Frjáls verslun - 01.05.2011, Síða 57

FRJÁLS VERSLUN 5.tbl.2011 57
Húmor, lífsorka
og réttlætiskennd
Dr. juris. Herdís Þorgeirsdóttir
prófessor
„Mínar fyrstu minningar um eldri systur mína,
Herdísi, eru um hávaxna stelpu með dökkt hár og
bjartan svip. Höfuðeinkenni hennar, greind, húmor,
lífsorka, ákveðni og réttlætiskennd, komu snemma
fram,“ segir Þorsteinn Þorgeirsson, sérstakur ráðgjafi
á skrifstofu bankastjóra Seðlabanka Íslands. „Hún
hefur af ást og elju komið fjórum mannvænlegum
börnum á legg samhliða störfum sem fræðimaður
og prófessor. Herdís er bæði stjórnmálafræðingur og
lögfræðingur. Hún stundaði framhaldsnám í Banda­
ríkjunum og Svíþjóð og varð önnur íslenskra kvenna
til að verða doktor í lögum. Rannsóknir hennar
á sviði tjáningarfrelsis fjölmiðla og kenningar um
sjálfsritskoðun hafa vakið alþjóðlega athygli. Þá hefur
hún unnið fyrir Evrópusambandið og Evrópuráðið á
vettvangi mannréttinda og stjórnskipunar. Frá fyrstu
tíð hefur Herdís kunnað að keyra upp góða stemmn­
ingu og verið vinsæl. Margir leita ráða hjá henni. Hún
er góður samfélagsrýnir og hefur lengi andæft spillingu.
Ýmsir hafa unnið gegn henni fyrir vikið. En hún á
sterka og góða fjölskyldu og vini. Þegar Evrópusam­
tök kvenlögfræðinga tilnefndu hana sem eina af
fyrirmyndum kvenna í Evrópu á síðasta ári kom það
mér ekki sérstaklega á óvart.“
(Herdís er forseti Evrópusamtaka kvenlögfræðinga (EWLA).)
Þorsteinn Þorgeirsson, sérstakur ráðgjafi á skrif­
stofu bankastjóra Seðlabanka Íslands.