Börn og menning - 2024, Page 37

35
b&m
semi vafalaust skilað sér í auknum fjölda barna með
áhuga og hæfni til leikhússtarfa og því ber að fagna.
Leikararnir stóðu sig almennt með prýði en Hildur
Kristín Kristjánsdóttir, sem lék hlutverk Fíusólar í
þeirri sýningu sem ég sá, stal þó senunni með frá-
bærri frammistöðu og útgeislun. Fjölbreytilegur
barnahópurinn bar sýninguna hreinlega uppi með
leik og söng í nokkrum atriðum á meðan fullorðnu
leikararnir héldu sig til hlés. Þó að hinn sterki kar-
akter Fíusólar sem aldrei gefst upp sé rauði þráð-
urinn í leiksýningunni, líkt og í bókum Kristínar
Helgu, gengur boðskapurinn líka út á að sýna það
sem krakkar geta áorkað með samstöðu og samtaka-
mætti. Áhrif barnanna koma einnig fram í því að
sýningin var unnin í virku samstarfi við börnin sem
taka þátt í henni.
Maríanna Clara og Þórunn Arna hafa afmarkað
sögusvið leikgerðarinnar við heimili Fíusólar annars
vegar og skólastofuna og skólalóðina hins vegar og
nýtist hringsvið Borgarleikhússins vel til að skipta
á milli. Dásamlega litríkir og fallegir búningar Júlí-
önnu Láru Steingrímsdóttur fara vel við frábæra
leikmynd Evu Signýjar Berger, sem teygir sig upp til
lofts svo að sviðsrýmið nýtur sín til fulls, og leikur
lýsing Pálma Jónssonar lykilhlutverk í leikmyndinni
að sögn Evu Signýjar sjálfrar. Möguleikar formsins
eru þannig vel nýttir en um leið stendur sýningin
föstum fótum í söguheimi Kristínar Helgu. Hugsan-
legt er að þau sem ekki hafa kynnst sögunum verði
örlítið lengur að átta sig á fjölskylduhögum Fíusólar
og tengslum á milli persónanna, en persónugalleríið
er þó ekki svo stórt eða tengslin svo flókin að það sé
líklegt til að koma að sök.
Fíasól með bekknum sínum. Mynd: Íris Dögg Einarsdóttir.