Helgafell - 01.12.1943, Blaðsíða 12

TÓMAS GUÐMUNDSSON:
Riddarinn blindi -
Einn dag fyrir þúsundum ára, um ókunnan skóg
ókunns lands,
hleypti riddarinn blindi á bleikum jó
frá bústað hins fyrsta manns.
Og þaðan liggja spor hans austan um aldir
yfir sundraða vegi og hrundar borgir
týndra þjóða, sem dreifðust veg allra vinda.
Og vei þeirri jörð, er sofnar við fótatak hans!
Því óraveg inn í draum hinna óbornu daga
ber hófadyn frá helreið riddarans blinda.
Og loks þegar kvöldar mun riddarinn blindi brynna
bleikum fnæsandi jó, meðan veröldin hvílir
úrvinda í sinni sorg, og náttlöngum teyg
svoígrar riddarans fákur úr fljóti dauðans
svefnsins svalandi veig,
unz upp er drukkin hver dregg þeirrar móðu,
sem daganna angist skýlir.
Og myrkrið fjarar —
í marmarahvítu
morgunljósinu jörðin vaknar