Morgunblaðið - 20.09.2003, Blaðsíða 23

ÁRBORGARSVÆÐIÐ
MORGUNBLAÐIÐ LAUGARDAGUR 20. SEPTEMBER 2003 23
„ÞETTA byrjaði þannig að við tókum
þátt í verkefni árið 1999 á vegum
staðardagskrár,“ sagði Jóna Ingv-
arsdóttir en hún og maður hennar
Sigurður Grímsson flokka allt sorp
sem til fellur á heimilinu. Þau búa
skammt utan bæjarmarka Selfoss í
húsinu Fossmúla sem þau fluttu í
1999. „Við höfum haldið því áfram
sem lögð var áhersla á í verkefninu og
reynslan segir okkur að þetta er eng-
in fyrirhöfn enda orðinn vani hjá okk-
ur að gera þetta jafnóðum og sorpið
verður til,“ segir Jóna en sorpið frá
heimilinu sem þau hjónin fara með í
sorpgáminn rúmast á viku hverri í
einum innkaupapoka.
Þetta er ótrúlegur árangur og því
ekki undarlegt þótt sú spurning vakni
hvernig þau fari að þessu. Sigurður
verður fyrir svörum og segir þau til
dæmis setja alla matarafganga og líf-
rænan úrgang í jarðgerðarkassa.
Pappír flokka þau og líka járndósir
ásamt mjólkurumbúðum. „Allur okk-
ar úrgangur fer á ákveðinn stað. Svo
tökum við til dæmis ekki plastpoka
þegar við kaupum grænmeti og
ávexti. Það eina sem við hendum eru
umbúðir, plast og fleira og þetta rúm-
ast í einum innkaupapoka, en þá tök-
um við öðru hverju til þess að hafa ut-
an um ruslið,“ segir Sigurður.
„Það væri auðvitað algjör bylting
ef allir tækju þetta upp og sorpið
myndi minnka umtalsvert. Og svo er
þetta alls engin fyrirhöfn né aukin
vinna fyrir okkur en í kaupbæti fáum
við afbragðs góða mold úr jarðgerð-
arkassanum. Við héldum fyrst að-
þetta væri mikil fyrirhöfn og vinna en
maður þarf ekkert til að byrja nema
jarðgerðarkassann,“ sagði Jóna. Hún
sagði að fólk hefði gaman af að ræða
þetta og þá kæmi fram að margir
teldu það eftir sér að þurfa að fara
með það sem flokkað væri á endur-
vinnslustöðvar en þau bentu fólki á að
það væri auðvelt að koma við hjá end-
urvinnslugámunum í leiðinni þegar
farið væri í búðir eða annarra erinda.
„Það er hins vegar ekkert gert í því
að halda þessu að fólki en ég held að
um leið og farið væri að greiða fyrir
sorpið, það er að segja að vigta sorp
frá heimilum og miða sorphirðu-
gjaldið við það þá myndi þetta breyt-
ast. Sorpbíllinn þarf til dæmis ekki að
koma hingað en auðvitað greiðum við
sorphirðugjaldið eins og aðrir og
hann kæmi ef við bæðum um það en
þess þarf ekki,“ sagði Jóna Ingv-
arsdóttir. „Það þarf að þjálfa fólk í
þessu og gera það meðvitað um þessa
flokkun og gagnsemi hennar. Þetta
er auðvitað nokkuð sem þarf að laga
að aðstæðum hvers og eins varðandi
íbúðir og íbúðarhús,“ sagði Sigurður.
Sigurður og Jóna í Fossmúla hafa flokkað heimilissorp í mörg ár
Morgunblaðið/Sigurður Jónsson
Sigurður og Jóna með heimilissorpið eftir vikuna.
Sorpið eftir vik-
una kemst fyrir
í innkaupapoka
Selfoss
FÉLAG eldri borgara í Hveragerði stendur á
tímamótum, því nú eru tuttugu ár síðan fé-
lagið var stofnað. Félagið var formlega
stofnað hinn 17. mars 1983, en næsta sunnu-
dag, 21. september, verður boðið til veislu.
Veislan hefst kl. hálfþrjú og eru allir félagar,
bæði núverandi og brottfluttir svo og velunn-
arar félagsins velkomnir. Eins og segir í aug-
lýsingu verður boðið upp á fróðleik, söng,
glens og gaman og ættu áhugasamir að láta
sjá sig.
Af félaginu er annars það að frétta að
vetrarstarfið er að hefjast, en sumarið var
notað til ferðalaga. Hópur fólks fór í júní sl.
á Vestfirði og einnig voru farnar tvær dags-
ferðir, önnur í Borgarfjörð og hin í Vík í
Mýrdal.
Auður Guðbrandsdóttir er formaður fé-
lagsins og sagði hún að í vetur yrði boðið
upp á m.a. föndur, leirlistarnámskeið, boccia,
málaralist, línudans, leikfimi, vatnsleikfimi,
bingó, spilavist, gönguferðir og jafnvel bók-
menntaupplestur svo eitthvað sé nefnt. Kóri
eldri borgara verður einnig starfræktur í
vetur undir stjórn Kristínar Sigfúsdóttur.
