Íslenska leiðin - 01.05.2022, Blaðsíða 36

36 ÍSLENSKA LEIÐIN 20. ÁRGANGUR 2022
ÍSLENSKA LEIÐIN
Gunnhildur Fríða Hallgrímsdóttir, 19 ára, Píratar.
Hvers vegna valdir þú þann flokk?
Það var frekar mikil hugsun á bak við það en
alltaf þegar ég var í loftslagsverkföllunum og í
einhverjum aktívisma þá voru Píratar alltaf sá
flokkur sem mér fannst hlusta mest á það sem við
höfðum að segja og komu ekki fram við okkur eins
og börn. Píratar hafa einstaka sýn á stjórnmál og
hvernig þau leita lausna við vandamálum í dag
finnst mér frábært og aðeins öðruvísi en aðrir
flokkar eru að gera í dag.
Sem ung manneskja í stjórnmálum, hvernig
er komið fram við þig?
Er komið öðruvísi fram við þig miðað við eldri
kollega þína? – Jájá yfirleitt, eins og maður
býst við. Áður en ég fór á þing og við vorum að
funda við stjórnmálaflokka var ekki tekið mark á
manni eins og er kannski gert í dag. Mér finnst þó
mjög gaman að sjá hvað margir þingmenn voru
spenntir fyrir því að fá yngra fólk á þing þegar
við Lenya komum inn. Það eru auðvitað flestir á
þingi sem vilja bara það besta og því get ég sagt
að þetta hafi yfir höfuð verið mjög góð upplifun.
Hvað gerir þú fyrir utan stjórnmálin?
Ég myndi ekki segja að stjórnmál væru helsta
áhugamál mitt en mun frekar eru þau leið til að
ná lokamarkmiði. Ég er mikið uppi á fjöllum en
ég tók árspásu frá námi og fór í fjallamennskuna
bæði á Flateyri og Höfn í Hornafirði. Þar kynntist
ég alls konar útivist eins og fjallaskíðum, ísklifri
og kæjaki en ég endaði á að vinna við fjallaleiðsögn
sem var mjög skemmtilegt og mig langar gjarnan
að gera meira af því. Síðan er ég í fullu námi þar
sem ég geri alls konar fyrir utan skóla á borð við
samkvæmisdans, fjallamennskuklúbburinn,
model U.N. og tónlist.
Hvar sérðu þig eftir 10 ár?
Úff maður veit ekki. Ég gæti séð mig fyrir mér
vonandi á þingi og/eða vinna í tækni tengd
loftslagsmálum. Ég vil alltaf vera gera eitthvað
fjölbreytt og skemmtilegt, það er mikilvægt að
láta ekki vinnuna skilgreina sig að mínu mati.
Hvað er þitt helsta afrek eða stoltasta stund?
Líklegast söfnun undirskrifta fyrir nýja
stjórnarskrá síðasta haust (2020) þar sem við
náðum að byggja upp hreyfingu sem barðist fyrir
okkar gildum. Mér finnst ég geta verið stolt af
sjálfri mér og öllum sem tóku þátt í því fyrir að
fá fólk til að hugsa um þessi mál. Það var mikið af
alls konar fólki sem kom saman og sinnti alls kyns
verkefnum til að gera þetta að raunveruleika. Mér
fannst samvinnan og skipulagið frábært.
Hvaða skilaboðum viltu koma til stjórnmála-
fræðinema?
Bara byrja að taka þátt! Við getum alltaf lært af
fyrri mistökum og orðið betri. Fyrsta skrefið er
bara að byrja taka þátt og hafa áhrif vegna þess að
það eru mikið af málum í dag sem hafa gríðarlega
mikil áhrif á okkur. Þó maður viti ekki allt, ég
veit ekki allt og enginn í kringum mig veit allt
en það þýðir ekki að við getum ekki reynt að gera
heiminn betri. Í versta falli gerum við mistök en
það verða þó ný mistök til að læra af!