Alþýðublaðið - 28.03.1987, Blaðsíða 2

2
Laugardagur 28. febrúar 1987
Jón Baldvin Hannibalsson um sérframboð Alberts Guðmundssonar:
Siálfstæðisflokkurinn er að klofna“
Annar þáttur í sápuóperunni Valdatafl í Valhöll
„Skjótt skipast veður í lofti. Nú
horfa menn upp á Sjálfstæðis-
flokkinn riðlast í sundur, klofna í
tvennt út af hverju? Flokksforystan
segir: Það er út af siðferðinu. Ef Al-
bert væri spurður, hverju ætli hann
mundi svara. Það veit enginn. Lít-
um fyrst á hina mannlegu mynd.
Flokksforysta Sjálfstæðisflokksins
með Þorstein Pálsson í broddi fylk-
ingar kemur eftir dúk og disk í Al-
berts—Hafskipsmálum og úr-
skurðar: Albert hefur gert sig sekan
um „siðferðisbrest". Hann hefur
verið borinn sökum í fjölmiðlum
um skattsvik á sama tíma og hann
var æðsti yfirmaður skattamála,“
segir Jón Baldvin Hannibalsson
formaður Alþýðuflokksins um sér-
framboð Alberts Guðmundssonar.
Fólk spyr: Var þetta að gerast í
gær. Af hverju núna? Eru ekki
margir mánuðir síðan Helgarpóst-
urinn birti þessar ákærur fyrst?
Hvernig brást flokksforystan við
þá? Af hverju brást hún ekki við
strax?
í útlöndum — þar sem siðferðið
er tekið alvarlega — eru viðbrögð
stjórnmálamanna og flokka, af-
dráttarlaus og tafarlaus. Ráðherra
sem er yfirmaður skattamála og er
borinn sökum af fjölmiðli um
skattsvik segir af sér þegar í stað,
leggur öll gögn á borðið og heimtar
opinbera rannsókn. Þetta var ekki
gert. Albert brást ekki þannig við.
Flokkseigendafélagið brást ekki
þannig við. Því þeir héldu að þeir
slyppu með þetta. Allt í einu þegar
framboðsfresti er að ljúka komast
þeir að þeirri pólitísku niðurstöðu
að þeir munu ekki sleppa. Að þetta
muni skaða flokkinn. Þess vegna er
allt í einu játað að þetta er siðferðis-
brestur. Niðurstaðan, hver var hún?
Hún er sú að flokksformaðurinn
segir við Albert: Þú ert óhæfur að
gegna ráðherraembætti vegna sið-
ferðisbrests. En hversu langt nær
siðferðið í Sjálfstæðisflokknum?
Sama daginn komst formaðurinn
að annarri niðurstöðu og flokks-
forystan sömuleiðis. Siðferðisbrest-
urinn var ekki alvarlegri en svo að
Albert Guðmundsson var rétt
mátulega valinn til þess að vera leið-
togi flokksins og ásýnd hans út á
við í stærsta kjördæmi þjóðarinnar.
Lengra náði siðferðið ekki. M.ö.o.
það trúir ekki einn einasti maður á
íslandi á hina siðferðilegu vandlæt-
ingu. Það vita allir að þeim gekk
annað til. Atkvæðahræðsla, kjós-
endahræðsla, klókindi. Hitt er svo
annað mál að klókindunum var öll-
um klúðrað, klókindin reyndust
tómt klúður.
í fyrstu leit út fyrir að hvíta perl-
an, gamli sólóspilarinn væri beygð-
ur og brotinn. Einhver dapurlegasta
stund í íslenskum stjórnmálum var
ruglingslegt raus hans á fáránlegum
fréttamannafundi að afloknum
þingflokksfundi. það var dapur-
legt. Hryggilegt. Hvað gerist næst?
Það vill svo til að Albert Guð-
mundsson á skapharða dóttur. Allt
í einu kom hún svífandi eins og
frelsandi engill frá útlöndum til
þess að rétta hlut aldraðs föður.
Láta hann rétta úr bakinu, standa í
fæturna, storka fjendum sínum og
bjarga ærunni.
Þetta er fallegt. Fallegt sjón-
varpsleikrit. gæti verið beint úr
Dallas. Og þá þarf ekki að spyrja
hver er í hlutverki J.R. og hver er í
hlutverki Pamelu. Helena kom
heim og stappaði stálinu í kallinn,
dreif hulduherinn út úr fylgsni sínu.
Þannig varð til Borgaraflokkurinn.
Þar með er Sjálfstæðisflokkurinn
klofinn. En um hvað? Um hvað í
ósköpunum? Siðferði? það er at-
hyglisverð staðreynd að Trójuborg
féll þegar þeir leiddu tréhestinn inn
fyrir borgarmúrana. Nú er tréhest-
ur hins pólitíska siðferðis kominn
inn fyrir borgarmúra Sjálfstæðis-
flokksins og borgin óvarin, öllum
opin, afhjúpuð. Siðferðisbresturinn
er nefnilega orðinn öllum ljós.
