Fréttablaðið - 22.12.2005, Page 30

30 22. desember 2005 FIMMTUDAGUR
Blaðamaður brá sér í
Blómaval að skoða jólatré
og grennslast fyrir um
hvernig best sé að með-
höndla þau.
Margir vildu eflaust fegnir komast
hjá því að þurfa að ryksuga barr-
nálahaugana af stofugólfinu hjá
sér á þrettándanum. Fréttablaðið
leitaði til sérfræðings í jólatrjám
til að komast að því hvernig mætti
forðast það.
„Það er mjög mikilvægt að
geyma trén úti alveg fram á síð-
ustu stundu,“ segir Bjarni Ásgeirs-
son, yfirmaður jólatrjáadeildar
Blómavals. „Það vill gleymast að
tré eiga heima utandyra.“
Bjarni segir að það sé í raun
sáraeinfalt að komast hjá því að
tréð felli nálarnar þegar verið er
að koma því út í janúar. „Eitt sem
verður að muna er að saga flís
neðan af stofninum til að tréð geti
drukkið í sig vatnið sem við höfum
í fætinum. Það er yfirleitt liðið
svo langt síðan tréð var höggvið
að það hefur gróið fyrir sárið sem
myndaðist þá.“
Gott ráð er að stinga enda
stofnsins, eftir að sagað hefur
verið neðan af honum, í sjóðandi
heitt vatn í nokkrar mínútur. „Með
því að stinga trénu í sjóðandi heitt
vatn opnast vatnsæðarnar í trénu
betur og gerir vatnsupptökuna
auðveldari.“
Eitt af því sem Bjarni segir
fólk gjarnan gleyma er að það er
ekki nóg að setja bara vatn í fótinn
þegar tréð er sett upp. „Fyrstu
dagana þarf að hella daglega í fót-
inn. Þetta geta verið fleiri lítrar
af vatni sem tréð drekkur í sig,“
segir hann og bætir við að þá
hjálpi heitt vatn ekki og að ekki
séu til nein næringarefni sem
ráðlegt sé að bæta í vatnið. „Bara
kalt, hreint, íslenskt vatn.“
Bjarni segir þó trén misjöfn að
þessu leyti eftir tegundum. „Það
er mikilvægara að fylgja þessum
reglum með íslensku trén, sér-
staklega rauðgrenið, því það held-
ur barrinu síður en dönsku trén
sem við seljum mest af.“
Að sögn Bjarna fara trén stækk-
andi sem landsmenn taka með sér
heim og slaga oft hátt í þrjá metra
og fylla út í stofuna. „Við eigum
orðið svo stórar stofur.“
Vonandi verða leiðbeiningar
fagmannsins Bjarna til þess að
færri þurfi að eyða þrettándanum
í að tæma barrnálar úr ryksug-
upokum og geti þess í stað skellt
sér á brennu. ■
Einfalt að komast
hjá barrnálahafinu
VÖKVA VEL Gott er að stinga nýsöguðum stofninum ofan í sjóðandi heitt vatn
svolitla stund. Með því opnast vatnsæðarnar í trénu betur og það á auðveldara
með að sjúga upp vatnið. Fyrstu dagana eftir að tréð hefur verið sett upp þarf
að hella vatni daglega í jólatrésfótinn. Ekki þarf að hella heitu vatni og ekki eru
til nein næringarefni sem ráðlagt er að bæta í vatnið. Best er að hella bara köldu
vatni í jólatrésfótinn. Ef þessum ráðum er fylgt ætti jólatréð að standa vel fram á
þrettándann og barrnálarnar ættu að haldast á trénu en ekki á dúknum.
AÐ HEFJA SÖGUN Best er að hafa góða sög til að saga neðan af trénu. Best er að
saga ekki neðan af stofninum fyrr en tréð er sett inn. Tréð er best að geyma úti þar til
á síðustu stundu. Ekki þarf að saga mikið af, heldur rétt að opna sárið svo tréð geti
drukkið í sig vatnið sem sett er í fótinn.
SAGAÐ BEINT Ekki þarf að saga skáhallt í stofninn. Best er að saga bara beint. Þó
getur verið, ef jólatrésfóturinn er þröngur, að það þurfi að saga, eða höggva stofninn
svolítið til.
BJARNI ÁSGEIRSSON Yfirmaður jólatrjáadeild Blómavals gefur góð ráð til að halda
jólatrjánum fallegum fram yfir þrettándann. FRÉTTABLAÐIÐ/HARI