Feykir - 04.04.2013, Blaðsíða 6
6 Feykir 13/2013 08/2013
júlíus jóhannsson brottfluttur Sauðkrækingur
hefur mörg járn í eldinum
Viðtal
Pall Friðriksson
Júlíus Jóhannsson er brottfluttur
Króksari sem þótti uppátækjasamur í
æsku. Hann segist hafa verið ofvirkur
með athyglisbrest á æskuárum en þá
var það kallað óþekkt. Júlíus hefur náð að virkja kraftinn sem
býr innra með honum og hefur vanalega mörg járn í eldinum
en meðal verka hans er að hafa komið Góa og eldfærunum á
koppinn sem og Góa og baunagrasinu sem nú er sýnt í
Borgarleikhúsinu. Feykir hafði samband við Júlíus og spurði
hann um æskuárin á Króknum og hvað lífið hafði uppá að
bjóða er hann hleypti heimdraganum.
Júlíus er sonur Jóhanns heitins
Júlíusarsonar, Djóka sem
var sjómaður og Valdísar
Hagalínsdóttur verkakonu
og er hann yngstur fjögurra
systkina. Með eiginkonu
sinni, Moniku Hjálmtýsdóttur
viðskiptafræðingi, á hann einn
son, Jakob Hagalín 5 ára en áður
eignaðist hann soninn Jóhann
Sölva, 17 ára menntaskólanema.
Þau hjón eiga og reka
fasteignasölu í Reykjavík sem
heitir Kaupsýslan auk þess sem
þau eru leikritaframleiðendur í
hjáverkum.
-Það voru forréttindi að
fá að alast upp á Króknum.
Fyrir dreng eins og mig, sem
er fullur af athyglisbresti og
ofvirkni eða óþekkt eins og það
hét nú í þá daga, þá var gott að
búa á Króknum. Ég var mikið
í hestunum með Ingimari
Pálssyni og var ég hálfgerður
heimalingur hjá þeim Ingimari
og frú Halldóru Helgadóttur
til margra ára. Það að hafa
fengið að vera með Ingimari í
hestunum og beina ofvirkninni
þangað hefur haft gríðarlega
jákvæð áhrif á líf mitt og
Dóruhakkið er best, segir Júlíus
og bætir við að margt hafi verið
brallað, sumt birtingarhæft og
annað alls ekki.
Júlíus er af þeim skemmtilega
árgangi 1974 og eins og hann
segir sjálfur þá hefur líklega
verið mikill fögnuður á
kennarastofunni þegar margir
af þeim árgangi gengu í hinsta
sinn úr Gagganum.
-Er mér saga fersk í minni
af Stefáni nokkrum Jónssyni,
vini og skólabróður þegar við
vorum að fara yfir stöðuna hvað
við ætluðum að verða eftir hálft
ár að skólagöngu lokinni. Jú, við
ætluðum að verða sjómenn eins
og feður okkar. Þá voru engin há
plön um að fara í menntaskóla
eða feta menntaveginn frekar
enda búnir að vera óþekkir alla
skólagönguna og pössuðum illa
inn í þann ramma sem jafnan
er reynt að setja fólk í. En víkur
sögu okkar að samræmdu
prófi í ensku. Við Stefán förum
saman í prófið. Tjáir Stefán mér
að þetta verði ekkert mál, ég
þurfi ekki að vera stressaður,
enda hafði ég aldrei fundið
fyrir stressi... og einkunnirnar
eftir því. Að fimmtán mínútum
liðnum af próftímanum sé
ég Stefán standa upp og skila
prófinu. Hann lítur síðan á mig
og brosir. Ég hugsaði með mér,
góðir gestir, þarna er að labba
maður fram sem er í þann
mund að fá einn eða tvo á prófi.
Kem þó í humátt á eftir honum,
þar sem ég hafði ekki verið vel
undirbúin fyrir prófið sjálfur og
hitti hann frammi á gangi. Ég
spyr hann hvernig hafi gengið.
Svaraði hann mér. Júlli, ég gat
svarað öllu, þetta var skítlétt.
Fréttirnar fá aðeins á mig þar
sem að ég hafði alls ekki sjálfur
getað svarað þeim öllum. Spyr
hann aftur, ertu viss um að þú
hafir svarað þeim öllum. Segir
hann, já öllum nema efstu,
þar stóð Name og ég giskaði
á Afríka. Þetta er nú bara ein
saklaus saga af mörgum. Eflaust
gæti maður gefið út bók með
örsögum af skemmtilegum
uppátækjum vina og kunningja
á Króknun og hver veit nema
það muni líta dagsins ljós einn
daginn.
Árið 1993 fer Júlíus frá
Sauðárkróki þar sem hann
hafði ráðið sig í vinnu hjá
Hampiðjunni og hugðist gerast
netagerðamaður. Sá draumur
varð þó skammvinnur því
að hann hafði uppgötvað
dulinn hæfileika sem var
sölumennska og fór að vinna í
tískuvöruversluninni Sautján.
-Er mér minnistætt þegar
strákarnir af Skaftanum komu
og voru að fara á árshátíð,
vantaði þá jakkaföt. Það var ekki
mikið mál, seldi þeim nánast
öllum sömu jakkafötin og þegar
Fasteignasalinn Júlíus.
þeir komu svo á fögnuðinn þá
voru þeir allir eins, segir Júlíus
og hlær.
