AVS. Arkitektúr verktækni skipulag - 01.06.1994, Side 45

HÖNNUNARSTEFNA
OPINBERRA AÐILA
Asíðustu árum hefur umræða um
mannvirkjagerð og byggt umhverfi hér
á landi aukist mikið. Fólk er að gera
sér betur og betur grein fyrir því hvað
byggt umhverfi er mikilvægt í daglegu lífi okkar og
hvað mannvirki geta haft mikil áhrif á líf, heilsu og
vellíðan manna sem búa og starfa í þessum mann-
virkjum og umgangast þau daglega.
Hönnun mannvirkja og það að fella þau að aðliggj-
andi umhverfi er líka flókið fyrirbrigði þegar menn
fara að skoða þau mál ofan í kjölinn. Hér nægir að
minnastáfyrirhugaða byggingu Hæstaréttar; miðbæ
Hafnarfjarðar og Ráðhús Reykjavíkurborgar. Allar
þessar byggingar hafa vakið miklar umræður og um
þær allar hafa skoðanir verið skiptar. Þar sem opin-
berir aðilar verja fé úr sameiginlegum sjóðum lands-
manna til þessarar umhverfismótunar er ekki nema
von að fólk láti sig varða hvernig þessu fé er varið
og hvaða stefnu þessir aðilar hafi að leiðarljósi
viðvíkjandi mannvirkjagerð.
Þessi stefna getur verið mjög mismunandi. Hún gæti
verið fólgin í því að leitast við að hanna opinberar
byggingar að svo miklu leyti sem hægt er úr inn-
lendum byggingarefnum og þannig að innlendir
byggingaraðilar geti byggt þær - nota ekki flóknari
stýrikerfi í byggingum en landsmenn framleiða - lág-
marka viðhaldskostnað eða rekstrarkostnað eða
hvort tveggja - halda í innlenda byggingarhefð eða
líkja eftir síðustu tísku frá útlöndum - og svo mætti
lengi telja. Margar þjóðir hafa lagt stolt sitt í að fá
sína bestu arkitekta til að teikna skóla í þeim tilgangi
að gefa nemendum kost á að umgangast góða
byggingarlist á unga aldri. Aðrir hafa lagt mikla
áherslu á að vel sé vandað til hönnunar á félagslegu
húsnæði, - „nógu slæmt sé að vera fátækur þótt fólk
þurfi ekki líka að búa í Ijótu umhverfi."
Ef stefna opinberra aðila í hönnunarmálum er óljós
eða þokukennd getur allt gerst, enda hefur því verið
líkt við að senda barn út í búð með óútfyllta ávísun til
þess að kaupa eithvað. Umræða undanfarinna ára
bendir skýrt til þess að fólk vilji ekki lengur láta bjóða
sér að þannig sé farið með þá fjármuni sem það hefur
aflað hörðum höndum.
Ritstjórn tímaritsins ARKITEKTÚR, VERK-
TÆKNI OG SKIPULAG ákvað fyrr á þessu ári að
biója nokkra aðila, sem með framkvæmdum sínum
og umsvifum hafa umtalsverð áhrif á umhverfi hér á
landi, að gera stuttlega grein fyrir þeirri stefnu sem
þeir fylgja við hönnun og mótun þessa umhverfis.
Þeir aðilar sem ákveðið var að leita til voru eftirfar-
andí:Áfengis- og tóbaksverslun ríkisins, Háskóli ís-
lands, Landsvirkjun, Menntamálaráðuneytið, Póstur
og sími og Reykjavíkurborg. Allir brugðust þeir vel
við þessari málaleitan og fara svör þeirra hér á eftir.
■ ritstj.
43