Tíðindi Prestafélags hins forna Hólastiftis - 01.01.1984, Page 67

PRESTAFÉLAGS HINS FORNA HÓLASTIFTIS
71
ég sæi í andlit honum fyrir umbúðunum. Ég heyrði, að hann
hvíslaði einhverju, — og tókst mér að heyra, að hann var að
fara með „faðir vorið“. Ég las það til enda með honum og bað
svo fyrir honum í hljóði. Ég vissi ekki, hvort ég mætti eða ætti
að biðja honum lífs og bata, en mikið langaði mig til þess, að
hann mætti eiga lengra líf fyrir höndum. En ég óttaðist ör-
kumlin. Eg andvarpaði, um leið og ég reis á fætur: „Fiat
voluntas tua!“
„Hann ræður öllu og ræður vel
af ríkdóm náðar sinnar.
Hans stjórn nær jafnt um himinshvel
og hjólið auðnu minnar.“
Löngumýrarskóli í Skagafirði
Eins og flestum mun kunnugt á þjóðkirkjan skólasetrið að Löngumýri í
Skagafirði, en stofnandinn afhenti kirkjunni skólann að gjöf 1962. Til árs
1977 var rekinn húsmæðraskóli að Löngumýri, en veigamesta starfið þar nú
er orlofsdvöl aldraðra, sem hófust 1973 og hefur verið æ síðan. Þessi starf-
semi hefst í maímánuði ár hvert og lýkur í september. Að jafnaði eru
dvalargestir um 250 á hverju sumri og koma flestir þeirra frá Reykjavík en
einnig frá Akureyri, Kópavogi og bæjum og sveitum á Norðurlandi auk
nokkurra frá öðrum stöðum.
Á Löngumýri er reynt að búa vel að öldruðum. Lögð er áhersla á að þeir
komist í snertingu við náttúruna og geti notið sumarblíðunnar og fegurðar
Skagafjarðar. Dvalargestirnir fara í ferðalög, kvöldvökur eru byggðar upp
með fróðlegum erindum og ýmsu skemmtiefni og hvíldarstundir eru dag-
lega. Helgihald er í formi morgun- og kvöldbæna en auk þess fær fólkið
tækifæri til að heimsækja einhverja kirkju héraðsins á sunnudögum. Þetta
sumarstarf nýtur mikilla vinsælda og komast færri að en vilja.
Á vetrum fer ýmiskonar starfsemi fram á Löngumýri, svo sem fundir,
námskeið o.fl. Til dæmis hafa fermingarbörn víða að dvalið þar á nám-
skeiðum. Varmahlíðarskóli leigir þar einnig húsnæði fyrir heimilisfræði-
kennslu sína allan veturinn.
Sumar- og vetrarstarfinu á Löngumýri stjórnar forstöðumaður Löngu-
mýrarskóla, Margrét K. Jónsdóttir, en hún var áður skólastjóri og hefur nú
starfað við stofnunina frá 1967. Þ. H.