Gói og eldfærin verða til
Þegar Júlíus er spurður um
aðkomu hans að leikritinu um
Góa og eldfærin segist hann
sem ungur maður hafa hlustað
mikið á ævintýrið um eldfærin
og Jóa og baunagrasið sem Gylfi
Ægis og Rúnar heitinn Júl og
Hemmi Gunn gerðu ódauðlegt
hér um árið. Og þegar Jóhann
Sölvi sonur hans var yngri þá
hlustuðu þeir feðgar einnig
mikið á þessi ævintýri. Kviknaði
þá hjá Júlíusi sú hugmynd að
gaman væri að koma þessum
ævintýrum inn í leikhús. Sótti
þessi hugmynd að honum aftur
og aftur í a.m.k. áratug eða alveg
þangað til hann fann sig knúinn
til að gera eitthvað í málinu.
-Var ég á þessum tíma að vinna
hjá Prime umboðsskrifstofu og
ákváðum við Páll Eyjólfsson
eigandi Prime og Monika
konan mín að hrinda þessu í
framkvæmd. Það var svo þegar
ég hitti Guðjón Davíð Karlsson
leikara, betur þekktur sem
Gói og Vigni Snæ Vigfússon
tónlistarmann að hjólin fóru að
snúast. Þá var spurningin, hvar
ætti að setja sýninguna upp.
Fór ég á fund með Magnúsi
Geir Þórðarsyni leikhússtjóra
Borgarleikhússins og kynnti
fyrir honum hugmyndina að
þremur verkum sem honum
leist mjög vel á. Úr varð að
ákveðið var að uppfærslan um
Góa og Eldfærin yrði sett upp
í Borgarleikhúsinu og fengum
við til liðs við okkur Þröst Leó
Gunnarsson stórleikara og
snilling og var verkið frumsýnt
í apríl 2011, segir Júlíus en
skemmst er frá því að segja
að sýningin fékk feiknagóðar
viðtökur. Leikritið fékk mjög
góða dóma og var tilnefnt til
Grímunnar það árið sem besta
barnasýning og sem besta
sýningin að mati áhorfenda.
Nú er verið að sýna Góa og
baunagrasið og segir Júlíus að
aldrei hafi verið nein spurning
með framhald.
-Nei, fyrir lá samningur við
Borgarleikhúsið um þrjú verk.
Þegar ráðist var í næsta verk
var pressan mikil að gera enn
betur með Góa og baunagrasið
eftir mjög góða velgengni
Eldfæranna. Baunagrasið
gekk enn betur en Eldfærin
og mjög góðir dómar rötuðu
í hús. Auk þess fengum við
aftur tilnefningu til Grímunnar
sem besta barnasýningin, eitt
þriggja verka árið 2012. Við
erum ofboðslega stolt af þessum
verkefnum þar sem valinn
maður er í hverju rúmi. Við
erum svo lánsöm að hafa með
okkur frábæra samferðamenn.
Við erum framleiðendur
sýninganna í samstarfi við
Júlíus hefur mikið yndi af útivist og eru fiskveiðar í uppáhaldi.
Borgarleikhúsið sem er jú
atvinnuleikhús þar sem mikil
fagmennska og metnaður er
einkennandi og nutum við
liðsinni þess frábæra starfsfólks
sem þar vinnur. Gói og Þröstur
eru náttúrulega snillingar og
leikarar af guðs náð og Vignir
Snær sem semur tónlistina er
mikill listamaður og fagmaður
svo ekki sé minnst á alla hina
fagmennina sem koma að
verkefninu, segir Júlíus.
Hvað er einkennandi
fyrir sýningarnar?
-Einfaldleikinn er í fyrirrúmi,
þar sem áherslan er lögð á
að virkja ímyndunaraflið.
Hugmyndin er raun sú að
sýna fram á að krakkar, jafnt
sem fullorðnir geti skapað sér
ævintýraheim sem á sér engin
takmörk, án þess að umgjörðin
eða leikmyndin sé mikil. Börn
eru svo ótrúlega skapandi og
þegar þess er krafist af þeim
að þau noti ímyndunaraflið
til þess að lifa sig inn í
ævintýraheim eins og gert er
í þessum verkum, þá verður
upplifunin enn sterkari og
raunverulegri. Hefur það líka
sýnt sig á sýningum að börnin
taka virkan þátt og láta heyra í
sér. Það til dæmis bregst ekki
að þegar Gói er í þann mund
af fara að taka óskynsamlega
ákvörðun í hlutverki sínu,
þ.e. hann ætlar að fara upp til
risans enn einu sinni þrátt fyrir
að móðir hans hafi bannað
honum það, þá hrópa börnin
upp á svið og reyna að hafa
áhrif á atburðarrásina því þau
vilja alls ekki að Gói lendi aftur
í hættulegum aðstæðum. Það er
fátt eins skemmtiegt og að fara
með börn í leikhús. Hjá okkur
þá mega þau hlæja og gráta og
vera með vesen. Þau eru börn
og eiga að fá að haga sér eins og
slík og það gerir leikhúsið svo
miklu líflegra og skemmtilegra.
Júlíus segir að búast megi við
framhaldi á Góa og Þresti Leó í
öðrum ævintýrum þar sem nú
þegar sé verk á teikniborðinu
sem tilheyrir leiksyrpu þeirra
félaga Góa og Þrastar Leós en
getur ekki sagt meira frá því að
svo stöddu.
Gói og baunagrasið ætla í
smá ferðalag um helgina því
tvær sýningar eru áætlaðar
í Hofi á Akureyri næsta
sunnudag og hvetur Júlíus alla
Skagfirðinga og nágranna til að
mæta í Hof og sjá þessa frábæru
sýningu. Miðasala fer fram á
menningarhus.is og í síma 450
1000 en hægt er að fylgjast
með á Facebook undir heitinu
Baunagrasið.
Ætlaði í netagerð en
endaði í sölumennsku