Feykir - 31.08.2016, Side 8
8 32/2016
Heilir og sælir lesendur góðir.
Það er Ingólfur Ómar Ármannsson sem er
höfundur að fyrstu vísunum að þessu sinni.
Munu þær vera ortar á Snæfellsnesi, í fallegri
kvöldsól.
Ljómar sunna loga skær
lýsir jökulskalla.
Ótal myndir á sig fær
ásýnd blárra fjalla.
Sé ég glit við sjónarrönd
sólareldur logar.
Báran hjalar blítt við strönd
blika sund og vogar.
Foldarprýði fáguð öll
ferðamanninn laðar.
Roða gulli reifast fjöll
röðull landið baðar.
Eftir hinu forna tímatali standa nú yfir, eins
og margir vita, er þessi þáttur er í smíðum,
svokallaðir hundadagar. Oft gat brugðist til
beggja vona fyrir heyskaparfólk hér áður fyrr
þegar einu verkfærin voru orf og hrífa. Ef illa
gekk bölvaði fólk þessum dögum og taldi þá
skapa slæma ævi, eins og fram kemur í næstu
vísu, sem ort er af konu sem mun hafa búið við
harða lífsbaráttu alla ævi. Hún hét Sigurbjörg
Björnsdóttir frá Staðartungu í Hörgárdal.
Bernskulundin buguð var
blóðug undin klagar
allar stundir ævinnar
urðu hundadagar.
Önnur vísa kemur hér eftir Sigurbjörgu, hef ég
kunnað hana að mér finnst í áratugi en er nú
nýbúinn að vita um höfund hennar.
Sá er kannar kuldann hér
kann að verða feginn,
ef hann fær að orna sér
við eldana hinu megin.
Síðastliðinn vetur var í útvarpinu á Rás 1 á
kvöldin lesið upp úr æviminningum Tryggva
Emilssonar. Var meðal annars frásögn
af ferðum Tryggva, er hann var bóndi í
Öxnadal, í fjárleit þar í fjallgarðinn. Var hann
svo lánssamur að finna í þeirri ferð ær með
hrútslambi sem háttsettur maður á Akureyri
átti. Stjórnaði þá Sjálfstæðisflokkurinn bæn-
um og var þessi kindaeigandi æðsta ráð þar
um þetta leyti. Þótti honum vænt um sínar
kindur og hafði gert allt sem hann gat til að
finna parið. Þegar Tryggvi kemur með þau
skilaboð að ærin sé fundin verður eigandinn
svo glaður að hann bíður Tryggva, sem þá
var yfirlýstur andstæðingur sjálfstæðismanna,
starf hjá bænum við að innheimta reikninga
fyrir það fyrirtæki sem þá hét Rafmagnsveitur
Akureyrar.
Tók hann þessu góða boði boði með þökkum
og segir sagan að með fyrstu ferðum hans
hafi verið að heimsækja Sigurbjörgu, sem þá
átti orðið heimili á Akureyri. Fannst henni að
þessi harði baráttumaður verkalýðsins ætti að
fást við önnur verkefni. Eftir komu hans í hús
Sigurbjargar varð þessi til.
Röltir um með reikning skakkan
Vísnaþáttur 671
rukkar fyrir íhaldið.
Mér finnst betra að horfa í hnakkann
heldur en í andlitið.
Tíminn líður fljótt á milli gjalddaga hjá þeim
sem lítið eiga í sjóði. Aftur er rukkarinn
kominn og finnst þá Sigurbjörgu rétt að
breyta vísunni.
Settu upp hattinn, hnepptu frakkann
hafðu á þér fararsnið.
Mér finnst betra að horfa í hnakkann
heldur en í andlitið.
Sigurbjörg var einhleyp alla ævi og gerði
stundum í vísum sínum grín að því.
Skoppar lipur út og inn
ekki er gripur viðfelldinn,
og á svipinn síúfin
svarti piparbaukurinn.
Á fallegu haustkvöldi, þegar tunglið var að
taka völdin af niðdimmu haustmyrkri, orti
Sigurbjörg.
Myrkrið er að missa þrótt
máninn tekur völdin.
Nú er ekki lengur ljótt
að líta út á kvöldin.
Hér í Húnaþingi hefur nú undanfarnar
margar nætur ríkt dimm þoka og oft rásað
um fjallgarðinn mest allan daginn. Svo hefur
trúlega verið er Rósberg G. Snædal orti þessa
hringhendu.
Dropasmáar daggir gljá
drjúpa strá á völlum.
Þokubláir bólstrar á
brúnaháum fjöllum.
Kannski er gaman að rifja enn og aftur upp
þessa kunnu vísu prófessorsins Sigurðar
Norðdal.
Yfir flúðir auðnu og meins
elfur lífsins streymir.
