Árbók Reykjavíkurborgar - 01.12.1992, Page 138
122
ATVINNUMÁL
✓
A fundi borgarráðs 18. ágúst 1992 var lögð fram eftirfarandi tillaga um
atvinnuþróunarfyrirtæki í Reykjavík, ásamt greinargerð til borgarstjóra.
Tillagan og greinargerðin eru nú til umfjöllunar hjá hlutaðeigandi
aðilum innan borgarkerfisins og þótt reikna megi með breytingum í
umfjölluninni, þykir engu að síður rétt að birta hvort tveggja hér.
TILLAGA
Lagt er til að hafinn verði undirbúningur að stofnun hlutafélags um
þróunarfyrirtæki, Aflvaka Reykjavíkur hf., sem hafi það að markmiði
að efla atvinnulíf í Reykjavík.
Fyrirtækið taki til starfa innan eins árs og njóti fulltingis borgarsjóðs og
borgarfyrirtækja í samvinnu við þá einstaklinga og lögaðila, sem taka
vilja þátt í stofnun félagsins.
Sérstökum starfshópi undir stjórn borgarverkfræðings verði falinn
undirbúningur og kynning málsins á fyrstu stigum, en eigi síðar en við
afgreiðslu fjárhagsáætlunar Reykjavíkurborgar fyrir árið 1993, verði
formlega gengið frá skipan nefndar með hliðsjón af undirtektum og
henni falið að ljúka undirbúningi og ganga frá stofnun Aflvaka
Reykjavíkur hf. Gert er ráð fyrir, að hjá fyrirtækinu starfi forstjóri, tveir
sérfræðingar, skjalavörður og ritari, sem geti fengið nánar tilgreinda
aðstoð starfsliðs borgarinnar, þegar þurfa þykir.
Lagt er til, að borgarsjóður og borgarfyrirtæki leggi félaginu árlega til fé
til rekstrar og verkefnisbundinna styrkja, samtals 50 mkr., og tryggi
jafnframt, að hlutafjárframlög í fjárfestinga- og lánasjóð félagsins nemi
a.m.k. 100 mkr. á ári næstu fimm árin. Að því tímabili loknu verði
árangurinn af starfsemi félagsins metinn og ákvörðun tekin um framhald
eða slit á félaginu.