Alþýðumaðurinn - 14.04.1976, Blaðsíða 2

& AL LM ÞÝÐ Otgefandi: Alþýðnflokksfélag Akureyrar. — Ritstjóri og ábm. - Hjörleifur Hallgríms. UMAÐURINN ->»
Afgreiðsla og auglýsingar Strandgötu 9, sími 1-13-99.
IÞRÓTTIR
Iðnfræðslulöggjöf og
iðnréttindi
Nýlega átti Iðnskólinn á Akureyri 70 ára afmæli og var
þess minnst að verðleikum. Skólinn hefur átt því láni að
fagna, að við hann hafa starfað afbragðsmenn og húsnæði
hans samsvarar nú þeim kröfum, sem til skólans eru
gerðar.
Afmæli skólans vekur hugleiðingar um stöðu iðnfræðsl-
unnar og iðnréttinda með þjóðinni. Hinn forni iðnaður,
handverkið, mótar enn hugmyndir okkar um iðnað, enda
þótt verksmiðjuiðnaður sé sívaxandi þáttur í lífskjörum
okkar. Iðnlöggjöfin á sér rætur aftur í miðöldum, þegar
iðnaðarmenn stofnuðu lokuð félög — iðngildin — til að
vernda hagsmuni sína. Atvinnuréttindi voru takmörkuð
við meðlimi iðngildanna og iðnnemar voru aðeins teknir
í iðnina, að iðnmeisturunum svo þóknaðist.
Þetta er auðvitað allt að breytast. Iðnskólarnir taka nú
í vaxandi mæli við menntun iðnaðarmanna, jafnt bók-
legri sem verklegri og möguleikar opnast á að gera iðn-
menntunina miklu víðtækari og betri.
En er þá ekki líka ástæða til þess að endurskoða hina
fornu verkaskiptingu milli iðnaðarmanna? í dag eru
mörkin óskýr milli starfsgreina rafvirkja og rafvélavirkja
í sumum tilvikum, milli hinna ýmsu hópa prentiðnaðar-
ins, milli starfshópa, sem starfa við húsbyggingar og
þannig mætti lengi telja.
Er ekki kominn tími til þess að draga upp á nýtt mörk-
in milli hinna ýmsu starfshópa og mennta iðnaðarmenn
okkar þannig að þeir fái að námi loknu miklu víðtækari
starfsréttindi en nú er? Þannig útskrifuðu iðnskólarnir
t. d. byggingariðnaðarmenn, sem hefðu þekkingu og starfs
réttindi til flestra þeirra verka, sem húsbyggingum fylgja,
hvort sem það tilheyrði trésmíði eða múrverki skv. ríkj-
andi skipulagi. Þótt fullri reynslu í hverjum einstökum
þætti húsbygginga verði fyrst náð með starfsþjálfun, þá
myndi þetta fyrirkomulag skapa meiri sveigjanleka í at-
vinnumálum þjóðarinnar og það myndi skapa viðkom-
andi iðnaðarmönnum meiri fjölbreytni og lífsfyllingu á
starfsævi sinni. Það sama má segja um járniðnaðarmenn,
prentiðnaðramenn, rafiðnaðarmenn og fleiri starfsstéttir.
Við ættum að fjarlægja þá milliveggi sem reistir hafa
verið að óþörfu milli starfsmanna á sama sviði í uppbygg-
ingu iðnaðar okkar. Þótt slíkt væri fyrst og fremst til fram
fara fyrir stétt iðnaðarmanna, þá myndi þjóðfélagið í
heild einnig hagnast á því.
Heiðursmerki
Oft er rætt um heiðursmerki og veitingar þeirra gagn-
rýndar sem hégómi og prjál. Víst má margt að orðu-
veitingum finna. Við eigum nú í stríði við Breta, þar sem
landvarnarmenn okkar, starfsmenn Landhelgisgæzlunnar,
leggja líf sitt í hættu á degi hverjum. Við getum bætt
aðstöðu þeirra á margvíslegan hátt og það er ekki sagt til
að draga úr eindregnum stuðningi fjárveitingavalds og
annarra stjórnvalda við Landhelgisgæzluna, þegar þeirri
hugmynd er varpað hér fram, hvort ekki sé nú ástæða til
þess að stofna til sérstaks heiðursmerkis, Landvarnarorð-
unnar, sem veitt verði sem lítill þakklætisvottur þjóðar-
innar til þeirra, sem sérstaklega skara fram úr í land-
helgisstríðinu. Slíkt heiðursmerki geta menn borið með
stolti, löngu eftir að fullur sigur er unninn og átökunum
á miðunum linnir.
BF
iHörður Hilmarsson til KA
\
Hörður Hilmarsson, landsliðs-
maðurinn snjalli úr Val í
knattspyrnu, gekk yfir í KA
mánudaginn 5. apríl. Eins og
kunnugt er hefur hann leikið
með KA í handknattleik í 4 ár
og einnig þjálfað þar við góð-
an orðstír.
Er þetta án efa geysilegur
fengur fyrir Knattspyrnufélag
Akureyrar að fá þennan
leikna og kraftmikla leik-
mann, en um leið er höggvið
stórt skarð í 1. deildarlið Vals,
svo stórt að erfitt verður að
byrgja það í náinni framtíð.
Mun Hörður að öllum líkind-
um verða fyrirliði KA í sum-
ar og taka við þeirri stöðu af
gömlu kempunni Þormóði Ein
arssyni að hans eigin ósk.
