Rauði borðinn : fréttabréf alnæmissamtakanna á Íslandi - 01.12.2009, Qupperneq 27
Úkraína
Nokkrar áætlanir hafa verið gerðar undanfarin ár um að ná til
áhættuhópa svo sem sprautufíkla og fanga. Það hefur leitt til
þess að hlutfall þeirra sem hljóta meðferð hækkaði úr 27% árið
2006 í 34% árið 2007. Fjárskortur háir starfseminni.
Egyptaland
Hiv-smitaðir fangelsaðir
Frá því í október 2007 hefur lögreglan í Kaíró í Egyptalandi
handtekið menn sem hún taldi að væru smitaðir af hiv.
Síðan hafa tólf menn verið ákærðir fyrir hegningarlagabrot
og níu þeirra hlotið fangelsisdóm fyrir ólifnað. Ályktað var
um kynhneigð mannanna vegna þess að þeir reyndust hiv-
jákvæðir. Þegar saksóknari nokkur upplýsti einn hinna
handteknu um að hann væri hiv-jákvæður sagði hann: „Það
ætti að brenna fólk eins og þig lifandi. Þú átt ekki skilið að lifa.“
Dómunum var áfrýjað en voru allir staðfestir. Mennirnir hafa
allir neitað sökum. Sumum þeirra var haldið á sjúkrahúsi þar
sem þeir voru hlekkjaðir við rúm sitt vikum eða mánuðum
saman. Ásakanir um að lögreglan og heilbrigðisstarfsmenn
hafi beitt mennina pyntingum hafa ekki fengist rannsakaðar.
Flestir voru þeir látnir þola endaþarmsskoðun og hiv-próf án
samþykkis. Sumir voru barðir. Þeir níu sem voru dæmdir sitja
nú í fangelsi en þrír voru látnir lausir án ákæru.
Amnesty-samtökin álíta að mennirnir séu samviskufangar
og krefjast þess að þeir verðir leystir úr haldi tafarlaust og
skilyrðislaust. Þau krefjast þess að egypsk yfirvöld rannsaki
nú þegar ásakanir um pyntingar og illa meðferð á mönnunum.
Til þess að vernda mennina lætur Amnesty ekki uppi nöfn
þeirra eða frekari upplýsingar.
Indland
Hiv-jákvæð kona leidd til sýnis um sjúkrahúsganga
Í borginni Jamnagar í Gujarat-ríki á Indlandi greindist kona
nokkur hiv-jákvæð á ríkissjúkrahúsi. Sett var á hana merki
og hún leidd um deildir sjúkrahússins til þess að vara aðra
sjúklinga við henni. Hjúkrunarkonur festu merki á enni
konunnar þar sem stóð hiv-jákvæð. Merki eru límd á enni á
líkum eftir líkskoðun.
Þegar umrædd kona hitti yfirlækni kvennadeildarinnar skipaði
hann henni, eftir að hafa farið yfir skýrslu hennar, að halda sig
frá öðrum sjúklingum og tilkynnti hjúkrunarfræðingum um
smitið.
Konan er um hálfþrítug og býr í borginni. Hún varð fyrir
þessari skelfilegu reynslu strax eftir að hún hafði orðið fyrir því
áfalli að greinast hiv-jákvæð og gengist undir fóstureyðingu
til þess að koma í veg fyrir að barn fæddist með smit. Læknar
ráðlögðu konunni það eindregið.
Hún hafði verið leidd í gegnum nálega helming deildanna á
sjúkrahúsinu, er sjálfboðaliðar úr stuðningsfélagi hiv-smitaðra
í héraðinu komust að því sem gerðist á sjúkrahúsinu. Þeir
gerðu yfirmanni sjúkrahússins strax viðvart.
Heilbrigðisráðherrann lýsti yfir undrun og óánægju vegna
þessa og skipaði læknunum og hjúkrunarfræðingunum að
fara í leyfi frá störfum þar til rannsókn hefði farið fram á
málinu.
Stuðningsfélagið sá til þess að konan fór af sjúkrahúsinu og
heim til eiginmannsins sem er einnig hiv-jákvæður. Félagið
tjáði fjölmiðlum að konan væri í losti og segðist ekki vilja lifa
lengur nú þegar allir vissu um hana.
Eistland
Dregur úr nýsmiti af hiv
Á fyrstu tíu mánuðum þessa árs greindust 298 manns með hiv-
smit í Eistlandi en 419 á sama tíma árið 2008. Af nýgreindum,
það sem af er árinu 2009, voru 49 fangar. Frá upphafi hafa
7.207 greinst með hiv-smit og 259 með alnæmi.
Ein milljón þrjú hundruð og sjötíu þúsund manns búa í
Eistlandi, 4,3 sinnum íbúatala Íslands. Tölurnar svara þess
vegna til þess að á Íslandi hefðu 1.670 smitast og 65 fengið
alnæmi.