Sjómannablaðið Víkingur - 01.12.1999, Blaðsíða 80

Hafnarfjarðarhöfn 90 ára
Þó að tíðin þyki hörð...
í aðdraganda bryggjugerðar í Hafnarfirði í byrjun aldar-
innar hraut hagyrðingi í bænum eftirfarandi af munni eftir
að skipuð hafði verið nefnd um smíðina:
Þó að tíðin þyki hörð
og þung sé við að deila,
nú er byrjuð bryggjugjörð
í bæjarstjórnar heila.
Síðan þetta var ort hefur mikið vatn runnið til sjávar og
mikil hafnarmannavirki gerð í Hafnarfirði. Hafnarreglugerð
fyrir bæinn gekk í gildi 1. janúar 1909 og 90 ára afmæli
hafnarinnar var fagnað í tengslum við þing Hafnarsam-
bands Sveitarfélaga sem haldið var í Hafnarfirði í haust. í
90 ára sögu hafnarinnar hefur orðið mikil breyting á um-
hverfi hennar og enn sér ekki fyrir endann á uppbyggingu
og stækkun Hafnarfjarðarhafnar. Nú stendur yfir stækkun
hafnarinnar utan Suðurgarðs og hófust þær framkvæmdir
1997.
Sigurður Hallgrímsson hjá Hafnarfjarðarhöfn segir að
skipta megi uppbyggingu hafnarinnar í fjóra kafla. Sá fyrsti
er bygging hafskipabryggjunnar 1912 sem var vígð 16.
febrúar 1913. Næst er bygging hafnargarðanna 1941 til
1953. Þá kemur bygging Straumsvíkurhafnar 1966-1969 og
svo sú stækkun utan Suðurgarðs sem nú stendur yfir. Auk
þess séu margir minni áfangar. Þar megi nefna Nýju bryggj-
una 1930, Norðurbakkann 1960 og 1969, Óseyrarbryggju
1975-1978, Suðurbakkann, sem gerður var í fjórum áföng-
um 1980-1994, stækkun Straumsvíkurhafnar 1997 og fram-
kvæmdum við smábátahöfnina frá 1969 til 1989.
Sú stækkun hafnarinnar sem nú er unnið að felst í 800
metra stækkun í vestur utan núverandi Suðurgarðs, 500
metra brimvarnargarð og fleira. Alls verður 23 hektara
svæði notað undir hafnsækna starfsemi.
Með byggingu stórra vinnustaða eins og nú er að rísa hjá
Ósey hf. skapast miklir möguleikar. Ætlunin er að í Hafnar-
fjarðarhöfn verði fyrsta flokks þjónusta við fiskiskip, bæði til
löndunar og viðgerða. Þá er ekki aðeins horft til íslenskra
skipa heldur allra skipa sem eru að veiðum á Norður-Atl-
antshafi. Þótt aðstaðan sé ekki nema að litlu leyti komin í
gagnið hefur fjöldi skipa boðað komu sína nú í desember.
Þessi skip koma af Flæmska hattinum, úr Barentshafi og af
Reykjaneshrygg og eru af ýmsu þjóðerni.
Hjarta bæjarins
í ávarpi sem Magnús Gunnarsson bæjarstjóri hélt þegar
minnst var 90 ára afmælis hafnarinnar sagði hann meðal
annars:
Það er ekki ofsögum sagt að hjarta Hafnarfjarðar sé höfnin
og umhverfi hennar og það gildir í ýmsu tilliti. Við höfnina er
hjarta bæjarins, miðbærinn og við höfnina slær einnig hjarta
atvinnulífsins þótt þróunin hafi gert það að verkum að púlsinn
finnist víðs vegar um bæinn. En til þess að mæta þörfum
hvers tíma verða bæjaryfirvöld að vera vakandi fyrir þróun og
nýjungum. Þvi hafa verið stigin mörg skref til að bæta að-
stöðu hafskipa í Hafnarfjarðarhöfn. Og nú erum við að stíga
enn eitt skrefið og líklega það stærsta með framkvæmdum
vestan núverandi Suðurgarðs. En það er ef til vill tímanna
tákn að nú er ekki síður lögð áhersla á þjónustuþátt starfsem-
innar. Skapa verður stórtækum aðilum viðunandi aðstæður til
þess að taka á sómasamlegan hátt á móti viðskiptavinum
sínum. Nú þegar er að rísa öflug skipasmíðastöð á nýju at-
hafnasvæði sem er táknrænt því slíkur hraði á uþpbyggingu
endurspeglar þá miklu þörf sem er fyrir hafnsækna starfsemi
af þessu tagi.
Um leið ganga eldri mannvirki í endurnýjun lífdaga og sam-
tímis umsvifamikilli endurnýjun og nýframkvæmdum á hafnar-
svæðinu fá sögufrægar útgerðarbyggingar í miðbænum nýtt
hlutverk tengt menningu og listum. Enda gerum við Hafnfirð-
ingar okkur vel grein fyrir því að hvorugt getur án hins verið
og bæði í atvinnu- og menningarlífi er hugmyndaauðgin drif-
kraftur og forsenda þróunar.
Með nýrri höfn þar sem aðstaða skapast fyrir þann þátt
starfseminnar sem er fyrirferðarmikill og stórbrotinn verður
betra næði í gömlu höfninni. Þannig tekst okkur að búa betur
í haginn fyrir smærri útgerð, trillukarla og þá sem langar að
bruna bátum sínum við beggja skauta byr - eins og Hafnfirð-
ingurinn Örn Arnarson orti svo eftirminnilega um. Við Flens-
borgarhöfn hefur siglingaklúbburinn Þytur nú komið sér fyrir í
glæsilegu húsnæði og er oft gaman að horfa yfir höfnina í
Hafnarfirði þegar seglin ber við sjóndeildarhring. ■
80
Sjómannablaðið víkingur