Rauði borðinn : fréttabréf alnæmissamtakanna á Íslandi - 01.12.2009, Page 6
6
Um 33 til 35 milljónir jarðarbúa búa við þá staðreynd að vera smitaðir af hiv samkvæmt
ársskýrslu Unaids og þar af eru 2,5 milljónir enn á barnsaldri. Tala nýsmitaðra í heiminum
á liðnu ári var talin vera um 2,5 milljónir manna. Helmingur allra þeirra sem smitast af
hiv-veirunni eru innan við 25 ára og aðeins helmingur þeirra nær 35 ára aldri. Slagorð
alþjóðlega alnæmisdagsins í ár á því mjög vel við: ,,Universal Access and Human Rights"
sem mætti útleggja sem ,,Jafnt aðgengi og jöfn mannréttindi um heim allan”. Válegar
tölur smitaðra minna okkur sannarlega á að hiv er enn til staðar og verkefnin framundan
hérlendis og á veraldarvísu gegn vágestinum eru óþrjótandi.
Við erum heppin með aðgengi okkar að heilbrigðisþjónustu.
Einnig eru mannréttindamál í betra farvegi á Íslandi en
víða annars staðar. Slíkt er ekki sjálfgefið og hefur kostað
talsverða vinnu í gegnum árin. Að þessu sögðu er rétt að
hnykkja á mikilvægi þess, að við verjum þessi lífsgæði, þegar
við göngum í gegnum efnahagslegar þrengingar eins og á
þessu ári. Kreppuárinu 2009 er að ljúka, þessu stórskrítna
ári sem hefur einkennst af almennri óvissu í þjóðfélaginu.
Slík óvissa hefur áhrif á félagið okkar sem er háð velvild
og skilningi stjórnvalda sem og fyrirtækja. Þegar þessi orð
eru skrifuð er ekki ljóst hvernig starfsemi félagsins verður
fjármögnuð næstu misserin. Von mín er sú að okkur auðnist
að halda starfinu áfram með svipuðum hætti og verið
hefur, enda brýnt að viðhalda reynslu og þekkingu á hiv
og alnæmi sem orðið hefur til innan félagsins. Í rúm 20 ár
hefur félagið unnið mikið starf í formi fræðslu, forvarna og
stuðnings við hiv-jákvæða. Undanfarið ár hefur starfsemi
félagsins verið eins og lagt var upp með.
Fræðslu- og forvarnarstarfsemi hiv-Ísland er umfangsmikil.
Með stuðningi Landlæknisembættisins, GlaxoSmithCline,
Artica MAC og fleiri aðila, hefur félagið á undanförnum
árum staðið fyrir fræðslu um hiv og alnæmi til allra 9. og
10. bekkinga í grunnskólum landsins. Verkefni sem þetta er
brýnt og þarf stöðugt að vinna að því. Markmið fræðslunnar
er tvíþætt. Annars vegar að unglingar sýni sjálfum sér
og öðrum fulla virðingu, bæði í kynlífsathöfnum sem
öðrum athöfnum. Hins vegar að vinna gegn fordómum.
Fordómum gegn ákveðnum sjúkdómum, fordómum sem
byggjast á fáfræði. Árangur verkefnis sem þessa er óljós
en hvert nýsmit er óafturkræft. Að koma í veg fyrir slíkt er
ætíð sigur.
Árleg minningarguðsþjónusta fór að vanda fram í
Fríkirkjunni í lok maí. Minningarstund þessi er alþjóðleg
og heitir hún á ensku Candlelight Memorial Day. Bryndís
Valbjörnsdóttir guðfræðingur stjórnaði athöfninni,
en Margrét Pálmadóttir annaðist tónlistarflutning
ásamt Vox Feminae og Stúlknakór Reykjavíkur.
Ilmur Kristjánsdóttir leikkona og guðfræðinemi flutti
hugvekju en hún er jafnframt verndari hiv-Ísland og er
það félaginu mikill styrkur.
Fjórða umferð þessa forvarnarverkefnis er í burðarliðnum.
Alltaf koma nýir nemendur og því þarf stöðug skipulögð
fræðsla að eiga sér stað. Stefnt er að þessari yfirferð verði
lokið í lok árs 2010. Í ár verður snyrtivörufyrirtækið Artica
MAC stærsti styrktaraðili verkefnisins og hefur afhent
veglegan styrk sem sagt er frá hér í blaðinu.
Sigurlaug Hauksdóttir félagsráðgjafi kemur vikulega á
Hverfisgötu 69 og gefur kost á viðtölum. Hefðbundnar
uppákomur eiga sér stað í starfi félagsins, svo sem
árleg guðsþjónusta í Fríkirkjunni síðasta sunnudaginn í
maí, sameiginleg þorrablót, grillveislur og skemmtanir
fyrir félagsmenn. Árlega er haldið upp á alþjóðlega
alnæmisdaginn, 1. desember, með hefðbundnu sniði.
Þann 5. desember í fyrra minntumst við þess að 20 ár
voru liðin frá stofnun félagsins. Móttaka var haldin í
Þjóðmenningarhúsi og var góð mæting félagsmanna,
heilbrigðisstarfsfólks og fulltrúa annarra félagasamtaka.
Afmælið var hið veglegasta, margir tóku til máls og
flutt voru tónlistaratriði. Guðlaugur Þór Þórðarson
þáverandi heilbrigðisráðherra opnaði formlega nýju
heimasíðuna: www.hiv-island.is
Samstarf við systursamtök á Norðurlöndum er í
formi sameiginlegra funda, þar sem reynt er að móta
sameiginlega stefnu. Fundir sem þessir eru mjög
mikilvægir til þess að bera saman bækur og efla innri
samstöðu og styrk.