Rauði borðinn : fréttabréf alnæmissamtakanna á Íslandi - 01.12.2012, Blaðsíða 5
Er ekki allt
gott að frétta?
5
Úrræði og árangur
Aukin úrræði og samvinna alþjóðasamfélagsins er að skila
gríðarlegum árangri í forvörnum gegn hiv og alnæmi í
heiminum. 8 milljónir jarðarbúa eru komnir á lyfjameðferð
og eru alþjóðleg markmið að 15 milljónir manna verði á
lyfjum við hiv árið 2015. Alnæmistilfellum hefur fækkað
umtalsvert og það hefur blessunarlega dregið úr úbreiðslu
hiv á heimsvísu, ákveðin ríki og landssvæði hafa verið til
eftirbreytni hvað varðar forvarnir og meðferð. Í Austur-
Evrópu og víðar hefur ekki enn dregið úr útbreiðslu. Því
miður á það einnig við um Ísland en tæplega 50 manns
hafa greinst hérlendis með hiv á síðustu tveimur árum
sem er óásættanlegur fjöldi. Þessi mikla aukning skýrist
m.a. af skyndilegri og hraðri útbreiðslu hiv meðal fíkla sem
deila með sér óhreinum sprautubúnaði. Margt bendir þó
til að toppnum sé náð og að árið 2012 verði nýsmit færri
og dreifingin milli áhættuhópa jafnari. Sett hefur verið
á laggirnar samstarfshópur á vegum Sóttvarnaráðs þar
sem HIV-Ísland á fulltrúa. Hópurinn vinnur að tillögum að
úrræðum sem gætu lágmarkað þennan skaða meðal fíkla
og vonandi dregið úr frekari útbreiðslu.
Eftir merkilega atburðarás hiv og alnæmis síðustu 30
árin lítur framkvæmdastjóri HIV-Íslands vonglaður fram
veginn. Aldrei hefur ríkt eins mikil bjartsýni um árangur
baráttunnar gegn útbreiðslu hiv í heiminum og nú. Eftir
hörmungar undanfarinna áratuga þar sem milljónir manna
hafa þjáðst og dáið af völdum alnæmis er að skapast
þekking og tækni til að ná böndum á heimsfaraldrinum.
Lyfjameðferðir gegn hiv hafa tekið slíkum framförum að
einstaklingar á vel samsettri meðferð eru ekki smitberar
í þeim mæli sem var. Það gerir tilveru hiv jákvæðra svo
sannarlega léttbærari, að vera á lyfjum sem ná að halda
veirunni svo vel í skefjum að þeir eru ekki lengur smitandi.
Jafnframt eru menn vongóðir um að bóluefni gegn hiv
veirunni verði að veruleika innan ekki svo margra ára.
Ímynd hiv og alnæmis verður væntanlega eðlilegri og
sanngjarnari í kjölfar þess að sjúkdómurinn er orðinn
viðráðanlegri, því það eru gömul og ný sannindi að þegar
þekking og skilningur eykst, þá minnkar óttinn. Samskonar
viðhorfsbreyting átti sér stað gegn berklum, með tilkomu
berklalyfja, um miðja síðustu öld.
Félagsstarfið
Þrátt fyrir erfiðleika við að láta endum ná saman í rekstri
HIV-Íslands í ár, sem helst skapast af fjórðungs lækkun
styrkja frá Velferðarráðuneytinu, hefur tekist að halda úti
öflugu starfi: Öflugt fræðslu- og forvarnarstarf á sér stað í
grunnskólum landsins, fangelsum, meðferðarstofnunum,
læknadeild og fleiri deildum háskólanna svo eitthvað sé
nefnt.
Árleg minningarguðsþjónusta um þá, sem látist hafa
af völdum alnæmis, var haldin í Fríkirkjunni og einnig
héldum við upp á alþjóðlegan dag alnæmis 1. desember
með opnu húsi. Uppákomur þessar eru mest sóttu
viðburðir félagsins.
Innra starfi félagsins er best lýst með hugtökum eins og
samvinna, samkennd, virðing, traust, stuðningur, styrking,
nám, heilsuefling og sjálfstraust. Þessi gildi eru höfð í
hávegum, hvort sem um er að ræða einstaklingsráðgjöf
eða hópvinnu. Margt er líka gert til skemmtunar, svo sem
árlegt þorrablót, matarkvöld og veitingahúsaferðir.
Frá
framkvæmdastjóra
Merk tímamót
HIV-Ísland mun fagna 25 ára afmæli sínu á næsta ári,
2013. Á þeim tímamótum munum við minnast allra
þeirra með þakklæti sem lagt hafa hönd á plóg við
fræðslu og forvarnir. Auk þess að horfa um öxl og
þakka fyrir það sem hefur áunnist meðal hiv-jákvæðra
í glímunni fyrir auknum skilningi og umburðarlyndi
munum við horfa fram veginn til framtíðar sem verður
sífellt bjartari. Besta afmælisgjöfin frá samfélaginu á
næsta ári væri jákvæð og málefnaleg umræða um hiv
og alnæmi.
Einar Þór Jónsson