Fréttabréf Öryrkjabandalags Íslands - 01.09.1999, Blaðsíða 28

aðstöðu og krafan um mannsæmandi
lífskjör og aðstæður, aldrei gleymast.
I almennum umræðum á fundi
Norræna ráðsins um málefni fatlaðra
sl. vor komu einmitt fram áhyggjur af
því að niðurskurður til velferðarmála
á undanförnum árum t.d. á Islandi og í
Finnlandi, hefði bitnað hart á hópum
eins og öryrkjum og öldruðum. Það léti
hins vegar á sér standa að þeir fengju
að njóta góðs af batnandi þjóðarhag
þegar hann kæmi til sögunnar á nýjan
leik. Menn mega m.ö.o. aldrei vera svo
uppteknir af glímunni við einstök
viðfangsefni, svo mikilvæg sem þau
eru, að þeir missi sjónar á stóru
málunum sem eru almennar aðstæður
og kjör öryrkja og réttindabarátta
þeirra við hliðina á öðrum hópum sem
svipuðu máli gegnir um í samfélaginu.
Þó að við á Norðurlöndum hrósum
okkur gjarnan af því að óvíða ef
nokkurs staðar hafi öryrkjar það betra
í heiminum, skulum við samt hvorki
ofmetnast né sofna á verðinum.
Aðstæður fólks eru mjög misjafnar og
meðaltöl og útreikningar í skýrslum
fela margan beiskan veruleika.
Ég óska öryrkjum og samtökum
sem að þeirra málum vinna góðs
gengis í þeirra mikilvægu en um leið
oft á tíðum erfiðu baráttu og heiti þeim
mínum stuðningi eftir því sem ég get
framast komið honum við.
Steingrímur J. Sigfússon
Leiðrétting
í 2.tbl. Fréttabréfsins 1998 bls. 43
rifjaði hún Elín Þorbjarnardóttir upp
bæjarnöfn gömul sem bundin höfðu
verið í rím, en sunnlensk voru þau.
I bæjarnafnavísu nr. tvö var
seinnihlutinn birtur svo:
Látalæti leikur í
lítill álmaviður,
mikið kátur, meira frí
Magnús Árna niður.
En réttan segir Elín vísuhelminginn
eiga að vera svona:
Vex upp Látalæti í
lítill baugaviður,
mikið kátur meinafrí
Magnús Árnaniður.
Og er sem annars staðar skylt að
hafa það sem sannara reynist.
Ritstj.
Jónarnir mæla og meta svo unnt verði að opna setrið.
Formleg opnun
þjónustuseturs
Hinn 16. júlí sl. varþjónustusetrið að Tryggvagötu 26 formlega tekið
í notkun við hátíðlega athöfn. Þjónustusetrið hefur áður verið kynnt
hér og eflaust mun það síðar heimsótt og þá frá starfinu sagt, þegar í
fullan gang verður komið. Eins og fram kom í kynningu þá hafa þama
aðsetur sitt ágætt sex aðildarfélög Öryrkjabandalagsins, hvert með sína
eigin aðgreindu skrifstofu og svo sameiginlegt þjónusturými þar að auki.
Þarna eiga þessi sex félög því hina ánægjulegustu starfsaðstöðu hvert
um sig svo og sameiginlega.
Félögin eru: Félag nýrnasjúkra, Landssamtök áhugafólks um
flogaveiki, Parkinson - samtökin, Samtök sykursjúkra, Tourette - samtökin
og Umsjónarfélag einhverfra.
Við hina formlegu opnun mættu margir góðir gestir, alveg sérstaklega
frá hinum sex félögum, en einnig aðrir sem samfögnuðu félögunum með
mætan áfanga.
Frá ÖBI voru mætt Garðar Sverrisson, Guðríður Ólafsdóttir og undir-
ritaður en bandalagið sendi félögunum fagra blómakveðju.
Stjórnarformaður þjónustusetursins, Jón Jóhannsson frá Parkinson -
samtökunum, bauð fólk velkomið og rakti nokkuð aðdraganda og
tilurð þjónustusetursins og samvinnunnar.
Hann færði fram hlýjar þakkir til þeirra er þetta hefðu gjört mögulegt,
alveg sérstaklega færði hann heilbrigðisráðherra og ráðuneyti hennar
alúðarþakkir fyrir sinn mikla og góða hlut. Hann gaf síðan Ingibjörgu
Pálmadóttur heilbrigðisráðherra orðið. Ingibjörg ráðherra samfagnaði
félögunum og sagði að þjónustusetrið mætti eins kalla Jónshús því að
málinu hefðu einkum komið þrír Jónar þ.e. Jón Sæmundur Sigurjónsson
frá heilbrigðisráðuneytinu og frá þjónustusetrinu stjórnarformaður og
framkvæmdastjóri þ.e. Jón Jóhannsson og Jón Snævarr Guðnason. Lýsti
því næst þjónustusetrið formlega í notkun tekið.
Ljúfustu veitingar höfðu verið á borð bornar og gæddu gestir sér á
þeim.
Við þremenningarnir þökkum fyrir okkur kærlega sem og þakkar
bandalagið fagurt þakkarskjal sem hingað barst og kærkomið var. Við
segjum aðeins í lokin: Til hamingju með hið ágæta athvarf og ánægjulega
samvinnu. Heill fylgi framtíðarstörfum.
H.S.
28