Morgunblaðið - 16.09.2004, Blaðsíða 60
SEX mönnum, þar af fjórum kajakræðurum
Blindrafélagsins, var bjargað úr miklum sjáv-
arháska við Grænlandsstrendur í gærkvöldi eftir
að vélbátur, sem sótti þá, sökk í ofsaveðri með
öllum búnaði leiðangursins.
Fartölvur leiðangursins, gervihnattasímar,
kajakarnir og allur búnaður glataðist, auk vél-
bátsins sem fórst. Að sögn tengiliðs leiðangurs-
ins varð slysið um klukkan 21 í gærköldi þegar
verið var að flytja kajakræðarana frá þeim stað
þar sem þeir luku leiðangrinum, við Napasors-
uaqfjörð við austurströnd Grænlands. Um borð
voru skipstjóri, aðstoðarmaður hans og ræð-
ararnir fjórir sem voru í leiðangrinum.
Vélbáturinn sótti þá í fyrradag og beið í 35
metrum á sekúndu við nálæga vík áður en fært
þótti orðið á sjó. Þegar lagt var af stað fór sjór
hins vegar að leka inn á vélina og lenti hann í
miklum sjógangi sem endaði með því að báturinn
brotnaði undan mönnunum og munaði litlu að
hann ræki stjórnlaust upp á sker. Var neyðarkall
sent út og kom þyrla fljótt á vettvang og hífði
mennina upp. Voru þeir fluttir til Kangarlussuaq
á vesturströndinni og koma heim á mánudag.
Söfnunarsími fyrir þá sem vilja styrkja Blindra-
félagið og leiðangurinn er 902 5100.
Vélbátur sem sótti fjóra kajakræðara Blindrafélagsins fórst í ofsaveðri
Bjargað úr sjávarháska um borð í þyrlu
MORGUNBLAÐIÐ, KRINGLUNNI 1, 103 REYKJAVÍK, SÍMI 569 1100, SÍMBRÉF 569 1181, PÓSTHÓLF 3040,
ÁSKRIFT-AFGREIÐSLA 569 1122, NETFANG: RITSTJ@MBL.IS, AKUREYRI: KAUPVANGSSTRÆTI 1 FIMMTUDAGUR 16. SEPTEMBER 2004 VERÐ Í LAUSASÖLU 220 KR. MEÐ VSK.
Lágmúla og Smáratorgi
opið kl. 8-24
alla daga
Heilsukoddar
Heilsunnar vegna
VÍÐA bjuggu menn sig undir storm í gærkvöldi, enda hafði Veður-
stofan spáð hvassri austanátt með rigningu, fyrst sunnanlands og svo
norðan- og austanlands. Sjómenn og bátaeigendur huguðu að bátum
sínum í höfnum og var víkingaskipið Íslendingur engin undantekning
hvað það varðaði. Þeir Gunnar Marel Eggertsson skipasmiður og Böðv-
ar Gunnarsson voru í Þorlákshöfn í gær og gerðu ráðstafanir með því
að setja dælu í Íslending ef á þyrfti að halda.
Farið var að hvessa sums staðar sunnanlands seint í gær, en storm-
urinn var þó ekki það snemma á ferðinni að hann væri farinn að gera
usla fyrir miðnætti.
Morgunblaðið/Golli
Víkingaskipið búið undir storminn
ÍSLENSKA útvarpsfélagið, dótturfélag
Norðurljósa, hefur keypt helmingshlut í nýju
fjarskiptafyrirtæki, IP fjarskiptum ehf. Það
fyrirtæki á aftur helming í fyrirtækinu First-
mile á Íslandi ehf.
Fram kemur í fréttatilkynningu að First-
mile hafi byggt upp háhraða ADSL-fjar-
skiptanet á höfuðborgarsvæðinu og að IP
fjarskipti muni í samstarfi við Íslenska út-
varpsfélagið strax á þessu hausti bjóða net-
þjónustu með miklum hraða, allt að 20 mega-
bita á sekúndu, símaþjónustu og sjónvarp.
„Það sem býr að baki þessum kaupum hjá
okkur er einfaldlega áframhaldandi fjárfest-
ing í fjarskiptafyrirtækjum,“ segir Sigurður
G. Guðjónsson, útvarpsstjóri ÍÚ.
Kaupa nýtt
fjarskipta-
fyrirtæki
ÍÚ kaupir/C2
ENGIN matvöruverslun verður á
Stöðvarfirði þegar einu verslun
staðarins, Stöðfirzka verzlunar-
félaginu ehf., verður lokað á næstu
dögum vegna gjaldþrots. Skipta-
stjóri þrotabúsins hefur árangurs-
laust leitað eftir aðilum til að taka
við versluninni og sömuleiðis versl-
unareigendur undanfarin misseri.
Bæjarbúar þurfa því að aka til Fá-
skrúðsfjarðar eða Egilsstaða eftir
matvöru. Um 20 mínútna akstur er
á Fáskrúðsfjörð, en ríflega klukku-
tími til Egilsstaða.
Stöðfirzka verzlunarfélagið var
stofnað fyrir um þremur árum á
rústum kaupfélagsins á staðnum.
Lífeyrissjóður Austurlands á tæpar
einnar milljónar króna kröfu í búið,
en ekki er búið að lýsa kröfum í það
að öðru leyti.
