Morgunblaðið - 03.04.2006, Blaðsíða 12

12 MÁNUDAGUR 3. APRÍL 2006 MORGUNBLAÐIÐ
MINNSTAÐUR
Stykkishólmur | Ferjan Baldur, sem
hefur fengið nafnið „Gamli Baldur“ í
hugum Hólmara, hefur lokið hlut-
verki sínu að flytja fólk og bifreiðar
um Breiðafjörðinn. Baldur sigldi úr
höfn í Stykkishólmi á laugardaginn
áleiðis til Finnlands, þar sem skipið
verður áfram notað til ferjusiglinga.
Nýir eigendur tóku við skipinu og
fimm manna áhöfn sigldi því til nýrra
heimkynna.
Ferjan Baldur var nýsmíði og
smíðuð sérstaklega fyrir siglingar yf-
ir Breiðafjörð og sá Skipasmíðastöðin
Þorgeir og Ellert á Akranesi um
smíðina. Það var í maí árið 1990 sem
Baldur kom til Stykkishólms og hóf
siglingar yfir Breiðafjörð. Ferjan
hefur þjónað hlutverki sínu í 16 ár.
Tímamót í ferjusiglingum
á Breiðarfirði
Þegar Baldur kom úr sinni síðustu
áætlun á föstudag bauð samgöngu-
ráðherra, Sturla Böðvarsson, til mót-
töku um borð í Baldri starfsfólki Sæ-
ferða, ásamt öðrum sem tengst hafa
rekstri Baldurs á þessum 16 árum.
Hann sagði við það tækifæri að nú
væru ákveðin tímamót í ferjusigl-
ingum á Breiðafirði. Hér áður var
Baldur nauðsynlegur til að tryggja
samgöngur við suðurfirði Vestfjarða,
en nú er hlutverkið að færast yfir í
það að þjónusta ferðamenn. Ráð-
herra sagði að hann liti svo á að ferju-
siglingar yfir Breiðafjörð væru mik-
ilvægur hlekkur í samgöngum og
ferðaþjónustu. Hann lagði enn frem-
ur áherslu á vegirnir á sunn-
anverðum Vestfjörðum verði byggðir
upp og bættir eins og áætlanir segja
til um, breyttar ferjusiglingar hefðu
þar engin áhrif.
Gamli Baldur verður gerður út frá
Turku í Finnlandi og mun stunda
reglubundnar ferðir á milli Turku og
byggðu eyjanna í kring og eins fara
sumarferðir með ferðamenn. Að sögn
nýju eigendanna er Baldur fyrsta
skipið sem smíðað er á Íslandi og selt
er til Finnlands.
Barn síns tíma
Pétur Ágústsson, framkvæmda-
stjóri Sæferða, var mættur niður á
höfn að kveðja Baldur. Hann sagði að
Baldur hafi reynst vel. „Það hefur
aldrei dottið út dagur vegna bilunar
þessi ár sem ég hef komið að rekstr-
inum. Baldur er barn síns tíma, þó
hann sé ekki nema 16 ára gamall,“
segir Pétur. Hann bætir við að „þeg-
ar ferjan var hönnuð voru bílar miklu
minni en nú og strandferðaskipin sáu
um vöruflutninga. Nú eru bílarnir
fyrir ferðarmeiri, með tjaldvagna og
hjólhýsi í eftirdragi og vöruflutning-
arnir hafa færst yfir á þjóðvegina
sem þýðir að þeir hafa færst yfir á
ferjuna.
Það eru breyttir tímar og við erum
að bregðast við því með skipta út
Gamla Baldri,“ sagði Pétur Ágústs-
son er hann horfði á eftir Baldri sigla
frá bryggju og finnski fáninn blakti á
skipinu í norðanáttinni.
Sextán ára þjónustu Breiðafjarðarferjunnar Baldurs lokið og við taka ný verkefni í Turku í Finnlandi
Kveðjustund Pétur Ágústsson, framkvæmdastjóri Sæferða, óskar nýjum eigendum vel-
farnaðar. Finnarnir fimm sem sigla Baldri til Finnlands hafa dvalið hér í tvær vikur.
Morgunblaðið/Gunnlaugur Árnason
Úr höfn Gamli Baldur sem heitir nú Eivor siglir út úr höfninni í Stykkishólmi í síðasta skipti. Fleiri
verða ferðirnar ekki yfir Breiðafjörðinn, heldur stefnan tekin til Finnlands á vit nýrra verkefna.
