Morgunblaðið - 10.08.2008, Blaðsíða 6

6 SUNNUDAGUR 10. ÁGÚST 2008 MORGUNBLAÐIÐ
ÍÞRÓTTIR
Sigurður Elvar Þórólfsson
skrifar frá Peking
seth@mbl.is
Ragna tapaði fyrri lotunni 21:6 og
þegar staðan var 19:7 í 2. lotu fyrir
Hirose gaf vinstra hnéð sig á Rögnu
og féll hún í gólfið. Það var strax
ljóst að meiðsli hennar voru það al-
varleg að hún gæti ekki haldið
áfram keppni og gaf hún því leikinn.
Mikil vonbrigði fyrir Rögnu sem
hefur lagt hart að sér við æfingar og
endurhæfingu eftir að hún varð fyr-
ir því óláni að slíta fremra kross-
band í vinstra hné í mars á sl. ári. Á
þeim tíma varð Ragna að gera það
upp við sig hvort hún færi í strax í
aðgerð og missti af tækifærinu til að
komast til Peking. Hún valdi að fara
í gegnum gríðarlega erfiða end-
urhæfingu og eru fáir sem hafa
komist í hóp 50 efstu á heimslist-
anum í einliðaleik kvenna – með
slitið krossband.
„Ég var ekkert að blóta eða
hugsa eitthvað neikvætt þegar ég
vissi að ég gæti ekki haldið áfram.
Ég hef glímt við þessi meiðsli frá
því í fyrra og ég hef alltaf þurft að
hugsa um hnéð á mér í leikjunum. Í
fyrstu lotunni fann ég að Hirose var
að reyna að láta mig reyna á hnéð.
Hún vissi alveg hvað hún var að
gera. Ég hef verið hrædd um að
eitthvað myndi gerast í hnénu á
mér en það var eiginlega lán í óláni
að þetta gerðist ekki á æfingunni í
gær eða á æfingu á allra síðustu
mánuðum. Þá hefði ég ekki komist
hingað.“
Erfið byrjun
Það var strax ljóst í upphafi leiks
að Ragna ætti erfitt verkefni fyrir
höndum gegn Hirose. Sú japanska
skoraði fyrstu tvö stigin áður en
Ragna komst á blað þegar Hirose
sló útaf. Ragna náði fyrstu alvöru
sókninni þegar hún skoraði sitt
fjórða stig og staðan á þeim tíma
var 10:4 fyrir Hirose. Smátt og
smátt breikkaði bilið á milli þeirra.
Hirose sló boltann hvað eftir annað
vinstra megin við Rögnu og þurfti
hún að beita vinstra hnénu í flestum
tilvikum.
Ragna var flutt til aðhlynningar á
sjúkrastofu strax eftir leikinn þar
sem Ágúst Kárason bækl-
unarlæknir og Gauti Grétarsson
sjúkraþjálfari fóru yfir stöðuna með
henni. „Ég veit ekki hvenær ég fer í
þessa aðgerð en ég hlakka til að fá
hnéð í lag. Ég veit að ég get höndlað
áföll og ég mun undirbúa mig sem
best fyrir aðgerðina. Ég ætla ekki
að hætta á þessum tímapunkti og ég
gæti alveg séð mig reyna að komast
á Ólympíuleikana í London árið
2012. Ég var að ræða við Ágúst
lækni um aðgerðina rétt áðan og
það er ljóst að ég fæ lítið sætt ör á
vinstra hnéð sem verður minning
mín um Peking,“ sagði Ragna Ing-
ólfsdóttir.
„Lán í óláni að þetta
gerðist núna en ekki fyrr“
„ÉG SÉ mig alveg reyna við Ólympíu-
leikana í London árið 2012 og ég
hlakka til að komast í aðgerð á
vinstra hnénu þar sem krossbandið
verður lagað. Ég komst í hóp 50 efstu
á heimslistanum nánast á öðrum
fætinum og ég er stolt af því að hafa
náð að komast á Ólympíuleikana
þrátt fyrir að vera með slitið kross-
band,“ sagði Ragna Ingólfsdóttir,
badmintonkona úr TBR, en hún varð
fyrir meiðslum í leiknum gegn Eriko
Hirose frá Japan í forkeppni einliða-
leiksins hér í Peking í gær. Þar með
hefur fyrsti íslenski íþróttamaðurinn
á þessum leikum lokið keppni.