Hann birtist nú í tvennu lagi. Fyrir
hvað stendur D? Aðför flokkseig-
endafélagsins að einum af forystu-
mönnum sínum? Fyrir hvað stend-
ur S? Fyrir siðferði í opinberu lífi?
Fyrir skattsvik? fyrir svindl? Eitt er
ljóst. Sjálfstæðisflokkurinn þóttist
vera á réttri leið. Við andstæðingar
hans getum nú tekið undir það.
Sjálfstæðisflokkurinn er á réttri
leið, hann er að klofna. Hann er að
klofna í tvennt. Innan hans leikur
allt á reiðiskjálfi í eitruðu andrúms-
lofti haturs og heiftar, persónulegr-
ar óvildar sem snýst um nákvæm-
lega ekki neitt nema persónur og
völd. Þetta er annar þáttur í sápu-
óperunni: Valdatafl í Valhöll.
Byrjaði þetta mál ekki allt saman
út af sköttum? Spurning: Hvernig
birtist siðferði skattakerfisins al-
menningi á íslandi? Hverjir hafa
verið ábyrgðarmenn þess siðlausa
skattakerfis? Hverjir bera ábyrgð á
skattsvikum og skattundandrætti
upp á þúsundir milljóna? Svar:
Fyrst Albert Guðmundsson fyrri
tvö ár kjörtímabilsins. Svo fjand-
vinur hans Þorsteinn Pálsson seinni
hluta kjörtímabilsins. Sjálfstæðis-
flokkurinn dæmdi Albert óhæfan
sem fjármálaráðherra af faglegum'
ástæðum fyrir rúmu ári að Þor-
steinn tók við. En hvað hefur
breyst? Nákvæmlega ekki neitt.
Siðleysi skattakerfisins birtist okk-
ur best í dæmisögunni frá ísafirði.
í Morgunblaðsfrásögn sjómanns-
ekkjunnar sem birti upp úr skatt-
skrá staðarins tvær töflur. Annars
vegar taldi hún upp nöfn helstu
máttarstólpa bæjarfélagsins sem
greiddu sameiginlega 40 þúsund
krónur i tekjuskatt til ríkisins. Hins
vegar birti hún töflu um 12 útivinn-
andi konur, fiskverkunarkonur og
einstæðar mæður. Sameiginlega
greiddu þær eina milljón til ríkisins
í tekjuskatt. Þessi dæmisaga frá
ísafirði hefði getað gerst í hverju
einasta byggðarlagi á íslandi, það
þekkir fólk af eigin reynd. Þessi
dæmisaga um siðleysi skattakerfis-
ins, segir allt sem segja þarf. Og hún
segir meira en mörg orð um pólit-
ískt siðferði. Ekki bara Alberts
Guðmundssonar heldur líka Þor-
steins Pálssonar, og valdakerfis sér-
hagsmunanna sem er saman komið
í stjórnarflokkunum báðum.
Það er of snemmt að slá nokkru
föstu um það hvaða áhrif klofning-
ur Sjálfstæðisflokksins hefur. Það
er ekki nóg að vita að hann snýst
ekki um neitt annað en persónuleg
völd. Á næstu dögum munu menn
sjá ásýnd þeirra manna sem fylkja
sér að baki Alberts Guðmundssyni.
$km
mm

Vandi fylgir vegsemd hverri
Gamlir góðkunningjar
í nýjum
gamanmyndaflokki
SJÓNVARPIÐ
Einu sinni spurði Stalín um her-
sveitir páfans. Við fáum að sjá
framan í þær bráðum. Á þessu
augnabliki horfa menn á hina
mannlegu mynd, á hinn gamla
beygða mann, hvítu perluna úr fót-
boltanum sem átti að geyma í kosn-
ingabaráttunni suður í svörtustu
Afríku. Og Helenu hina fögru sem
hefur komið eins og frelsandi engill
til að bjarga æru föður síns. Þetta er
fallegt. Falleg sjónvarpsmynd. Fal-
leg sápuópera. Hvað svo? Þegar
menn horfa á staðreyndir mála alls-
gáðum augum og þegar tilfinninga-
umrótinu er lokið og menn grilla í
veruleikann bak við glassúr sjón-
varpsstöðvar Sjálfstæðisflokksins
þar sem trónir sáttasemjari Sjálf-
stæðisflokksins innan um hina
Krummana, þá munu menn trúlega
ganga allsgáðir til kosninga og sjá
strax einn hlut. Sjálfstæðisflokkur-
inn hefur afhjúpað sig. Hin misk-
unnarlausa valdabarátta. Þetta ill-
kynjaða hatur sem ríkir milli
manna sýnir okkur að Sjálfstæðis-
flokkurinn er óhæfur til forystu.
