Skólavarðan - 01.10.2005, Blaðsíða 13

13
SKÓLAVARÐAN 7.TBL. 5. ÁRG. 2005
Löngu er viðurkennt að það skiptir
miklu fyrir kennara að geta sífellt
endurnýjað kunnáttu sína og hæfni. Í
kjarasamningi framhaldsskólakennara
er gert ráð fyrir að kennarar sinni endur-
menntun í 80 klukkustundir á ári utan
starfstíma skóla. Þeir þurfa að hafa yfir
að ráða nýjustu þekkingu á hverjum
tíma og aðferðum til að miðla henni.
Kröfur um að kennarar fylgist vel með í
starfi sínu og fagi aukast stöðugt. Því er
mjög mikilvægt að þeim standi til boða
góð endurmenntun og það fé sem lagt
er til hennar nýtist sem best í þessum
tilgangi. Hér á eftir verður gerð grein
fyrir samstarfsnefnd um endurmenntun
framhaldsskólakennara, starfssviði
hennar og helstu áhersluatriðum.
Samstarfsnefnd um endurmenntun
framhaldsskólakennara var stofnuð af
menntamálaráðuneytinu í samstarfi við
HÍK haustið 1987 til að sjá um og úthluta
fjármunum til endurmenntunar fyrir fram-
haldsskólakennara. Nefndin starfaði í
nokkur ár áður en hún var formlega skipuð
í árslok 1993 en þá var jafnframt skilgreint
að hlutverk hennar væri að ráðstafa því fé
sem menntamálaráðuneytið úthlutaði til
endurmenntunar framhaldsskólakennara
ár hvert, þ.á.m. styrkveitingum sem áður
höfðu verið í verkahring ráðuneytisins.
Samstarfsnefndin er þannig skipuð að frá
menntamálaráðuneyti kemur einn fulltrúi
sem jafnframt er formaður nefndarinnar
og einn fulltrúi frá Háskóla Íslands, tveir
frá Félagi framhaldsskólakennara og einn
frá FÍF (Félagi íslenskra framhaldsskóla).
Menntamálaráðuneytið gerir árlega
samning við EHÍ (Endurmenntunarstofnun
Háskóla Íslands) um framkvæmd nám-
skeiða, fjármál og rekstur nefndarinnar.
Sérstakur fulltrúi stofnunarinnar hefur yfir-
umsjón með fjárreiðum nefndarinnar og
framkvæmd námskeiða. Fulltrúi Háskóla
Íslands í nefndinni kemur frá uppeldis- og
kennslufræðiskor og frá árinu 2000 hefur
Félag íslenskra framhaldsskóla einnig átt
fulltrúa í nefndinni.
Samstarfsnefndin er nú svo skipuð að
formaður og fulltrúi menntamálaráðu-
neytis er Karl Kristjánsson, Hjördís Þorgeirs-
dóttir er fulltrúi FÍF, fulltrúar FF eru Anna
María Gunnarsdóttir, sem jafnframt er
ritari nefndarinnar, og Ósa Knútsdóttir,
fulltrúi Háskóla Íslands er Hafdís
Ingvarsdóttir, Ragnheiður Heiðreksdóttir
er faglegur starfsmaður nefndarinnar og
fulltrúi EHÍ er Oddný Halldórsdóttir.
Í fyrstu sá nefndin einungis um úthlutun
til sumarnámskeiða í samvinnu við fagfélög
framhaldsskólakennara en síðar bættist
við vettvangsnám sem var greinabundið
nám á starfstíma skóla. Smám saman jókst
svo umfang starfseminnar og alls kyns
námskeið voru styrkt af nefndinni; átaks-
verkefni ýmiss konar, farandnámskeið
fyrir skóla, fyrirlestrahald í skólum auk
styrkja til einstaklinga og fagfélaga vegna
annarra námskeiða og ráðstefna. Frá 1999
- 2004 stóð yfir átak á sviði upplýsinga- og
tölvutækni þar sem m.a. var boðið upp á
vettvangsnám og styrki til einstaklinga til
að sækja námskeið að eigin vali. Þá hefur
nefndin um nokkurra ára skeið staðið fyrir
stuttu námskeiði fyrir formenn fagfélaga
á hverju vori og heldur kynningarfund
fyrir formenn fagfélaga hvert haust um
styrkfyrirkomulag.
Á síðasta ári minnkuðu framlög til
samstarfsnefndar um endurmenntun
framhaldsskóla nokkuð. Árið 2003 og
2004 voru framlög um 30.000.000 króna
hvort ár en árið 2005 voru þau 21.000.000.
Þetta kom m.a. til af því að þá lauk
sérstöku átaksverkefni í upplýsingatækni
og fjárveiting til þess féll niður. Vegna
þessa þurfti að sameina tölvustyrki og
einstaklingsstyrki. Þá þurfti nefndin að

Um endurmenntun
framhaldsskólakennara
gæta aðhalds við styrkveitingar og gætti
þess vel að styrkja aðeins námskeið
sem tengdust kennslugrein viðkomandi
umsækjanda.
Aðalfundur Félags framhaldsskóla-
kennara sem haldinn var þann 25. febrúar
síðastliðinn ályktaði um niðurskurðinn
og lýsti þungum áhyggjum yfir skertum
framlögum menntamálaráðuneytis til
samstarfsnefndar um endurmenntun
framhaldsskólakennara. Þar sem allmiklar
hækkanir urðu á öllum kostnaði milli ára
er ljóst að skerðingin er veruleg.
Það er von nefndarinnar að geta á
næstu árum aukið framboð á endur-
menntun og stuðningi við kennara,
náms- og starfsráðgjafa og stjórnendur í
framhaldsskólum sem vilja efla þekkingu
sína með því að sækja námskeið til dæmis
í faggreinum sínum, á sviði upplýsinga-
tækni eða á sviði skólaþróunar og efla
vettvangsnám enn frekar en orðið er.
Þá er ætlun nefndarinnar að bjóða upp
á lengra nám sem metið yrði til eininga
á háskólastigi og sérsniðið að þörfum
framhaldsskólakennara og náms- og
starfsráðgjafa.
Anna María Gunnarsdóttir
Höfundur er faglegur ráðgjafi Félags
framhaldsskólakennara í skólamálum og formaður
skólamálanefndar félagsins.
Anna María Gunnarsdóttir
Í töflunni hér að neðan má sjá hvernig
styrkveitingum árið 2004 var varið.
KJARAMÁL
Lj
ós
m
yn
d:
k
eg