Börn og menning - 2015, Blaðsíða 16

Börn og menning16
kærleikurinn sem býr í samfélagi vinkvenna.
Þrátt fyrir að Anna kjósi sér aðra vegferð en
sumar þeirra þá gefur höfundur konum sem
velja að eignast ekki maka rými í verkinu og
fagnar þeim leiðum sem þær hafa valið að
feta.
Hugmyndin um Önnu í Grænuhlíð sem
sjálfstæða konu sem hafi lítinn áhuga á að
festa ráð sitt, virðist nokkuð írónísk í ljósi
þess að í lok bókarinnar snýst henni hugur
og hún ákveður að giftast Gilbert Blythe.
(Vissir netverjar telja þó að Anna hafi verið
blekkt inn í ráðahaginn enda er það ekki
fyrr en Gilbert liggur fyrir dauðanum sem
hún uppgötvar að hún muni ekki vilja lifa án
hans.) Hvaða skoðun sem lesendur kunna
að hafa á ákvörðun Önnu (og það eru svo
sannarlega margir sem hafa sterkar skoðanir
á málinu!) má segja að Montgomery hafi sett
persónu sína í hóp sterkra kvenfyrirmynda og
veitt henni þannig færi á að móta eigið sjálf.
Hin unga Anna í Grænuhlíð, með sitt
frjóa ímyndunarafl og sína ljóðrænu sýn á
veröldina, er enn fyrirmynd barna um allan
heim. Hún er fulltrúi þess að trúa á sjálfan
sig, elska umhverfi sitt af öllu hjarta og
leggja hart að sér til að láta drauma sína
rætast. Anna hin eldri býður lesendum hins
vegar með sér í ferðalag þess sem stendur
frammi fyrir draumum barnæskunnar og
þarf að taka ákvarðanir um hvert stefna
skuli í lífinu. Hún er einlæg, kvíðin og oft og
tíðum vonsvikin með líf sitt en lærir að sækja
styrk í umhverfi sitt og fyrirmyndir sínar.
Niðurstaða bókaflokksins er ekki endilega
að allra skapi en ferðalagið um mismunandi
æviskeið persónunnar býður upp á
gagnlegar vangaveltur um kyngervi. Í baráttu
Önnu birtast lesendum átök samfélagsins
og takmarkanir tengdar kyngervi sem
samtímalesendur þurfa sannarlega einnig að
takast á við.
Höfundur er bókmenntafræðingur
Útgáfufélagið Ástríki hefur í hyggju að gefa allar
sex bækurnar um Önnu í Grænuhlíð út í nýrri og
óstyttri þýðingu og er sú fjórða, Anna í Asparblæ,
væntanleg nú í haust.