Einnig mun það vera ákveðið
að Hörður taki að sér þjálfun
tveggja flokka, og verði jafn-
vel starfsmaður féiagsins í
sumar, en KA mun sennilega
fá aðstöðu fyrir skrifstofu, bað
og búninga í Lundarskóla, en
skólastjórn skólans á eftir að
gefa svar.
Hörður hefur hugsað sér í
framtíðinni að búa í næsta ná-
grenni við íþróttasvæði KA,
en hann hefur gert samning
um kaup á íbúð þar í blokk,
sem byrjað verður að byggja
bráðlega.
Einar Helgason mun verða
aðalþjálfari félagsins í sumar
eins og búist var við eftir gott
keppnistímabil í fyrra. Mun
Einar þjálfa eins og þá meist-
ara- og annan flokk, sem tek-
ur nú þátt í íslandsmóti í
fyrsta sinn. Honum til aðstoð-
ar verður fyrrverandi lands-
liðsmaður KA, Kári Árnason,
sem vart þarf að kynna hér.
Er mikils að vænta af sam-
starfi þessara tveggja reynslu-
miklu manna.
Ákveðið er að Steinþór Þór-
arinsson og Jóhann Jakobsson
þjálfi svo sinn flokkinn hvor.
Og þeim til aðstoðar svo og
Herði verða; Trausti Haralds-
son, Stefán Arnaldsson, Ólafur
Haraldsson og Magnús Þor-
valdsson. Áhugi er fyrir að
koma á fót kvennaknatt-
spyrnu og einnig æfingum fyr
ir eldri félaga' — „01d-boys“.
Gunnar Blöndal — Siglfirð-
ingurinn baráttuglaði — er
kominn til KA aftur, eftir
eins árs fjarveru og kemur
hann til með að styrkja fram-
línu liðsins til mikilla muna,
með krafti sínum og hraða.
Guðjón Harðarson, sem lék
með mfl. Vals fyrir 2 árum,
mun koma til KA og er búið
að ganga frá öllu hvað honum
viðvíkur. Er þarna um að
ræða lágvaxinn og eitilharðan
leikmann.
Sigbjörn Gunnarsson mun
leika með liðinu í sumar af
krafti, en eins og kunnugt er
lék hann aðeins síðustu leik-
ina í fyrra og gerði það líka
mjög vel.
Haukur Jóhannsson, hinn
landsfrægi skíðakappi, byrjar
nú aftur af krafti eftir tveggja
ára hvíld á knattspyrnunni.
KA bindur miklar vonir við
þessa ofangreindu leikmenn
um leið og þeir eru boðnir vel-
komnir til samstarfs við þjálf-
ara, leikmenn og stjórn. Einn-
ig fagnar félagið því að allir
fasta-leikmenn félagsins frá í
fyrra verða með í sumar og
einnig hafa bætst við margir
nýir, ungir leikmenn, þannig
að breiddin verður mikil á
komandi sumri og barátta um
hvert sæti.
Knattspyrnudeildin bindur
miklar vonir við að stuðnings-
menn liðsins kaupi KA-vörur,
sem seldar verða á hinum
ýmsu stöðum. Er þarna um að
ræða trefla, húfur o. m. fl. í
lit búninga félagsins. Eru það
ýmis fyrirtæki og einstakling-
ar sem fjármagna rekstur fé-
lagsins, en eins og kunnugt er,
er fjármagnið kringum svona
félagsrkestur gífurlegur. Eins
mun KA standa fyrir hefð-
bundinni fjáröflun þ. e. a. s.
með bingó og dansleikjahaldi
o. fl.
Tilkoma Twin Otter-flug-
vélar Flugfélags Norðurlands
er algjör bylting fyrir liðið,
styttir keppnisferðir og eykur
þægindi og öryggi í ferðum.
Þó skal ekki gert lítið úr þjón
ustu Flugfélags íslands þótt
sú þjónusta hafi ekki hentað
félaginu eins vel. Við Flugfél.
Hörður Hilmarsson.
Norðurlands voru gerðir fast-
ir samningar og lækkar það
kostnaðinn og kjörin verða
mun betri en áður.
Aðalstjórn félagsins styður
deildina mikið og er ætíð til-
búin við að aðstoða, en þar er
Haraldur Sigurðsson banka-
maður í fararbroddi.
Eins og áður greindi bindur
KA miklar vonir við sumarið
og lítur björtum augum á
framtíðina enda ekki furða og
viljum við enn bjóða hina
nýju leikmenn velkomna og
ekki síst hinn nýja fyrirliða,
Hörð Hilmarsson.
Stjórn knattspyrnudeildar:
Stefán Gunnlaugsson, formað-
ur, Eiður Eiðsson, Guðmundur
Björnsson, Siguróli Sigurðs-
son, Örlygur ívarsson og Þor-
móður Einarsson.
Fyrsti leikur KA í 2. deild
verður við Hauka frá Hafnar-
firði og verður leikinn þar. Og
annar leikurinn er svo við
„erkifjendurna“ Þór.
Viðtalið hér að ofan var við
formann knattspyrnudeildar
KA, Stefán Gunnlaugsson, og
þökkum við honum kærlega
fyrir greinagóð svör.
í næsta tölublaði verður
Þóroddur Hjaltalín, formaður
knattspyrnudeildar Þórs, tek-
inn tali um komandi sumar.
mþ/sa.
Aðalfundur
F.U.J. heldur aðalfund sinn þriðjudagskvöldið 20.
apríl kl. 8.30 í fundarsalnum að Strandgötu 9.
Venjuleg aðalfundarstörf.
STJÓRNIN.
2 — ALÞÝÐUMAÐUBINN