er þess þó
sérstaklega getið í áætluninni að koma upp ærsla-
belgnum svo María ákvað að skrifa sveitarfélaginu
aftur.
„Mér finnst ekkert vera gert fyrir tjaldstæðisgesti
og þetta er komið víða um landið fyrir utan okkur. Það
myndi gleðja alla krakka sem búa hér að fá hoppubelg,
annars þurfum við alltaf að fara til Varmahlíðar eða
Hofsóss,“ segir María aðspurð um framtakið. Hún
segist vera búin að prófa belginn í Varmahlíð en ekki á
Hofsósi og það fannst henni gaman.
Hún segist hafa skrifað bréfið í von um að sveitar-
félagið sýndi málinu áhuga og gera eitthvað til að
draumur hennar yrði að veruleika.
Eins og fram kemur í bréfinu er María ekki með
bílpróf og kemur ekki til með að öðlast það vegna
fötlunar sinnar. Hún bendir á að krakkar á svipuðu
reki hafi ekki aðgang að hoppubelg nema með
tilstuðlan foreldra sinna sem geta skutlast fram í
Varmahlíð eða í Hofsós og hoppað þar. Hún segist
heppin að hafa farið oft með foreldrum sínum sem og
með skammtímavistun en hana langar oftar að hoppa
og er líka að hugsa um þá krakka sem gista tjaldsvæðið
og hafa ekkert við að vera. „Ég bind vonir við það að ný
sveitarstjórn taki þetta fyrir og framkvæmi og ég verð
mjög ánægð og á eftir að nota þetta mikið,“ segir María
sem vinnur á leikskólanum Ársölum fram að hádegi.
Til þess að hafa eitthvað fyrir stafni eftir vinnu fer hún
í ræktina með mömmu sinni en segist frekar vilja
hoppa á ærslabelg.
Þegar hún er spurð hvað sé það skemmtilegasta
sem hún gerir kemur löng þögn, svo svarar hún: „Það
er ekkert að gera fyrir mig. Göngutúr og hjóla kannski
og núna er skammtímavistun lokuð og þá er ekkert að
gera,“ segir María að lokum og skorar á sveitar-
stjórnina að koma þessu upp sem fyrst. /PF
María Ósk afhendir Kristínu Jónsdóttur, skjalastjóra, bréfið góða en líklega verður erindið ekki tekið fyrir fyrr
en í ágúst þar sem sveitarstjórnarfulltrúar eru í sumarfríi. MYNDIR: PF
Þátttökuskilyrði
fyrir Norður-
strandarleið
Ferðaþjónusta á Norðurlandi vestra
Á vef Markaðsstofu Norðurlands má nú finna skýrslu
þar sem farið er yfir skilyrði til þátttöku í verkefninu
um Norðurstrandarleið (e. Arctic Coast Way).
Norðurstrandarleið hefur verið í þróun síðustu
misseri en með henni á að skapa nýtt aðdráttarafl á
Norðurlandi og kynna landshlutann sem einstakan
áfangastað.
Norðurstrandarleið fer um alla strandlengjuna, frá
Hvammstanga í vestri til Bakkafjarðar í austri. Hún verður
um 800 kílómetra löng með 21 bæ eða þorpi og fjórum
eyjum sem auðveldlega er að hægt að komast út í með bát
eða ferju. Ferðafólk sem fer þessa leið fær tækifæri til að ná
betri tengslum við náttúruna, litskrúðugt menningarlíf og
einnig hið daglegt amstur þeirra sem búa í nálægð við
norðurheimskautsbauginn.
Íslensk ferðaþjónustufyrirtæki á svæði Norðurstrandar-
leiðar þurfa að uppfylla nauðsynleg skilyrði til að geta gerst
meðlimir. Meðlimir þurfa að vera skráð fyrirtæki og eiga
aðild að Markaðsstofu Norðurlands, hafa ótvíræð tengsl við
norðurströnd Íslands, ábyrgjast samfelld samskipti allan
ársins hring og stefna að því að fyrirtækin séu opin allan
ársins hring, vinna að aukinni sjálfbærni innan fyrirtækja
sinna og sækja árlega vinnustofu til að skiptast á reynslu-
sögum og bæta innri tengsl.
Fyrirtækin þurfa að vera á skilgreindri leið Norður-
strandarleiðar, vera sjávarmegin við skilgreinda akstursleið
eða vera innan fjögurra kílómetra frá skilgreindri leið og
bjóða helst upp á útsýni til hafsins.
Þau fyrirtæki sem ekki uppfylla skilyrði um landfræðileg
viðmið geta tekið þátt í verkefninu með því að bjóða upp á
einstakar upplifanir (e. Hero experiences) í pakkaferðum
eða samstarfi með meðlimum Norðurstrandarleiðar.
Meðlimir Norðurstrandarleiðar skipta með sér markaðs-
kostnaði til að tryggja sjálfbæra og örugga markaðssetningu
verkefnisins. Þeir styðja markaðssetningu Norðurstrandar-
leiðar með því að nota kennitákn og nafn leiðarinnar í sinni
markaðssetningu, en kennitáknið gefur til kynna aðild að
samtökunum.
Stefnt er að því að opna Norðurstrandarleiðina form-
lega á Degi hafsins þann 8. júní 2019. /LAM
Við norðurströndina.
MYND: FE
Bréf Maríu er skrifað af einlægni og að sjálfsögðu handskrifað.