Lítum í kring um okkur í þjóðfélag-
inu. Skólarnir eru lokaðir. Fram-
haldsskólanemendur liggja á fleti
sínu í fjármálaráðuneytinu. Hjúkr-
unarfræðingar ganga út. Sjúkralið-
ar ganga út, Blóðbankanum er lok-
að. Forysta Sjálfstæðisflokksins
má ekki vera að því að hugsa um
þetta. Hún er upptekin af öðru sem
henni finnst þýðingarmeira: Valda-
taflinu í Valhöll. Þá mun renna upp
fyrir fólki að nú þurfum við fremur
en nokkru sinni fyrr á því að halda,
Jón Baldvin: „Sjálfstœðisflokkur-
inn er á réttri leið — hann er að
klofna
að til verði afl með þessari þjóð sem
getur tekið við pólitísku forystu-
hlutverki af Sjálfstæðisflokknum.
Sem betur fer er það afl til. Það er
endurnýjunarafl íslenskra stjórn-
mála. Það er ekki í þágu sérhags-
muna. Það mun ekki hygla sérhags-
munum á kostnað almenningshags-
muna. Það lætur ekki stjórnast af
úreltum kreddum. Það ræðir um
málefni, — ekk:. bara menn.
Þetta aíl er til og það hefur verið
í sókn á undanförnum árum.
Þetta afl heitn Aiþýðuflokkurinn.
Nú þurfum við á honum að halda"
segir Jón Baldvin Hannibaisson.
Albvðuflokkskonur funda í Hollvwood í daa:
„Viö viljum völd
heim í héruðin“
— segir Elín Alma Arthúrsdóttir
„Við ætlum að berjast fyrir því
að allir eigi sama lífeyrisrétt. Við
viljum heildarendurskoðun alls
skattakerfisins. Við ætlum einnig
að berjast fyrir því að hver og einn
hafi frelsi tií þess að velja og hafna
í húsnæðismálum. Þá ætlum við
ennfremur að fylgja nýrri línu í
byggðamálum og '■svo viljum við
nýja og gjörbreytta atvinnustefnu“,
sagði Elín Alma Arthúrsdóttir, 2.
maður á lista Alþýðuflokksins á
Suðurlandi og ein af fjórum Al-
þýöuflokkskonum, sem verða með
orrustufund i Hollywoodí dag kl.
14.00.
„Sem dæmi um breytingar sem
við Ieggjum áherslu á eru tillögur
okkar í byggðamálum. í þeim efn-
um viljum við fá völdin heim í hér-
uðin sjálf með nýjum héraðsstjórn-
um og sterkum sveitarfélögum. Þar
verði miðstöð fjölbreyttari þjón-
ustu, stjórnunar og þess að fjár-
magnið sé ávaxtað á staðnum, en
renni ekki umsvifalaust til Reykja-
víkur, — en þannig er það nú.
Við viljum sem sagt að Fjárfest-
ingarlánasjóður atvinnulífsins
verði landshlutaskiptur. Við viljum
að fólk úti á landi þurfi ekki að
koma til ríkisins með betlistaf í
hendi, þiggjandi ölmusu af því fé
sem þegar hefur runnið til kerfisins.
Því viljum við skilyrðislaust breyta.
í skattamálum viljum við heild-
arendurskoðun alls skattakerfisins,
vegna þess að núverandi skattakerfi
er ónýtt. Og hér eigum við ekki við
einstaka skatta, heldur allt skatta-
kerfið eins og það leggur sig, þar
sem ekki er tekinn út úr því einn lið-
ur eins og nú hefur verið gert með
staðgreiðsluna. Það sem kom út úr
því var aðeins að nú er komin stað-
greiösla launamannaskatts, en Þor-
steinn Pálsson lofaði niðurfellingu
launamannaskatts á sínum tíma..
Einnig styðjum við upptöku virðis-
aukaskatts og að samfara því verði
stigið stórt skref í niðurfellingu
tekjuskatts af almennum launa-
tekjum. Og það verður að gerast
samhliða upptöku virðisauka-
skatts, þar sem allt skattakerfið er
ein samspilandi heild.
Við viljum einnig nýja atvinnu-
stefnu og nýsköpun í atvinnumál-
um, þar sem dregið er úr beinum
ríkisafskiptum og við viljum að rík-
ið einbeiti sér að því að efla velferð-
arkerfið fyrir fólkið sjálft, — allt
fólk, ekki velferðarkerfi fyrirtækj-
anna.
Svo mætti nefna nýja landbún-
aðarstefnu og taka þarf til hendinni
við uppbyggingu í gróðurvernd.
Þetta og margt fleira munum við
ræða á fundinum í Hollywood í
dag“, sagði Elín Alma Arthúrsdótt-
ir.
Ásamt Elínu Ölmu, munu Rann-
veig Guðmundsdóttir, Lára V. Júlí-
usdóttir og Jóhanna Sigurðardótt-
ir, halda ræður í Hollywood í dag.
Leiðrétting
Nafn Jóhannesar Nordal banka-
stjóra Seðlabankans misritaðist í
forsíðufrétt í gær, föstudag. TVeir
bókstafir féllu aftan af nafninu svo
úr varð Jóhann í stað Jóhannes. Við
biðjum Jóhannes Nordal og lesend-
ur velvirðingar á þessum mistökum
sem urðu í prentsmiðju.
— Ritsjt.