Litli Bergþór - 01.12.2009, Blaðsíða 25

Kvenfélagspistill
Þegar Kvenfélagið var stofnað, fyrir 80 árum, 15.
apríl 1929, voru aðstæður töluvert aðrar en nú.
Konur unnu heima, sinntu búi og börnum og héldu
flestar stórt heimili þar sem mikið var að gera. Þá
var mikil þörf fyrir félög af þessu tagi, bæði vegna
félagslegra tengsla við aðrar konur í sveitinni og
ekki síður fyrir þá samfélagsaðstoð sem í verkum
þeirra fólst.
Þá voru samgöngur allar erfiðari. Ekki voru
akvegir um alla sveit enda áttu fáir bíla til að ferðast
um á. Það aftraði konum þó ekki frá því að sækja
fundi eða sinna ýmsum störfum í þágu félagsins. Þá
var farið á hestum eða einfaldlega gengið á milli
bæja.
Við höfum hinsvegar ekki síður þörf fyrir kven-
félagið í dag. Flestar konur vinna að vísu utan heim-
ilis og hitta annað fólk. Svo þegar heim er komið
bíða heimilisverkin og börnin og allt sem sinna þarf
á einu heimili. Við höfum þó fulla þörf fyrir að hitt-
ast og ræða málin, slaka á eftir erilsaman dag og
leggja á ráðin um hvar við berum niður næst til að
rétta hjálparhönd, hvort heldur er um að ræða
einstaklinga sem orðið hafa fyrir áföllum, eða heilsu-
stofnanir sem bráðvantar tæki til að bæta megi þjón-
ustu við sjúka og aldraða. Við höfum heldur ekki
gleymt unga fólkinu okkar, því félagið hefur í
áranna rás gefið ýmsar gjafir bæði til leik- og
grunnskólans í Reykholti.
I 2. grein laga Kvenfélagsins segir: „Tilgangur
félagsins er að stuðla að kynningu og samvinnu
kvenna í sveitinni og vinna að hvers konar menning-
ar- og mannúðarmálum sveitarbúa.“ Þessi grein
hefur staðið nánast óbreytt frá stofnun félagsins,
einungis örlitlar breytingar hafa verið gerðar á
orðalagi og er hún enn í fullu gildi. Starf kven-
félagsins hefur þroskast í takt við tíðarandann enda
koma oft nýir og ferskir straumar með nýjum
konum.
Stjórn félagsins ákvað að minnast 80 ára afmælis-
ins með fjölbreyttum hætti og tilnefndi fyrrverandi
formenn í afmælisnefnd ásamt núverandi formanni.
Fyrst á dagskrá afmælisársins var sameiginleg
árshátíð Kvenfélags Biskupstungna,
Hestamannafélagsins Loga og Leikdeildar
Ungmennafélags Biskupstungna. Hún var haldin í
Aratungu 21. mars s.l. Þá hélt Hestamannafélagið
upp á 50 ára afmæli sitt, en Ungmennafélagið fagn-
aði aldarafmæli sínu á síðasta ári. Nú um nokkurra
ára skeið hafa félögin sameinast um þessa árshátíð
og hefur það tekist með ágætum.
I apríl brugðu kvenfélagskonur undir sig betri
fætinum og fóru í helgarferð í Hveragerði.
Heimsóttum við m.a. Heilsustofnun NLFI og fleiri
áhugaverða staði og enduðum með kvöldvöku og
hátíðakvöldverði á Hótel Örk.
Vorfundurinn var haldinn á Hótel Geysi og var
hann með hátíðlegu yfirbragði. Konur úr stjórn SSK
heiðruðu okkur með nærveru sinni og var ýmislegt
Margrét Annie Guðbergsdóttir afhenti Ingibjörgu Bjarnadóttur
heiðursskjal.
til skemmtunar og fróðleiks, auk hefðbundinna
fundarstarfa.
í tilefni þessara tímamóta var Ingibjörg
Bjarnadóttir kjörin heiðursfélagi. Hún hefur verið
ein af styrkustu stoðum Kvenfélagsins í áratugi.
Ingibjörg bjó í Lyngási, ásamt eiginmanni sínum
Herði Sigurðssyni, en þau búa nú í Hveragerði.
Fyrsta vetrardag héldu kvenfélagskonur ásamt
mökum, á vit ævintýranna. Ferðinni var heitið í
„leikhúsveislu“ í Borgarleikhúsinu að sjá
Söngvaseið. Aður en leiksýning hófst fengum við að
skyggnast að tjaldabaki og skoðuðum leyndardóma
leikhússins. Því næst var snæddur kvöldverður áður
en við sáum Söngvaseið.
Starf kvenfélagsins er þó ekki eintómur glaumur
og gleði, þó vissulega veiti það okkur ánægju, og
gefi okkur færi á að styrkja félagsböndin. Tilgangur
félagsins er eins og fyrr segir, að stuðla að kynningu
og samvinnu kvenna í sveitinni og jafnframt að
styrkja góð og verðug málefni.
Aður fyrr stóðu félagskonur að ýmiskonar
veitingasölu en nú eru erfidrykkjur það eina sem
kvenfélagið stendur að þegar þess er óskað. Allur
hugsanlegur ágóði af þeim rennur óskiptur til mann-
úðar og menningarmála, mest innan sveitarinnar.
Önnur fjáröflun félagsins var árlegur sumar-
markaður sem haldinn var í tjaldi við Bjarnabúð,
fyrstu helgina í júlí. Svo eru seldar pylsur í réttun-
um, ásamt kaffi og með því. Jólamarkaðurinn okkar
var síðan á sínum stað í Aratungu fyrstu helgina í
aðventu.
Jólatrésskemmtunin fyrir börnin verður haldin á
2. í jólum í Aratungu.
Kvenfélagskonur hafa verið duglegar að ferðast
saman og farnar hafa verið óteljandi skemmtilegar
ferðir víðsvegar um landið. Fyrir þremur árum
ákváðum við svo að icggja heiminn að fótum okkar
og fyrsti viðkomustaðurinn var Búdapest. Af því
tilefni var gefin út uppskriftabók sem hlaut titilinn:
„Tungnaréttir". Með sölu þessarar bókar náðum við
að létta undir með okkur varðandi ferðakostnað.
25 Litli Bergþór