Árbók Landsbókasafns Íslands - Nýr flokkur - 01.01.1992, Síða 123

LANDSBÓKASAFNIÐ 1990
123
HÚSNÆÐI íslandsbanki sagði Landsbókasafni upp
á árinu húsnæði því í Dugguvogi 9, er
það tók á leigu hjá Verzlunarbankanum fyrir allmörgum árum.
Voru þar geymd, að nokkru í kössum, ýmis rit Sameinuðu
þjóðanna, stjórnarprent frá Bandaríkjunum, fengið í skiptum,
ennfremur íslenzkar blaða- og bókaleifar, sem haldið hefur verið í,
og sitthvað fleira. Efni þetta var allt flutt í bráðabirgðabóka-
geymslu þá, er útbúin var í kjallara Þjóðarbókhlöðu, en bíður þar
nánari úrvinnslu, eftir því sem aðstaða og starfslið leyfa.
Bókageymslur þær, er safnið hefur á leigu hjá Reykjavíkurborg
á 5. hæð í Tryggvagötu 15, eru þegar fullar. Hluti erlends
bókakosts safnsins er þar geymdur í hillum, ennfremur á 2. hæð í
Alþýðuhúsinu við Hverfisgötu, og er efni sótt reglulega úr þessum
stöðum báðum til nota á lestrarsal eða vegna heimlána. Erlendi
bókakosturinn hefur í aðalsafninu smám saman orðið að víkja
fyrir hinum íslenzka, sem reynt er að halda innan stokks í lengstu
lög. Allt veldur þetta miklum vanda og knýr enn á um, að lokið
verði við Þjóðarbókhlöðu samkvæmt þeirri áætlun, er nú liggur
fyrir.
ÞJÓÐARBÓKHLAÐA Niðurstaða fjárlaga fyrir árið 1990 varð
sú, að veittar voru 67 milljónir úr hin-
um nýja sjóði, er efnt var til samkvæmt lögum um Þjóðarbókhlöðu
og endurbætur menningarbygginga, þótt álagning væri áætluð
265 milljónir og bókhlaðan ætti samkvæmt lögunum að sitja fyrir
fé úr honum. Þá hafði Háskóli íslands fallizt á 53 milljóna króna
framlag til kaupa á tölvukerfi handa bókhlöðusöfnunum og til
lagningar tölvunets.
67 milljónirnar fóru að mestu til að ljúka 10. áfanga og halda
hönnunarvinnu og öðrum viðbúnaði gangandi. Veitt var heimild
til að vinna að örlitlum hluta 11. áfanga, þ.e. einangrun innveggja
1. hæðar, jafnframt því, sem nokkru fé var varið til bráðabirgða
útbúnaðar geymslurýmis handa Landsbókasafni og Háskólabóka-
safni í kjallara bókhlöðunnar. En söfnin eru bæði orðin mjög
aðþrengd, og versnar ástandið ár frá ári.
Hörður Bjarnason fv. húsameistari ríkisins, er setið hefur í
byggingarnefnd Þjóðarbókhlöðu frá upphafi, óskaði eftir því um
vorið að verða leystur frá starfi sínu í nefndinni, og er starfs hans í
nefndinni minnzt með mikilli þökk.