Íslenska leiðin - 01.05.2022, Blaðsíða 38

38 ÍSLENSKA LEIÐIN 20. ÁRGANGUR 2022
ÍSLENSKA LEIÐIN
fyrir og það er auðvitað alltaf til fólk sem vill vita
betur en þú, aðeins af því að þú ert yngri. Innan
Sjálfstæðisflokksins hef ég hins vegar upplifað
skilning á mínum skoðunum og minni stöðu.
Einnig finnst mér mikilvægt að við sem
erum ungt fólk í stjórnmálahreyfingum stöndum
með okkur sjálfum og verðum ekki einhverjar
klappstýrur fyrir flokkinn. Við verðum alltaf að
standa með okkar skoðunum.
Hvað gerir þú fyrir utan stjórnmálin?
Ég er að læra lögfræði og var að skrá mig nýlega á
kickbox-námskeið, ég er almennt séð mjög gefin
fyrir íþróttir og nýjar áskoranir. Áður fyrr var ég
mjög virk í skák; ég fór til dæmis á Ólympíumót
í Baku, Evrópumót og heimsmeistaramót þegar
ég var yngri en ég lagði það aðeins til hliðar
þegar ég byrjaði í námi. En í dag er ég reyndar
með hlutverk í heimildarmynd RÚV um Friðrik
Ólafsson, fyrsta stórmeistarann í skák, þar sem
ég er að taka viðtöl við hann og fleiri í skákinni.
Hvar sérðu þig eftir 10 ár?
Ég hreinlega veit það ekki. Mig langar að klára
lögfræðinámið og fara hugsanlega master. Svo
fer framhaldið eftir því hvert hugurinn leitar. Í
sambandi við stjórnmálin þá langar mig alltaf
að hafa þau á hliðarlínunni og kannski fer ég í
framboð einn daginn en þangað til þarf ég að lifa
aðeins lífinu og sjá til.
Hvað er þitt helsta afrek eða stoltasta stund?
Mér fannst gaman þegar ég fékk
Hvatningarverðlaun Reykjavíkurborgar þegar
ég var í grunnskóla fyrir að vera jákvæð, réttsýn
og auk þess að hafa náð framúrskarandi árangri
í skák. Ég á margar frábærar stundir frá því að
vinna verðlaun í skákinni, það var mér rosalega
mikil hvatning.
Hvaða skilaboðum viltu koma til stjórnmála-
fræðinema?
Reynið að fylgjast með samfélagsumræðunni,
mynda ykkar skoðanir og ekki vera hrædd við
að tjá ykkar skoðanir. Ennfremur ef þið teljið
ykkar skoðanir rúmast innan einhvers flokks,
fylgist þá endilega með flokkstarfinu, gangið
í ungliðahreyfinguna og hafið áhrif í gegnum
stjórnmálin vegna þess að löggjafinn er okkar
æðsta vald.
Baldvin Pálsson,
ritstjórn
Dagur Kárason,
ritstjórn