Morgunblaðið/Brynjar Gauti
Búið spil Ragna Ingólfsdóttir leyndi ekki vonbrigðum sínum í gær þegar hún gerði sér grein fyrir því að hún hafði lokið leik vegna meiðsla.
 Ragna úr leik  Stefnir á ÓL 2012  Hnéð gaf sig þegar mest á reyndi
Í HNOTSKURN
»Ragna tapaði fyrri lotunnigegn Hirose 21:6, en stað-
an var 19:7 fyrir þá japönsku
þegar Ragna meiddist.
»Það tekur sex til níu mán-uði að jafna sig eftir að-
gerð á krossbandi en Ragna
stefnir á að komast á ÓL í
London árið 2012.
KÍNVERJAR byrjuðu vel á fyrsta
degi Ólympíuleikanna í gær og tóku
fyrsta gullið sem í boði var í 48 kg.
kraftlyftingum kvenna. Er það mark-
mið kínversku íþróttamannanna sem
á leikunum að reyna að tvöfalda verð-
launafjölda Kína frá leikunum í
Aþenu fyrir fjórum árum og hafa
menn æft með það markmið í huga í
langan tíma. Í Aþenu unnu Kínverjar
næstflest verðlaunin á eftir Banda-
ríkjamönnum sem tóku 35 gull á móti 32 gullum Kínverja og
Bandaríkjamenn eignuðust þar 68 silfur- eða bronsverðlaun en
Kínverjar aðeins 31 slík. Þá komu Rússar í þriðja sætinu og
Ástralar og Japanar þar á eftir.
Keppni hófst í fjölmörgum greinum í gær, meðal annars í
skotfimi, kraftlyftingum kvenna, hjólreiðum. Fyrst til að hljóta
gullverðlaun var Katerina Emmons frá Tékklandi en hún sigr-
aði í loftriffilskotfimi af 10 metra færi. albert@mbl.is
Heimamenn byrja vel
á Ólympíuleikunum
Fyrsta gullið í hús.
EFTIRMINNILEGASTA atriði
Ólympíuleikanna er vafalítið í huga
flestra glæsileg opnunarhátíðin en
það er annað sem á huga margra og
það er loftmengunin í borginni.
Fyrsta keppnisdaginn í gær mældist
mengunin í hæsta lagi um nokkurra
daga skeið en um tveggja vikna skeið
fram að leikunum hefur rignt talsvert
í Peking og nágrenni og því var
mengun með minnsta móti þegar
flestir erlendu gestirnir og íþróttafólkið kom til borgarinnar.
Nú er þó mengunarský yfir og fer stækkandi og hafa fjöl-
margir af þessu áhyggjur. Fjölmargir íþróttamenn, sérstaklega
frá Bandaríkjunum, ganga um með grímu fyrir vitum sér í
þeirri von að það breyti einhverju. Ljóst er að ekki verður
keppt með slíkan búnað fyrir vitum en líkur á því fara vaxandi
nema rigni í borginni á nýjan leik. Ekkert slíkt er þó í kortun-
um eins og sakir standa . albert@mbl.is
Mengun vandamál
og fer vaxandi
Mengunin versnar.
