Íslenska leiðin - 01.05.2022, Blaðsíða 35

35ÍSLENSKA LEIÐIN TÍMARIT STJÓRNMÁLAFRÆÐINEMA
ÍSLENSKA LEIÐIN
Guðjón Þór Jósefsson, 21 ára, Framsókn.
Hvers vegna valdir þú þann flokk?
Ég hef lengi haft áhuga á pólitík en lengst af
höfðaði enginn flokkur það vel til mín að mig
langaði að taka þátt í stjórnmálastarfi. En sumarið
2020 bauðst mér sumarstarf hjá umboðsmanni
barna við gerð nýsköpunarverkefnis sem
fjallaði um þátttöku barna í ákvarðanatöku og
stefnumótun og þá urðu mér ljósar þær áherslur
sem Ásmundur Einar hafði lagt á barnamál
og mér þóttu þær afar framsýnar og heillandi.
Næsta skólaár þar eftir tók ég svo þátt í starfi
Landssamtaka íslenskra stúdenta og þar kynntist
ég þeim breytingum sem Lilja Alfreðsdóttir gekk
í þegar hún var menntamálaráðherra og þá
sérstaklega varðandi Menntasjóð námsmanna og
stofnun hans.
Út frá því opnuðust augu mín fyrir þeim
breytingum sem Framsókn réðst í á síðasta
kjörtímabili. Mér leist vel á lausnarmiðaða og
öfgalausa nálgun með framtíðarsýn þar sem við
erum að fjárfesta í velferð fólks til lengri tíma í
stað þess að plástra gömul kerfi til skemmri tíma.
Það varð til þess að ég gekk í Framsókn í upphafi
síðasta árs og hef tekið þátt í starfi flokksins
síðan.
Sem ung manneskja í stjórnmálum, hvernig
er komið fram við þig? Er komið öðruvísi
fram við þig miðað við eldri kollega þína?
Mér hefur þótt það mjög lærdómsríkt og
þroskandi að byrja að taka þátt í pólitík á þessum
aldri. Ég hef kynnst mörgu góðu fólki á allskonar
aldri með ólíkan bakgrunn og mér þótti mjög
ánægjulegt að upplifa traust af hálfu eldra
stjórnmálafólks og fólks innan grasrótarinnar
þegar ég byrjaði að taka þátt en þetta fann ég
til dæmis skýrt í málefnavinnu í aðdraganda
kosningabaráttunnar og þegar ég var beðinn um
að sitja pallborðsumræður fyrir hönd flokksins.
Í flokksstarfinu sjálfu hef ég upplifað það að
virðing sé borin fyrir mínum skoðunum og varð
ég þess einnig áskynja þegar ég mætti fulltrúum
annarra flokka, sem voru eldri og reyndari en
ég, í pallborðsumræðum. Þar upplifði ég ekki
að fólk gerði minni kröfur til mín sökum aldurs
þegar kom að því að svara spurningum og ég
var algjörlega settur á sama stall og aðrir. Það
er alveg verið að hleypa okkur unga fólkinu að
borðinu.
Hvað gerir þú fyrir utan stjórnmálin?
Ég er í laganámi við HÍ og sit í stjórn Orators,
félags laganema, sem ritstjóri Úlfljóts en það
á hug minn allan núna. Einnig hef ég gaman af
tónlist og að lesa bækur um sögu og stjórnmál.
Hvar sérðu þig eftir 10 ár?
Þegar ég skráði mig í lagadeild var ekkert augljóst
hvert ég stefndi eftir það og ég hef ekki ennþá
gert upp hug minn og er því í rauninni opinn fyrir
öllu.
Hvað er þitt helsta afrek eða stoltasta stund?
Mér þótti afskaplega gaman að útskrifast úr MR,
lokaprófin þar voru mikil törn og var ánægjulegt
að ljúka því. Ég held að alltaf þegar maður leggur
hart að sér og uppsker í samræmi við það þá er
það mjög skemmtilegt. Í haust var t.d. mikil vinna
í kringum kosningarnar og þess vegna var m.a.
rosalega gaman á kosningavökunni, vitandi að
maður ætti kannski einhvern örlítinn þátt í í því
hvernig fór.
Hvaða skilaboðum viltu koma til ungs fólks
með áhuga á pólitík?
Að skoða allt með opnum huga, bæði fyrir þá sem
taka þátt í pólitík og fyrir þá sem hafa áhuga án
þess að taka þátt í flokksstarfi beint. Það sem ég
reyni að gera líka er að vera duglegur að ígrunda
mínar skoðanir, spyrja mig hvort ég hafi rétt fyrir
mér, sjái heildarmyndina og hvort ég sé að dansa
á flokkslínunni eða utan hennar. Að ígrunda sínar
skoðanir í ljósi stjórnmálaumræðunnar sem er í
gangi hverju sinni er mjög hollt fyrir alla.