Bæjarbúar eru mjög uggandi
vegna ástandsins, en ekki eiga allir
auðvelt með að aka til nágranna-
bæjanna til að kaupa matinn.
„Það verður skelfilegt að hafa
enga verslun á staðnum,“ segir Að-
alheiður Birgisdóttir, íbúi á Stöðv-
arfirði. „Hér eins og annars staðar
verslar fólk í Bónus á Egilsstöðum,
en að sjálfsögðu eru ekki allir þeirr-
ar gæfu aðnjótandi að komast í
Bónus, t.d. eldri borgarar og þeir
sem eru bíllausir. Verslunin hér hef-
ur því verið mjög mikilvæg. Mjólk-
ina og brauðið hefur maður keypt
hér og það verður því skelfilegur
missir þegar hún hættir því hér er
ekkert annað, ekki einu sinni
sjoppa. Á hinn bóginn segir það sig
sjálft að það hlýtur að vera erfitt að
reka verslun í 260 manna bæjar-
félagi.“
Sara Guðfinna Jakobsdóttir á
Stöðvarfirði segir einnig slæmt að
missa einu verslun staðarins, „en
þetta er bara það sem við höfum
sjálf skapað okkur,“ segir hún. „Það
er fullt af fólki sem fer vikulega í
Bónus á Egilsstöðum og verslar
fyrir vikuna þannig að verslun
þrífst ekki hér. En ég á eftir að
sakna þess að hafa ekki búð hér, því
ég notaði hana og mér finnst alveg
voðalegt að það eigi að loka henni.
Fjölmargt fullorðið fólk býr ein-
samalt og á ekki bíla og ég veit ekki
hvað það tekur til bragðs.“
Morgunblaðið ræddi við eldri
konu á Stöðvarfirði, en hún er bíl-
laus og sagði margt fólk af sinni
kynslóð eiga erfitt með að fara
verslunarferðir til nágrannabæj-
anna. „Það kemur sér náttúrlega
illa að hafa ekki einhverja verslun-
arholu með nauðsynlegustu mat-
vöru,“ sagði hún. „Það verður að
koma í ljós hvernig fólk fer að. Það
er ekkert vafamál, að þetta verður
alvarlegt ástand. En þetta er fá-
mennt byggðarlag og það er
kannski erfitt að reka verslun hér,
ekki síst síðan Bónusverslunin kom
á Egilsstöðum. En það er óþægilegt
að þurfa að fara til næsta fjarðar ef
það vantar eitthvert smotterí, t.d.
rjómafernu, ef mann langar til að
bjóða gestum upp á eitthvað.“ Seg-
ist hún munu verða að fá bílfar með
ættingjum til Egilsstaða.
Matvöruverslun að stöðvast á Stöðvarfirði vegna gjaldþrots
„Verður skelfilegur missir“
Erfitt fyrir bíllaust fólk að fara
langar leiðir til að kaupa í matinn
BEINAR veiðar á háfi í net eru nú hafnar á
ný við landið eftir nokkurt hlé. Það er neta-
báturinn Fönix VE sem stundar veiðarnar.
Hafa skipverjar farið þrjá róðra og verið að
fá um þrjú tonn í róðri. Háfinn selja þeir á
fiskmörkuðum í Bretlandi og fá allt að 300
krónum fyrir kílóið.
„Jú, við höfum verið að bera okkur eftir
háfi að undanförnu, svona samhliða ýsunni,“
sagði Kjartan Sigurðsson, skipstjóri á neta-
bátnum Fönix VE frá Þorlákshöfn, í samtali
við Morgunblaðið í gær. Hann var þá að
koma úr þriðju veiðiferð sinni og sagði afla-
brögðin ágæt, um þrjú tonn af háfi og tæpt
tonn af ýsu eftir þriggja daga veiðiferð.
Háfurinn er seldur á markaði í Bretlandi
og segir Kjartan B. Sigurðsson skipstjóri
verðið misjafnt, allt frá 100 krónum fyrir
kílóið og upp í 300 krónur.
Háfur verður mest rúmlega metri á lengd.
Hann er skætt rándýr eins og svo margir
frændur hans, en veiðir sér ýmsa smærri
fiska auk annars sem býðst. Háfar hafa ekki
verið vinsælir meðal sjómanna þar sem þeir
eru taldir éta fisk af önglum.
Morgunblaðið/Alfons
Benedikt Hallgrímsson og Kjartan B. Sig-
urðsson á Fönix landa háfi í Þorlákshöfn.
Allt að 300
krónum fyrir
háfinn
Leggja/D1
LÍTIÐ miðaði í samkomulagsátt í kjara-
deilu grunnskólakennara og sveitarfélag-
anna í gær, en áframhaldandi fundahöld
verða hjá ríkissáttasemjara í dag. Eiríkur
Jónsson, formaður Kennarasambands Ís-
lands, segir að nú sé verið að fara yfir
hugmyndir sem fram hafi komið og aðilar
að undirbúa lokasprettinn áður en boðað
verkfall skellur hugsanlega á.
Forystumenn sjómanna og útvegs-
manna sátu einnig á fundum í gær, og seg-
ir Ásmundur Stefánsson ríkissáttasemjari
ekki ljóst hverju þessi lota skilar. /4, 8
Lítið miðar í
kjaradeilum
♦♦♦