EIN helsta vonarstjarna Bandaríkjanna í
hnefaleikakeppni Ólympíuleikanna, hinn 19
ára gamli Gary Russell jr., verður ekki með á
leikunum eftir að hann féll í yfirlið við æfing-
ar í ólympíuþorpinu í gær. Var Russell, sem
tvívegis hefur unnið bandaríska titla í grein
sinni, að reyna sitt ýtrasta til að komast nið-
ur í þyngd til að keppa í léttari flokki með
þessum afleiðingum og missir af leikunum
fyrir vikið. Var hnefaleikarinn fluttur með
hraði á sjúkrahús þar sem hann er undir
eftirliti en ekkert mun ama alvarlega að
nema þreyta og matarleysi. Fyrir vikið
komst hann ekki í hefðbundna þyngdarmælingu sem nauðsyn-
leg er fyrir keppni. Mun hann fljúga heim í kjölfar vistarinnar
þar og væntanlega afar sár og svekktur auk þess sem vonir
Bandaríkjamanna um medalíu í hnefaleikakeppninni þykja nú
heldur litlar en Russell var jafnvel spáð gullverðlaunum fyrir
mótið. albert@mbl.is
Helsta von BNA í
hnefaleikum úr leik
Hnefaleikakeppnin
er hafin á leikunum
í Peking
RAGNA Ingólfsdóttir, badminton-
kona úr TBR, var fyrsti íslenski
keppandinn á Ólympíuleikunum í
Peking í Kína. Ragna hafði lengi
stefnt að því að komast á leikana en í
mars í fyrra varð hún fyrir alvar-
legum meiðslum í hné þar sem hún
sleit fremra krossband. Á þeim tíma
var hörð keppni um þau sæti sem
voru í boði á Ólympíuleikunum og
Ragna stóð frammi fyrir erfiðri
ákvörðun. Að fara í aðgerð á hnénu
og vera frá í sex til níu mánuði og
missa af þeim möguleika að safna
stigum og vinna sér keppnisrétt á
ÓL. Hún valdi að taka áhættuna og
reyna að þjálfa hnéð upp og sjá til
hvert það skilaði henni. Hún náði
markmiði sínu og komst á leikana og
ég efast um að margir af keppend-
unum á ÓL séu að keppa með slitið
krossband í hné. Fyrstu Ólympíu-
leikum Rögnu lauk því með snöggum
hætti en það er ánægjulegt að hún
skuli horfa fram á veginn og setur
hún stefnuna á ÓL í London árið
2012.
Opnunarhátíð ÓL fór fram á föstu-
dagskvöldið og er óhætt að segja að
Kínverjar hafi reynt að búa til stór-
kostlega sýningu. Sumt heillaði mig
upp úr skónum og annað ekki. Fyrir
þá sem sátu í áhorfendastúkunni voru
það smáatriðin sem ekki sáust í sjón-
varpsútsendingunni sem stóðu upp-
úr.
Innganga íþróttafólksins tók ótrú-
lega langan tíma enda erfitt að koma
því fyrir að kynna 204 þjóðir til leiks
með öðrum hætti. Örn Arnarson,
fánaberi Íslands, fékk minni athygli
en margir aðrir fánaberar.
Tenniskappinn Roger Federer frá
Sviss varð nánast að forða sér þegar
hópur íþróttafólks frá öðrum löndum
streymdi að honum til þess að fá að
taka mynd af sér með efsta manni
heimslistans í tennis. Þjóðverjinn
Dirk Nowitzki, leikmaður NBA-liðs-
ins Dallas Mavericks. Og svona mætti
lengi telja. Það varð allt vitlaust á
áhorfendapöllunum þegar körfu-
boltakappinn Yao Ming gekk inn á
leikvanginn með kínverska fánann.
Eftir að hafa séð stórsýninguna
sem stóð yfir í rúmlega fjóra tíma
bjóst ég við því að eldurinn myndi
loga í öllu þaki „fuglshreiðursins“
eins og aðalleikvangurinn er kallaður.
Fimleikamaðurinn Li Ning fékk þann
heiður að kveikja eldinn og var hann
hífður upp í rjáfur leikvangins þar
sem hann hljóp einn hring á þakkant-
inum áður en hann kveikti eldinn.
Sannarlega tilkomumikið. seth@mbl.is
Afrek hjá
Rögnu þrátt
fyrir allt
Á VELLINUM
Sigurður Elvar Þórólfsson
skrifar frá Peking