Veiðimaðurinn - 01.04.2005, Blaðsíða 34

Nýr formaður Stangaveiðifélags Reykjavíkur rœðir um ótrúlegar tölur sem boðnar eru í laxveiðiár
SVFR tekur ekki þátt í þeim hrunadansi
Hann er hávaxinn og stæltur karlmaður á miðjum
aldri. Hann er á besta aldri veiðimanns. Reynslan mikil og
þolinmæðin til staðar. Kappið er víkjandi fyrir klókindunum.
Þetta er þroskað eintak af hættulegasta dýri sem gengið hefur
á jörðinni. Eðlið er til staðar en umfram rándýr sléttunnar
hefur hann sér til fulltingis hátæknibúnað sem gerir honum
kleift að komast hratt yfir og veiða mikið. Þessi lýsing gæti
svo sem átt við hvaða karlmann milli fertugs og fimmtugs
en er hér beinlínis um að ræða Bjarna Júlíusson nýkjörinn
formann SVFR. En Bjarni hefur fleiri kosti sem gerir það að
verkum að lýsingin hér að ofan á tæpast við. Hláturmildur
með afbrigðum. Hlær hrossahlátri. Fjölskyldumaður.
Traustur og stendur við það sem hann segir.
Bjarni er í senn óreyndur og hokinn af reynslu. Hann hafði
setið átta ár í stjórn félagsins áður en til formennskunnar
kom. Bjarni hefur hins vegar ekki verið formaður áður en
náði glæsilegu kjöri í fyrstu formannskosningunni í félaginu
í 34 ár. Kosning Bjarna var afgerandi.
"Ég er mjög sáttur. Fyrst og fremst er ég að vinna með
mjög skemmtilegri og duglegri stjórn. Það eru miklar
rökræður. Menn eru samhentir en alls ekki alltaf sammála.
Það eru engar fylkingar og menn eru þarna til að sinna þeim
trúnaðarstörfum sem þeim hafa verið falin." Það leynir sér
ekki þegar Bjarni talar um stjórnina að hann meinar þetta.
Fundirnir eru greinilega fjörugir en árangursríkir.
En hvernig formaður ætlar þú að verða? Muntu verða
andandi ofan í hálsmálið á veiðimönnum um allt land?
Hvernig munu menn verða varir við þig?
Bjarni gat ekki beðið eftir að komast að eftir fyrstu
spurninguna. "Nei. Ég verð ekki einu sinni andandi ofan í
hálsmálið á stjórnarmönnum. Ég er þeirrar skoðunar að góð
stjórnun felist í því að fela mönnum ábyrgð og gefa þeim
34 Veiðimaðurinn Apríl 2005
færi á að axla hana með þeim meðulum sem þarf." Bjarni
bendir hins vegar á að kosningabaráttan hafi nýst sér mjög
vel.
"Af því að það var kosningabarátta þurfti maður virkilega
að setjast niður og hugsa um hvernig maður ætlaði að selja
þessa sýn á félagið og móta þá sýn allt til enda. Þessi forvinna
nýttist mér mjög vel. Ég stend líka frammi fyrir því að stjórnin
sem sat síðustu tvö ár hefur verið mjög afkastamikil. Menn
hafa verið mjög duglegir í því að framlengja samninga og
gengið vel frá málum á því sviði. Þau mál eru í góðum farvegi.
En menn verða stöðugt að vera með augun opin. Við tókum
þátt í útboði á Svalbarðsá og buðum þar af myndarskap
þótt við höfum ekki átt hæsta tilboðið. Svalbarðsá er ein af
stórlaxaánum á norðausturhorninu, hún fellur í Þistilfjörð
ekki langt frá hinni fornfrægu Sandá og sækja laxar þessara
tveggja Þistilfjarðarsystra kyn sitt til stóru systranna nokkru
austar, Hofsár og Selár. Svalbarðsá er skemmtileg á með
möguleika á þeim stóra og við erum að tala um fiska vel yfir
20 pundin í góðu ári.
Víðidalsá var líka í útboði en við tókum ekki þátt í því."
Bíddu við, af hverju ekki?