Sjaldan verður ósinn eins
og uppsprettuna dreymir.
Minnir að þessi sé eftir Braga Jóns frá
Hoftúnum.
Fyrir því má finna staf
forn er þessi saga,
Að margir súpa seyðið af
syndum æskudaga.
Einn af tryggum áskrifendum að Feyki mun
eftir að hafa lesið síðasta tölublað vandlega
ort svo.
Örvæntingar önug sál
oftast froðu sleikir.
Ekki virðast vísnamál
vanta í blaðið Feykir.
Veriði þar með sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON ) kristin@feykir.is
Núna er sumarið á enda
en túristatímabilinu hvergi
nærri lokið. Ég er búin að
vera í rekstri á söluskálanum
Hörpu ásamt mömmu
minni í 10 ár í ágúst 2016
og gaman að sjá allar þær
breytingar sem að hafa orðið
hér í Húnaþingi vestra.
Ég man að fyrir 10 árum
síðan, þegar að við byrjuðum,
þá var það hending að sjá
túrista, manni lá við að hringja
í björgunarsveitina eða spyrja:
„Ertu týndur vinur?“
Í dag þá er þetta tímabil orðið
nánast allt árið og má þar
Selasetrinu og fleirum margt
þakka, mikil uppbygging
sem að heldur bara áfram og
megum við öll í sveitafélaginu
vera stolt af okkur og þeim
framförum sem að hér hafa
orðið. Sérstaklega tekur maður
eftir því hjá ferðamönnum að
þeir minnist á hversu fallegt
og snyrtilegt sé hérna, hvað
allt sé heimilislegt og mikið
að gera á ekki stærra svæði.
Verslanir matsölustaðir,
hestaleigur selaskoðun,
bókasafn, sundlaug og fleira.
Svo kom það skemmtilega
á óvart hversu margir eru
farnir að þekkja staðinn, hafa
lesið um hann í erlendum
ferðabæklingum eða heyrt um
hann frá vinum og gera sér
ferð hingað. Þá kemur pínu
mont í mann af sveitinni sinni.
Algengasta spurningin sem að
ég fæ (fyrir utan: Hvar sé ég
selina?) er sú hversu margir
búa hérna og þegar að ég
segi þeim 500 í þorpinu og
1200 með sveitinni trúa þeir
manni varla. Það sannar bara
máltækið margt smátt gerir
eitt stórt. Núna er bara að
halda áfram að gera vel.
- - - -- -
Ég vil skora á Heiðu Haralds
á Hvammstanga að taka við
pennanum
Inga Rut Ómarsdóttir á Hvammstanga skrifar
„Ertu týndur vinur?“
ÁSKORENDAPENNINN
UMSJÓN kristin@feykir.is
„Núna er ég tilbúinn
að hjálpa ykkur“
Einlægt myndband ungs Króksara vekur athygli
Myndband sem Sauðkrækingurinn Daníel
Þórarinsson setti á fésbókarsíðu sína nýlega hefur
vakið mikla athygli en þar opnar hann hjarta sitt
fyrir almenningi er hann opinberlega kemur út úr
skápnum. „Ég er að opna mig með mínar
tilfinningar, sem hljóðar þannig að ég fæddist
aðeins öðru vísi en flestir aðrir,“ segir Daníel í
myndbandinu. Þegar þetta er skrifað hafa 22
þúsund manns skoðað myndbandið.
Daníel spyr hvað það er að vera öðruvísi. „Maður
er alltaf að passa sig að falla inn í eitthvað norm, en
þetta norm er ekkert rosalega frábært fyrir alla og
ekki fyrir mig. Það er búið að vera mikil vinna að
reyna falla inn í þetta norm.“ Hann segist vera kominn
á þann stað í sínu lífi að hann ætli að sleppa tökunum
á því og koma út úr skápnum. „Allt mitt líf er ég búinn
að reyna að vera einhver annar en ég er. En það sem
skiptir máli er að manni líði vel hérna,“ segir Daníel
og bendir á hjarta sitt.
Daníel segir í samtali við Feyki að þetta hafa legið
þungt á sér áður en hann tók þá ákvörðun að opinbera
samkynhneigð sína en það hafi heldur betur breyst í
hina mestu hamingju. Fyrirfram hafði Daníel ekki
búist við því. Í myndbandinu hvetur Daníel aðra til að
hafa samband við sig ef viðkomandi telji hann geta
hjálpað við eitthvað. Að sögn Daníels hefur fólk þegar
haft samband með ýmis vandamál og margt jákvætt
komið út úr því. „Núna er ég tilbúinn að hjálpa ykkur.
Talið við mig þó að þið þekkið mig ekkert,“ segir
Daníel í lok myndbandsins. /PF