Ársrit Ræktunarfélags Norðurlands - 01.01.1962, Side 110

110
ynni ekki meira við stofnunina en af mér varð krafizt, en
beindi umframorku minni inn á aðrar og óskildar brautir.
Því þótt það ef til vill bætti ekki hag minn teljandi, þá gat
það þó fært mér ánægju og sálarfrið. Ég átti sem sé um það
að velja, að verða bitur og óánægður í starfi mínu, vegna
þess, sem mér fannst vera vanmat og skilningsleysi þjóðfé-
lagsins, eða að gefa þjóðfélaginu langt nef og reyna að skapa
mér hamingju og sálarfrið í sjálfstæðum persónulegum við-
fangsefnum. Ég uppgötvaði nú að þetta var hægt vegna þess,
að gamla boðorðinu: „Sex daga skaltu verk þitt vinna, en
þann sjöunda skaltu halda heilagan" hafði verið breytt og
hljóðaði nú eitthvað á þessa leið: „Þú skalt vinna mest átta
stundir á dag sex daga vikunnar, en allan hinn tímann og
sjöunda daginn áttu að eiga frí“. Um heilagleikann stendur
ekkert í þessari nýju útgáfu, en hins vegar eru þar ákvæði
um auka-frídaga og þriggja vikna sumarfrí, sem ekki fyrir-
finnst í hinu gamla lögmáli. í hinum nýja sáttmála eru líka
nákvæm ákvæði um hversu með skuli fara, ef einhvern
hendir sú skyssa, að vinna lengur en hinar tilskyldu átta
stundir eða að snerta verk á frídegi. Öll slík vinna skyldi
greidd með stórum hærra og stighækkandi verði. Um
Það, hvað skyldi kallast forsvaranleg vinna, stóð hins vegar
ekki neitt. I gamla sáttmálanum var það skilgreint þannig:
„í sveita þíns andlitis skaltu þíns brauðs neyta“. Nýi tíminn
leit á þetta sem óviðurkvæmilega þrælkun. Það vantaði
bara að svita sig við vinnuna. Þvílík ósvífni!
Öll verk mannanna eru ófullkomin. Það hefur sem sé
komið í ljós, að viss vandkvæði fylgja þessari nýju vinnu-
tilskipan. Sextán stunda frí á sólarhring, auk frídaga o. s.
frv., var miklu meira en þurfti til hvíldar eftir tiltölulega
léttan átta stunda vinnudag og þá varð til það, sem nefnt
hefur verið tómstundavandamálið. Fyrir fólk, sem komið
er á efri ár, er þetta ekki svo örðugt viðfangs. Margt af því
hefur þegar búið sér til viðfangsefni, sem það getur dundað
við, svo sem viðhald og snyrtingu smáeigna, ræktun garð-