"Af því að við vissum hvaða upphæðir yrðu boðnar í ána
og þar var verið að tala um tölur sem voru þess eðlis að
það var einfaldlega mat mitt að ekki væri forsvaranlegt að
Stangaveiðifélag Reykjavíkur tæki þátt í slíkum hrunadansi.
Mörgum þykir nóg um hvað við erum að borga fyrir stöngina
í Norðurá. En tölurnar sem verið er að tala um fyrir Víðidalsá
eru af allt annarri stærðargráðu. Það mesta sem maður
hafði heyrt talað um á þessu sviði voru 42 milljónirnar fyrir
Grímsá. Þarna er verið að tala um u.þ.b. 50 milljónir króna
fyrir átta laxastangir eingöngu. Ennþá hærri tilboð bárust
í allan pakkann, það er laxastangirnar og silungsveiðina.
Þetta er tíu stanga á. Átta í laxinum og tvær í silungnum.
Góð silungastöng getur selst á eina til eina og hálfa milljón á
uppsprengdu verði yfir sumarið. Þetta lítur því þannig út að
menn eru tilbúnir að borga sex milljónir fyrir sumarstöngina
í Víðidalnum. Ef menn deila í þá tölu með 90 dögum þá
kemur út að dagurinn kostar að meðaltali um 70 þúsund
krónur. Við vitum það báðir að jaðardagarnir, til dæmis í
september, hafa verið að fara á 25 til 30 þúsund krónur.
Það er alveg ljóst að verðið sem þarf að setja á júlídagana er
gríðarlega hátt ætli menn sér að ná því meðalverði sem þetta
tilboð virðist hljóða upp á."
Menn sem eru tilbúnir að bjóða þessar fjárhæðir hljóta að
vita að þeir munu tapa á þessum viðskiptum, í það minnsta
eru verulegar líkur á því að svo fari?
"Þeir aðilar sem eru að horfa til Víðidalsins og hafa verið
nefndir í þessu sambandi eru báðir með stórar ár og byggja
sín viðskipti upp að stærstum hluta á sölu veiðileyfa til
útlendinga. "Við hjá Stangaveiðifélagi Reykjavíkur munum
að sjálfsögðu fylgjast grannt með og okkar markmið er að
tryggja okkar félagsmönnum fjölbreytt veiðileyfi.
Ég vil hins vegar koma með aðeins nýjan vinkil inn í
þetta. Við erum 2600 félagar og höfum verið að bjóða þetta
þrjá til fjóra stangardaga að meðaltali á hvern félaga síðustu
tvo áratugi, miðað við heildarframboð á veiðileyfum sem
við höfum verið með. En ég vil að við hugsum þetta aðeins
öðruvísi. Hvað erum við að bjóða margar fyrsta flokks
laxveiðiár, marga daga í slíkum ám, á hvern félaga? í ár
erum við kannski að bjóða um einn dag á sumri og síðustu
árin hefur þetta verið hálfur til einn dagur.
Hvað erum við að bjóða marga daga til félaga í flokknum
ágætis veiði, til dæmis í Soginu, Stóru-Laxá og sambærilegum
ám? Þetta eru svæði þar sem er ágætis aðbúnaður en ekki
allur pakkinn, en góð laxavon. Sömuleiðis vil ég vekja
athygli á hversu marga daga við erum að bjóða í sjóbleikju
til okkar félagsmanna. Silungurinn er að verða æ eftirsóttari
og sífellt fleiri sækja í góða silungsveiði. Við erum einmitt
núna að bæta tveimur slíkum ám í safnið okkar. Við erum að
byrja að selja veiðileyfi í umboðssölu í Miðdalsá og Grafará.
Þetta eru ár fyrir norðan og þarna er stór og falleg sjóbleikja.
Leyfin eru ekki dýr og aðstaðan ágæt." Það er sem sé ekki
nóg að skoða bara heildarframboðið á dögum, við verðum
líka að flokka þetta aðeins og tryggja alvöru framboð í
hverjum flokki fyrir sig því félagar í SVFR hafa mismunandi
sjónarmið þegar þeir velja sér veiðileyfi.
Apríl 2005 Veiðimaðurinn 35