Morgunblaðið - 22.07.2001, Blaðsíða 13
MORGUNBLAÐIÐ SUNNUDAGUR 22. JÚLÍ 2001 B 13
bílar
®
VW PASSAT W8 kemur á markað í
Þýskalandi í september nk. og þar
með býður fyrirtækið í fyrsta sinn
bíl sem flokkast sem stór lúxusbíll
(upper luxury). Bíllinn er með átta
strokka vél sem skilar 275 hestöfl-
um og verður með sítengdu aldrifi.
Sala á honum hefst síðar á öðrum
mörkuðum, þar með töldum Banda-
ríkjamarkaði. Á næsta ári koma þrír
aðrir stórir lúxusbílar á markað frá
VW, þ.e. D1 lúxusbíllinn, stór jeppi
og sérstæður sportbíll með tólf
strokka miðjuvél.
D1 verður frumkynntur á bíla-
sýningunni í Genf næsta vor. Hann
verður að líkindum með V10 dísilvél
og W12 bensínvélinni, sem nú er
boðin í Audi A8. Talið er að D1
muni kosta frá 75 þúsund evrum,
um 6,6 milljónum ÍSK.
Jeppinn, sem til stóð að héti Colo-
rado, kemur á markað næsta vor,
með annaðhvort W8 eða V10 dís-
ilvél. VW hefur nú fallið frá því að
kalla jeppann Colorado.
Þess er vænst að VW sýni frum-
gerð W12 sportbílsins á bílasýning-
unni í Tókýó í október nk. Á næsta
ári má síðan búast við því að menn
geti rekist á framleiðslugerð bílsins
á sýningum. Ekki er búist við að
fleiri en 50-150 bílar verði fram-
leiddir á hverju ári.
Passat W8 verður framleiddur í
verksmiðjum VW í Emden og Mos-
el, þar sem aðrar gerðir Passat eru
nú framleiddar, en hinir þrír lúx-
usbílarnir í svokallaðri „glerverk-
smiðju“ VW í Dresden. Þar fer sam-
setning bílanna fram fyrir opnum
tjöldum og geta kaupendur bílanna
fylgst með vinnu við bíla sína í
gegnum skilrúm úr gleri.
Passat W8 mun kosta allt að
40.700 evrum, 3,6 milljónum ÍSK.
VW bindur vonir við að bíllinn verði
vinsæll meðal kaupenda stórra lúx-
usbíla. Á síðasta ári seldust 500 þús-
und Passat-bílar í heiminum, þar af
70 þúsund V6 bílar. Helmingur V6
bílanna seldist í Bandaríkjunum.
Síðastliðin fimm ár hefur Passat
verið mest seldi bíllinn í flokki
stórra meðalstærðarbíla. Audi, sem
tilheyrir VW-samsteypunni, hefur
notið velgengni í sölu bíla í flokki
stórra lúxusbíla og stjórnendur VW
telja að nú sé kominn tími til að
bílar með VW-merkið blandi sér í
slaginn.
VW hefur sett sér hógvær mark-
mið með Passat W8. Ráðgert er að
það seljist 8 þúsund bílar á næsta
ári og 10 þúsund á ári eftir það.
Helmingur sölunnar er ráðgerður í
Bandaríkjunum, 33% hennar í
Þýskalandi og afgangurinn annars
staðar í Evrópu. Bíllinn verður boð-
inn jafnt í stallbaks- og langbaks-
gerð og gerir VW ráð fyrir að 90%
sölunnar í Bandaríkjunum verði
stallbakar en í Þýskalandi verði 70%
sölunnar langbakar.
VW inn á lúxusbílamarkaðinn
50-150 W12 sportbílar verða framleiddir á ári.D1 keppir við Mercedes Benz, BMW og Audi.
VW Passat W8 er væntanlegur í haust. Fyrsti jeppi VW kemur á markað á næsta ári.