Árbók Hins íslenzka fornleifafélags - 01.01.1979, Qupperneq 182

186
ÁRBÓK FORNLEIFAEÉLAGSINS
bókasafni Islands svo sem getið hefur verið opinberlega. Þá er og
alkunna hvílíkur dýravinur Mark Watson var og ein af stórgjöfum
hans til íslands var dýraspítalinn, sem hann afhenti sveitarfé-
lögum á suðvesturlandi og Dýraverndunarsambandi Islands.
Mark Watson var alla tíð ókvæntur. Hann var vel efnaður maður,
en víst ekki stórauðugur, og efni hans leyfðu honum að sinna áhuga-
málum sínum án þess að þurfa að vinna fyrir daglegu brauði lengst
af. Greinilegt var, að hann forðaðist óhóf allt og- lifði einföldu og
hófsamlegu lífi. Hann hafði yndi af ferðalögum og hann gat veitt
sér að fara víða um heim, heimsækja lönd og lýði og kynnast fólki
sem hafði svipuð áhugamál og hann. Heimili hans í London var ekki
stórt en húsmunir og persónulegir gripir hans báru vott um næman
smekk og tilfinningu fyrir vönduðum og smekklegum hlutum. Þar
var ekkert óhóf né prjál sýnilegt, enda líf hans sjálfs fellt í ein-
faldar og fastar skorður.
1 Þjóðminjasafni fslands mun Mark Watsons lengi verða minnst
sem mikils og einlægs velunara.
Þór Magnússon
Ýtarleg't æviágrip Mark Watsons eftir Hilmar Foss mun birtast í Árbók Lands-
bókasafns Islands fyrir árið 1980.