Aldrei dottið úr dagur vegna bilunar
Eftir Gunnlaug Árnason
garnason@simnet.is
VESTURLAND
Borgarnes | Forvarnar- og vinavika ung-
menna stóð yfir í Borgarbyggð og á Akranesi
í síðustu viku. Húsráð ungmennahúsa á Akra-
nesi og Borgarnesi ásamt Nemendafélagi
Fjölbrautaskóla Vesturlands bauð upp á dag-
skrá fyrir unglinga og ungmenni m.a. til að
sýna fram á að auðvelt er að skemmta sér án
vímuefna. Var 10. bekkingum grunnskóla
þ.e. verðandi framhaldsskólanemum í haust,
boðin þátttaka í þessari vímuefnalausu dag-
skrá. Indriði Jósafatsson, æskulýðsfulltrúi í
Borgarbyggð, sagði að í raun hefðu það verið
ungmennin sjálf í ungmennahúsi, sem vildu
gera eitthvað fyrir þennan aldur. „Rann-
sóknir og staðreyndir sýna að stórleg aukn-
ing verður á neysluvenjum ungmenna á
fyrsta ári í framhaldsskólum, en það þarf
ekki endilega að vera sjálfsagður hlutur. Ég
tel að nokkuð vel sé haldið utan um forvarn-
arstarf á grunnskólastigi í flestum sveit-
arfélögum landsins en klárlega mætti gera
betur fyrir aldursstigið 16–18 ára.“
Dagskrá Forvarnar- og vinaviku var að-
allega í ungmennahúsum í Borgarnesi og
Akranesi en auk þess kom Nemendafélag
Fjölbrautaskóla Vesturlands inn í dagskrána
með fjölbreyttum og skemmtilegum hætti. Að
sögn Indriða var samstarf um þetta verkefni
milli þeirra sem stjórna æskulýðsstarfi þess-
ara sveitarfélaga og starfi í ungmenna-
húsum.
„Boot Camp“-æfing haldin
Dagskrá forvarnar- og vinavikunnar var
fjölbreytt og var m.a. boðið upp á kaffi-
húsakvöld, gestir komu frá Ástráði, félagi
læknanema, og voru með kynfræðslu fyrir
ungmennin. Halli Reynis trúbador hélt tón-
leika í Mími ungmennahúsi og sama kvöld
var haldin trúbadorkeppni í Hvíta húsinu á
Akranesi. Bílskúrshljómsveitir frá Akranesi
og úr Borgarnesi lögðu Bíóhöllina Akranesi
undir sig, Trúbador 2006 var tilkynntur og
kvennahljómsveit frá Fljótsdalshéraði tróð
upp. „Boot Camp“ æfing var haldin í íþrótta-
miðstöðinni Borgarnesi og Nemendafélag
Fjölbrautaskóla Vesturlands hélt íþróttadag í
íþróttahúsinu á Jaðarsbökkum. Grunnskólinn
í Borgarnesi var með vina- og forvarnarviku
fyrir 8. og 9. bekk en 10. bekkingar voru önn-
um kafnir í lærdómi vegna samræmdra
prófa. Vikunni lauk með vina og paraballi í
Félagsmiðstöðinni í Óðali.
Undirbúningur forvarnardaganna hefur
staðið yfir frá því í nóvember á síðasta ári og
segir Indriði marga hafa unnið þar að. „Svo
var það eiginlega tilviljun að grunnskólinn
hér kom inn í dagskrána en við buðum þeim
að vera með þegar þau kynntu vinaviku sem
átti reyndar að vera viku fyrr en var færð inn
í dagskrána, sem var frábært. Árshátíð-
arverk nemendafélagsins í ár er leikritið
Ávaxtakarfan og er það sannarlega hluti af
þessu líka, en það verk fjallar um mikilvægi
vináttu og bræðralags og hve einelti er öm-
urlegur hluti af mannlegum samskiptum.“
Indriði segir að sér sýnist að dagskráin hér
í Borgarnesi hafi gengið vel og virkilega sé
þörf á að vera með svona átaksverkefni, sér-
staklega fyrir þennan aldur. „Fagna ber líka
hve fyrirtæki sýna þessu mikinn velvilja og
ber þar helst að nefna fjárstyrk frá Sparisjóði
Mýrasýslu og Oddfellow-stúku auk annarra
sem láta sig forvarnir varða. Það sem mér
finnst standa upp úr, er hve samstarf þessara
sveitarfélaga, húsráða ungmennahúsanna og
stjórnar nemendafélags Fjölbrautaskóla
Vesturlands, Akranesi, hefur gengið vel og
klárlega gerir dagskrána mun viðameiri og
skemmtilegri fyrir ungmennin.
Ungmenni á báðum stöðum voru leiðandi í
hugmyndavinnu við að setja dagskrá þessa
upp og að sjálfsögðu að framkvæma hana.“
Fjölbreytt dagskrá í vinaviku og forvarnarstarfi ungmenna í Borgarbyggð og á Akranesi
Auðvelt að skemmta
sér án vímuefna
Vinkonur á vinaballi Agnes Jónasdóttir, Guðbjörg Helgadóttir og Hanna Laufey Jónasdóttir
skemmtu sér vel á vina- og paraballi sem haldið var í félagsmiðstöðinni í lok forvarnarviku.
Eftir Guðrúnu Völu Elísdóttur
gve@ismennt.is