Fjölbreytnin í starfinu fer eftir þátttöku fé-
lagsmanna og ef áhugi er fyrir hendi kemur
til greina að bjóða einnig upp á tölvu-
námskeið, glerlistarnámskeið, matreiðslu-
námskeið og fleira. Ekki er búið að dagsetja
leikhúsferðir og aðrar ferðir en þær verða
auglýstar sérstaklega. Auk Auðar er stjórn
félagsins skipuð þannig, að varaformaður er
Erla Ragnarsdóttir, Ólafur Steinsson er
gjaldkeri, Jens Ásmundsson er ritari og með-
stjórnandi er Þórður Snæbjörnsson.Hópur eldri borgara sem fóru í sumarferð á Vestfirði síðastliðið sumar.
Vetrarstarf að hefjast í Þorlákssetri
Hveragerði
UNDANFARNIÐ hefur starfsfólk
umhverfisdeildar og áhaldahúss í
Hveragerði þurft að reka fé úr bæj-
arlandinu. Að sögn Kolbrúnar Þóru
Oddsdóttur umhverfisstjóra hafa
kindur getað valsað inn á skógar-
svæði eftir nýmalbikuðum Gufudals-
vegi.
Meginástæða þess að fé er innan
girðingar bæjarfélagsins er sú að
gamalt ristarhlið var fjarlægt við
Friðarstaði samfara framkvæmdun-
um. Féð hefur valdið miklu tjóni á
gróðri svo sem birkilundi sem tækni-
fyrirtæki í Reykjavík gróðursetti.
Birki er afar viðkvæmt fyrir beit
fyrstu árin, enda einstofna.
Sjö ár eru síðan að hafist var
handa við að planta í landgræðslu-
svæðið og ár hvert eru gróðursettar
um 20.000 plöntur. Fjöldi manna hef-
ur komið að útplöntun og umhirðu
skógarins, fjölmörg félagasamtök,
fyrirtæki, einstaklingar og gestir.
Fjögur ár eru síðan Vegagerðin
bað sveitarfélagið í Hveragerði um
að hægja á og hætta girðingarfram-
kvæmdum, því að sveitarfélög á höf-
uðborgarsvæðinu vildu sameinast
um eina afréttargirðingu. „Til að
tryggja sátt milli hagsmuna íbúa
þéttbýlis og dreifbýlis, þ.e. lausa-
göngu búfjár og annarrar tegundar
landnýtingar.“ Framkvæmdum við
girðingu sveitarfélaga og vegagerð-
ar á höfuðborgarsvæðinu er lokið.
Því miður er lausnin endaslepp, því
girðingin endar við Drottningarholu.
Drög að samningi milli Hvera-
gerðis og Ölfuss liggja fyrir. Meðan
samningur er óundirritaður er óljóst
hvert stefnir.
Kindur kom-
ast í land-
græðsluskóg
Hveragerði
Morgunblaðið/Margrét
Trjágróður er víða illa farinn.
Í OKTÓBERMÁNUÐI verða haldin
íbúaþing í Sveitarfélaginu Árborg,
eitt í hverjum byggðakjarna fyrir sig,
auk kvöldfundar með íbúum dreif-
býlisins. Á þingunum gefst íbúum
tækifæri til þess að taka virkan þátt í
mótun framtíðarstefnu, áherslna og
markmiða fyrir sveitarfélagið og þá
byggðakjarna sem mynda það.
Íbúaþingin verða haldin sem hér
segir: á Eyrarbakka laugardaginn 4.
október kl. 10–18; á Stokkseyri
sunnudaginn 5. október kl. 10–18; í
Sandvík þriðjudaginn 7. október kl.
20–22.30 og að lokum á Selfossi laug-
ardaginn 18. október kl. 10–18. Nið-
urstöður úr íbúaþingunum verða
kynntar á opnum fundi þriðjudaginn
21. október kl. 20–22 á Selfossi.
Megintilgangur íbúaþinga er að
gefa íbúum sveitarfélaga tækifæri til
að tjá sig um það hvernig þeir vilja
sjá sveitarfélagið sitt þróast. Einnig
er reynt að kalla eftir hugmyndum
íbúa um hvernig megi láta það ger-
ast.
Íbúaþingin eru liður í gerð nýs að-
alskipulags fyrir allt Sveitarfélagið
Árborg, sem nú er unnið að á Vinnu-
stofunni Þverá ehf. Aðalskipulagið er
hið fyrsta sem gert er eftir stofnun
Sveitarfélagsins Árborgar við sam-
einingu fjögurra sveitarfélaga. Það
er ráðgjafarfyrirtækið Alta sem hef-
ur umsjón með íbúaþingunum fyrir
hönd Vinnustofunnar Þverár.
Íbúaþing í Árborg
Íbúar taki
þátt í að
móta fram-
tíðarstefnu
Árborg