Fjölrit RALA - 15.04.1988, Blaðsíða 7

-1-
Inngangur.
Þáttur Rannsóknastofnunar landbúnaðarins í uppgræðslu á Auðkúlu- og
Eyvindarstaðaheiði sumarið 1987 var með svipuðum hætti og undanfarin ár.
Með gróðurmælingum og athugunum var fylgst með þróun, ástandi og nýtingu
gróðurs á þeim svæðum, sem þar hafa verið grædd upp síðan 1981. Haldið
var áfram áburðartilraunum þeim, sem hafnar voru á fjórum
uppgræðslusvæðum á heiðunum 1985 og 1986, en þeim er ætlað að leiða í
ljós, hve mikils áburðar er þörf til þess að viðhalda viðunandi gróðurþekju,
gróðurfari og uppskeru á svæðunum. Þessi áfangaskýrsla lýsir þeim
rannsóknum, sem unnið var að, og niðurstöðum sumarið 1987.
✓
Rannsóknaáætlunin 1987 stóðst að mestu, en þó ekki að öllu leyti. Aætlað
hafði verið að gera beitartilraun með tilteknum fjölda sauðfjár miðsumars á
uppgræðslusvæðinu Lurk austan Helgufells á Auðkúluheiði. Svæðið, sem er
um 182 hektarar að stærð innan girðingar, var algerlega friðað fyrstu
uppgræðsluárin 1983 og 1984, en sumurin 1985 og 1986 var leyfð þar
takmörkuð síðsumarbeit. Gróður á Lurk hefur verið afar gróskumikill og borið
af öðrum svæðum, og hefur svæðið fyrst og fremst verið notað til
samanburðar á uppgræðslu á friðuðu eða léttbeittu landi og öðrum
uppgræðslusvæðum á heiðunum, sem hafa verið síbeitt frá upphafi. Upp úr
mánaðarmótum júní-júlí, skömmu eftir að upprekstur á Auðkúluheiði hófst,
kom í ljós að girðingin umhverfis Lurk hafði verið lögð niður á nokkrum
stöðum og fé runnið þar inn. Þegar rekið var út af svæðinu skömmu síðar,
voru á því um 1000 kindur og gróður rótbitinn. Af þessum sökum varð að
hætta við fyrirhugaða beitartilraun á Lurk. Ekki upplýstist hver hafði verið að
verki, en tekið skal fram, að þetta er í fyrsta skipti, sem spjöll eru unnin í
sambandi við uppgræðslutilraunir á heiðunum.
Starfsmenn Landnýtingardeildar Rala framkvæmdu allar gróðurmælingar á
uppgræðslu- og tilraunasvæðunum, en Haukur Hafstað hafði eftirlit með
svæðunum og útbúnaði á þeim. Sigurður H. Magnússon líffræðingur annaðist
uppgjör á niðurstöðum. Þessum aðilum og starfsmönnum Landsvirkjunar og
heimamönnum er þökkuð góð samvinna.
Keldnaholti 7. mars 1988
Ingvi Þorsteinsson
deildarstj. Landnýtingardeildar.