Veiðimaðurinn - 01.04.2005, Blaðsíða 31

Skapari Króksins
og Mýslu kynnir
nýja silungaflugu
~ Gylfi Kristjánsson fluguhönnuður og hnýtari á Akureyri með nýja hönnun enn eitt vorið ~
Gylfi Kristjánsson er búsettur á Akureyri. Hann er mikill
völundur þegar kemur að smágerðum hlutum enda lærður
gullsmiður. Náttúrulegir skartgripir hans, flugurnar, hafa gert
mikið fyrir margan silungsveiðimanninn síðustu ár. Gylfi á
ekki langt að sækja fluguhnýtingar því að Kristján Gíslason
faðir hans var einn af þekktustu fluguhnýturum landsins.
Gylfi hefur hnýtt flugur svo tugum þúsunda skiptir. Fyrst
flugurnar hans pabba og svo sínar eigin.
"Eftir að hafa hnýtt með föður mínum hans flugur um
árabil fór ég skömmu eftir fráfall hans árið 1999 að gera
tilraunir með að hanna eitthvað sjálfur. Reyndar hafði ég
aðeins prófað það áður og útkoman varð meðal annars
fluga sem einn félagi minn skírði "Gylfa belg", sú fluga gaf
mér og félögum mínum væna urriða í Laxá í Aðaldal neðan
virkjunar. „Gylfi belgur” varð þó aldrei nein stórfluga og
lognaðist einhvern veginn út af. Hver veit nema rykið verði
dustað af henni við tækifæri." Gylfi brosir kankvís þegar
"belgurinn" er nefndur. En hver var fyrsta flugan hans sem
eitthvað veiddist á?